پیلانی رژیم بۆ بەسیج گیری و ئەركەکانی وەستانەوەمان بەرامبەر بەم سیاسەتە


رفێق حسێن پەناهی



جم و جۆڵ و مانۆڕەكانی ئەمساڵی سپای پاسداران و دام و دەزگا ئیتلاعاتییەكانی رژیم لە كوردستان، سەرەتایەكی تازەیە لەلایەن رژیمی كۆماری ئیسلامییەوە بۆ بەرەو رووبوونەوە لەگەڵ مەترسی هەڵچوونی جەماوەریدا. بەپێی گەڵاڵەی نوێ، بەسیج دەورێكی چالاكتری لە كۆنترۆڵكردنی گەڕەكەكان و شوێنەكانی كاردا پێدەسپێردرێ. رژیم خۆی ئیدعا دەكات كە زیاتر لە 13 میلیۆن نەفەر لە رێكخراوی بەسیجدا ناونوسی كراون و لەوانە نیو ملیۆنیان بە ئۆستانی كوردستان نیسبەت دەدرێ. بەڵام هێندێك لە بەرپرسانی رژیم لێرە و لەوێ نایشارنەوە كە رێكخراوی بەسیج تەنیا توانای بەكارهێنانی یەك و نیو ملیۆن كەسی وەكوو بەسیجی هەڵسووراو هەییە. بۆ پارێزگای كوردستان و بۆ سەرجەم كوردستانیش ئامارەكە هەر ئەوەندە ئێعتباری هەیە كە بۆ سەرتاسەری ئێران هەیەتی و بێگومان بگرە كەمتریشە .

ئەوەی كە رێكخراوی بەسیج بەرامبەر بە لافاوی جەماوەری لە داهاتوودا چ دەورێك دەتوانێ ببینێ، زۆر جێگای گومان نییە. ئەم رێكخراوەیە وەكوو هەموو دامەزراوەكانی دیكەی رژیم بە ناوەڕۆك پووچەڵە و بەرامبەر شەپۆلی حەرەكەتی جەماوەر لە داهاتوودا ناتوانێ خۆی بگرێت، بەڵام ئەو لێكدانەوەیە بەو مانایە نییە كە ئەمڕۆكە هەموو لایەنەكانی ئەم پرۆژە دژ بە خەڵكییە نەبینین و رێگا و شوێنی پیویست بۆ پێشگرتن لە پەرەسەندنی نەگرینەبەر.

بەسیج لە ئەساسدا رێكخراوێكی چەكداری نیوە پیشەییە كە بە مەبەستی تەكمیلكردنی دامەزراوە سەركوتكارانەکانی رژیم هاتۆتە كایەوە. بەسیج لە هەمان كاتدا دام و دەزگایەكی پەرەپێدەری خۆرافات و دواكەوتووییە، لەهەر شوێنێك كە بۆنێك لە بیری پێشكەوتوو و زانستی بێت، مەدرەسە، زانكۆ، ئیدارە، كارخانە، كارگا، ئەم دەزگایە مەئمووریەتی ئەوەیە كە ئامادە بێت و زەبری خۆی بوەشێنێ؛ بەسیج دەزگایەكی سیخوڕییە كە دەستی بۆ هەموو شوێنێكی كار و ژیانی خەڵكی ئەو وڵاتە درێژ كردووە، ئەندامانی بەسیج وەكوو دەست و پێوەندەكانی وەزارەتی ئیتلاعاتی رژیم كار دەكەن، بەسیج رێگای پێدراوە كە دەست بەرێتە ناو هەموو بوارەكانی ژیانی تایبەتی ئینسانەكان و بنەماڵەكان. كاری بەسیج داسەپاندنی حیجابی ئیسلامی پێشگرتن بە هاوڕێیەتی كچان و كوڕان، راپورتدان و تەنانەت هێرشبردن بۆسەر كۆبوونەوەی شایی و زەماوەندەكانی خەڵك و بۆسەر نەوار و سی دێ فرۆشییەكان و دەیان ئەركی تری لەو چەشنەیە. لە پاڵ هەموو ئەو ئەركانەی كە پیێ سپێردراوە، بەسیج خاوەنی رێكخراوێكی چەكداری ڕاهێنراوە كە بەهەموو جۆرە چەك و ئامرازێكی سەركوت تەیار كراوە. بەسیجیش وەكوو سپای پاسداران مافیایەكی ئابووری بەهێزی پێكهێناوە كە لە پاڵ مافیاكانی وەكوو بۆنیادی مۆستەزعەفین و ئاستانی قودسی رەزەوی یەكێك، لە دامەزراوە هەرە بەهێزەكانی ئابووری ئێرانە.

