لە بابەت رووداوەکانی ئەم دواییانەی نێو کۆمەڵە
• کۆمەڵانی خەڵکی کوردستان،
• دۆستان و دڵسۆزانی کوردستان و کۆمەڵە
هەموان ئاگادارن کە لە ڕۆژانی ڕابوردوو لە زنجیرە ڕووداوێکی دڵتەزێن و نەخوازراوی دەرگیری لە یەکێک لە ئوردووگانی کۆمەڵەدا، بەداخەوە دوو پێشمەرگەی کۆمەڵە گیانیان لە دەست دا. پێشەکی سەرەخۆشی لە بنەماڵەی بەڕێزی هاوڕێیان هیوا سادقی و سامان ئیبراهیمی و لەهەموو پێشمەرگەکان و سەرجەم خەڵکی کوردستان دەکەم و ڕایدەگەیەنم ئەو کۆستە لە گشتمان کەوتووە، ئەوشەهیدانە هی هەموومانن و خەفەت و زیانە مرۆیی و رۆحیەکەش بۆ هەموومانە.
بەڵام ئێستا کە ئەو کارەساتە ڕووی داوە و زیانە گیانی و رۆحیەکەمان بەرکەوتووە، دەبێ بەردەام بین بۆ پێشگیری کردن لە تەشەنە سەندن و قووڵتر بوونەوەی گرژی و بشێوە. هەڵسوکەوت و زمانی، دوانی هەموو لایەن و کەسێکی دۆست و دڵسۆزیش پێویستە لە پێناو هێور کردنەوەی زیاتری بارودۆخەکە و ساڕێژ کردنەوەی برینەکان بێت، نەک خۆش کردنی ئاگرەکە و کولاندنەوەی زامەکان.
هاوکات لەگەڵ ئەوە، هەوڵێکی دیکەمان دەبێ، لێکۆڵینەوە لە چۆنیەتی خوڵقانی ڕووداوەکە، دەسپێشخەران و خەتابارانی تەقە کردن، چۆنیەتی شەهید بوونی ئەو دوو هاوڕێیە و باس کردن و دەرخستنی ئەو ڕاستیانە بۆ ڕای گشتی خەڵکی کوردستان بێت.
ئێمە لەمڕۆوە بە دیاری کردنی کۆمیسیۆنێک لە چوارچێوەی حیزبی خۆمان و بە ئیمکاناتی خۆمان ئەو کارە دەکەین و ئەوپەڕی هەوڵیشمان دەدەین ئەو لێکۆڵینەوەیە ڕاستگۆیانە و پشت بەستوو بە واقیعییەتەکان بێت، بەڵام بۆ ئەوەی بێلایەنی تەواو لە لێکۆڵینەوەکەدا لە بەر دڵی هەموان مسۆگەر و گومانهەڵنەگر بێ، هەر لێرەوە پێشنیار دەکەم کۆمیتەیەکی ڕاستیدۆز (حقیقت یاب)، پێکهاتوو لە پسپۆڕان و شارەزایانی بواری مافناسی، چالاکانی بڕواپێکراوی کۆمەڵگەی مەدەنی کوردستانی ڕۆژهەڵات و هەروەها کەسایەتی تێکۆشەر و پێشمەرگەی دێرین، بە ڕەزایەت و موافەقەتی هەموو لایەک، پێک بهێندرێت و ئەرکی لێکۆڵینەوەی زانستیانە و بێلایەنی ڕووداوەکانی کۆمەڵە، هەڵسەنگاندنی ئیدیعاکانی هەرتک لا و دەرخستنی ڕاستیەکانی پێ بسپێردرێت و ئیختیاری لێپرسین و لێکۆڵینەوە لە هەموو کەس و لایەنێکیشی پێ بدرێت. ئێمە بەنۆبەی خۆمان بۆ قبووڵ کردنی دەرئەنجامەکان و ڕەچاو کردنی ڕێنوێنییەکانی وەها کۆمیتەیەک ئامادەین.
هەرچەند ئەو دزێوییە بەداخەوە لەناو کۆمەڵە ڕوویداوە و ئەم خەسارە ئەوڕۆ لە ئێمە کەوتووە، بەڵام بەدڵنیاییەوە دەڵێین کە بۆ ئێمەش ڕووداوێکی نامۆ و دوور لە فەرهەنگ و لە بەها ئەخلاقییەکانی کۆمەڵەیە و هەر بۆیەش هەموانی بردۆەتە نێو حاڵەتی شۆک. بێگومان دەشبێ و لەسەرمانە سەرجەمی ڕووداوەکە و زەمینە و هۆکارەکانی بەوردی خەسارناسی بکەین و دەرسی شیاویان لێ وەربگرین.