جەماوەری خەڵك لە ئێراندا بەسیج وەكوو یەكێك لە ئامرازەكانی دەسەڵاتی كۆماری ئیسلامی حیساب دەكەن و ئەو ناوە و ئەو ئیدعایەی كە لەمەڕ ژمارەی ئەندامانی دەكرێت جگە لە پڕ و پاگەندەیەكی رەوانی بەشتێكیتری نازانن .

"بەسیج گیری" سیاسەتێكە كە لە كوردستانیشدا بەڕیوەدەچێت. تەشكیلاتی بەسیج لە كوردستانیش وەكوو باقی شوێنەكانی دیكەی ئێران، یەكێك لە ئامرازەكانی سەركوتی خەڵكە لەلایەن كۆماری ئیسلامییەوە. هێزی بەسیج لە كوردستانیش بەشێكیان پیشەیین و بەشێكیشیان لەگەڵ ئەوەشدا كە ژیانی ئاسایی دەكەن، دەبنە ئەندامی بەسیج. پایگاكانی بەسیج لە گەڕەكەكان، لە مەدرەسەكان و ئیدارەكان و زۆربەی ئاواییەكاندا دامەزراون. بەگەلێك شێوەی وەكوو بەڵێنی ناردنی خوێندكاران بۆ زانكۆ، بەڵێنی زەمین و ماڵ پێدان، دانی جیرەی خواردەمەنی و كەل و پەلی ناو ماڵ، حەقدەستی مانگانە بۆ ئەوانەی دەبنە بەسیجی هڵسووڕاو، هەر وەها بە زەخت دانان و هەڕەشەكردن، هەوڵ دەدەن ژمارەیەكی هەرچی زۆرتر لە خەڵك بخەنە ریزی رێكخراوی بەسیجەوە  .


ژومارەیەكی زۆر لە ئەندامانی بەسیج لە كوردستانیش وەكوو هەموو ئێران كەسانێك نین كە لە رێگەی بیر و باوەڕەوە جەزبی ئەو دەزگایە بووبن، بەڵكوو بە مەبەستی دیاریكراو لەلایەن رژیمەوە بەكرێ دەگیرێن و جەماوەریش هەروەها حیسابێكیان بۆ دەكات و ژمارەیەكیش لەژێر هەڕەشەی لەسەر كار دەركردن دەكێشرێنە پای هاوكاری لەگەڵ رژیم. یەكێك لەو فریوكارییەكانی كە سازماندەران و رێكخەرانی بەسیج گرتوویانەتە بەر ئەوەیە كە بەسیجیان بە ناو دابەش كردووە بەسەر دوو چەشندا: بەسیجی فەعال و بەسیجی نافەعال. مەبەسیتیان ئەوەیە كە ئەو كەسانەی وا دوو دڵ و ڕاڕان، سەرەتا بەناوی بەسیجی نافەعالەوە ناونووسی بكەن و دواجار وردە وردە فێری ئەركی خراپیان بكەن و رێگای گەڕانەوەیان لێ ببەستن و بیانكەن بە بەسیجی فەعال.

هەركەس بە هەر بیانوویەكەوە بەم تەشكیلاتە پەیوەست بێت بەكردەوە خۆی لەریزی خەڵك جیا كردووەتەوە و جێگای خۆیەتی کە لێرەدا ئاماژە بەو خاڵە بکەین کە ئەو کەسانەی کە بەسیجی نافەعالن ئەگەر ئەگەر لەسەرەتادا بیریان لە بەسیجبوونی خۆیان و بەدواهاتەکانی نەکردووەتەوە و لەژێر زەختدابوون یان بەهەر هۆیەك بە هەڵەدا ڕۆشتوون، دەتوانن هەرچی زووتر لێی پاشگەز ببنەوە. پێویستە هەموو لایەنەكانی ئەم پیلانەی رژیم پوچەڵ بكرێتەوە و رێگە نەدرێ كە ئەم تەشكیلاتە دژەخەڵكیە لە كوردستاندا پەرە بستێنێ.



دیارە ئەم پەدیدەیە تازە نییە و ئەم پیلانانەی رژیمیش ناسراوە بۆ كۆمەڵانی خەڵكی كوردستان و پتر لە سێ دەیە خەڵكی كوردستانی رۆژهەڵات بەرەنگاری ئەم پیلانە دزێوانەی ئەم رژیمە دیكتاتورە دەبنەوە. ئەوەی پێویستە، هەڵمەتێكی گشتگیرتر و هەمەلایەنەیە لەلایەن كۆمەڵاتی خەڵكی كوردستانەوە دژی ئەم سیاسەتە و بۆ جارێكیتر ئەم بەرەنگاریە دەستپێبكاتەوە و زەروورەتی دووبارەی ئەم بەرەنگاریەش لەوەوە سەرچاوە دەگرێ كە رژیم لە هەژاری و خراپی ئەو بارودۆخە ئابووریە كەڵك وەردەگرێ و دەستی كردووە بە كرێگرتن و بەسیج گیری لە كوردستان

.

كوردستانی رۆژهەڵات لێوانلێوە لە تۆڕەیی و شەقامەكان و شاخەكان بووە بە جێگەی ململانی رژیم و هێزە سیاسی و مەدەنی و كولتوورییەكان؛ بزووتنەوە كۆمەڵایەتییەكان لە قاڵبی جۆراوجۆردا رۆژانە ناڕەزایەتی دەردەبڕن و خەبات دەكەن. ناڕەزایەتی خەڵك لە دژی ئەم دیكتاتورە لە لایەك و گەشە سەندوویی زیاتری خەڵك لە ئاست كێشە سیاسی و نەتەوەییەكانیدا لە كوردستان پەرەی سەندووە و ئەم بزووتنەوانە وەكوو بۆركانێك لەژێر زەمینی كوردستاندا هاتووچۆ دەكات و هەر جارە و لە شوێنێك سەر هەڵدەدات و بێگۆمان درەنگ یان زوو بە یەكجاری دەتەقێتەوە. رژیم باش هەستی بەم پۆتانسێلە كردووە لە كوردستاندا هەر بۆیە بەهەموو هێزی مادیی خۆییەوە هەوڵ دەدات لە رێگەی چاندنی سیخۆڕ و بەسیج و هێزگەلێك كە بتوانن بە شێوەی شاراوە و نیوە شاراوە و ئاشكرا لە پەنای خەڵك بن و پێش بەو خرۆشانە جەماوەریانە بگرن. لێرەوە، ئەركی تازەی خەڵك و بەتایبەتی نەوەی نوێی كوردستانە كە لەهەر رێگەیكەوە كە گۆنجاو بێت و بۆیان بکرێت هەوڵی ووشیاربوونەوە لەم سیاسەتانە بدەن و بەرەنگاری ئەم پیلانانە ببنەوە؛ لە تۆڕە كۆمەڵایەتیەكان و بەگشتی ئەو ئامرازانەی كە ئێستا لەبەردەست دایە كەڵك وەربگیردرێت بۆ زانیاری بڵاوكردنەوە و لە قاودانی سیاسەتە دزێوەكانی رژیم بەگشتی و بەتایبەتی سیاسەتی بەسیج گیری لە كوردستان



.


ئه‌م بابه‌ته 1902 جار خوێنراوه‌ته‌وه‌‌

PM:09:41:02/11/2016


زۆرترین خوێندراو