هەروەها هیوادارین بە دەرس وەرگرتن لەم ئەزموونە تاڵە و ئەزموونە تاڵەکانی پێشووی گۆڕەپانی سیاسەتی کوردی، لە هەنگاوێکی دیکەدا حیزبەکانی کوردستانی ڕۆژهەڵات بتوانن مانێفێست یان بەڵێننامەیەک ئامادە و واژۆ بکەن کە بۆ هەمیشە لەم بەشەی کوردستان ڕێگە لە بەکار بردنی چەک و دەست بردن بۆ توندوتیژی، چ لەناو حیزبەکان و چ لە نێوانیاندا، بگرن.
بەڵام ئەو ڕووداوە ئەگەر بۆ ئێمە و هەموو دڵسۆزانی نیشتمانپەروەر بوو بە مایەی خەفەت و نیگەرانی، لەلایەن ژمارەیەک نەیارانی سوێندخواردووی کۆمەڵە وەکوو دەرفەتێک قۆزرایەوە و بێ لێکۆڵینەوە و بێ سێ و دوو دەستیان کرد بە درۆ و نەفرەت پژێنی و هاندان و چەپڵە تەقاندن بۆ دووبەرەکایەتی. لە حاڵێکدا خێری ئەم گرژی و ناخۆشیانە بەخڕی دەچێتە کیسەی کۆماری ئیسلامییەوە.
کۆمەڵە هەمیشە ئاڵاهەڵگری خەبات لەپێناو مافە نەتەوەییە ڕەواکانی گەلی کورد و پێشەنگی وەستانەوە بەدژی ڕژیمی کۆماری ئیسلامی بووە و باجەکەشی بە خوێنی گەشی هزاران ڕۆڵەی شەهید داوە. بست بە بستی ئەم کوردستانە شانۆی حەماسەی پێشمەرگەی کۆمەڵەیە، شار بە شار و گەڕەک بە گەڕکی ئەم نیشتمانەش شانۆی خەباتی مەدەنی و جەماوەری بە پێشەنگایەتی چالاکانی ماندوویی نەناسی کۆمەڵە بوون و هەن. ئاخرین نموونەشی بەشداری چالاکانە و شوێندانەر لە هەموو مەیدانەکان و هەموو بووارەکانی شۆڕشی ژینا بە دروشمی ژن، ژیان، ئازادییە.
حیزبێک و ڕەوتێک و گوتارێکی وەها ریشەداکوتاو و تاقیکراو، کە زۆر هەوراز و نشێوی سەختی بڕیوە و بەسەر زۆر کارەسات دا زاڵ بووە، ئەمجارەش بە تێکۆشانی بێ وچانی هەڵسووڕاوانی خۆی و بە هاوکاری دۆستان و دڵسۆزان، نەک هەر لەو گرفتە دێتە دەر، بەڵکوو بەهێزتر و بەتواناتر لە جاران دەوری مێژوویی خۆی دەگێڕێت.
داهاتوو نیشانی دەدا چ دەستگەلێک لە زەمینە خۆش کردن، دنەدان و خوڵقاندنی ئەوکارەساتەدا لەکاردا بوون، بەڵام با گلەیی لە دۆژمن نەکەین، حیزبەکەی خۆمان پتەوتر و کارامەتر و بێ کم و کووڕیتر بکەین.
پەیامی من بۆ هەموو تێکۆشەرانی کۆمەڵە لە شار و دێهاتەکانی وڵات، بۆ هەموو ئەندامان و پێشمەرگەکان و هەموو کۆمیتەکان ئەوەیە کە یەکگرتووتر و یەکڕیزتر لە هەمیشە دەسکەوتەکانی یەکگرتنەوە بپارێزن.
بانگەوازیشم بۆ ناوەندی هاوکاری و حیزب و لایەنە سیاسی و مەدەنییەکانمان داوای یەکگرتوویی زۆرتر و پتەوترمانە. بارودۆخمان زۆر هەستیارە و پیلانەکانی رژیم ڕووی لە هەموومانە.
تەنیا بە یەکگرتوویی و هاوهەڵوێستی دەتوانین سەرکەوتووانە، بەرەنگاریان بینەوە.
عەبدوڵلا موهتەدی، سکرتێری گشتی کۆمەڵە
یازدەی پووشپەڕی ۱٤٠۲ی هەتاوی
دووی ژوئیەی ۲٠۲۳ی زاینی
