ئینسانە شۆڕشگێڕەكان و شەهیدانی 2ی پوشپەڕ

رەفێق حوسەین پەناهی

زۆر دژوارە بتەوێ لە سەر ئینسانگەلێك كە نزیكن لێت  بنووسی و لە هەمانكاتیشدا سۆز بە سەرتدا زاڵ نەبێت. خۆ دەبێت جیا لەو پەیڤ و نووسینانەی لەناو سینە و دڵی پڕ لە زام و سۆزی دڵسۆزانەوە بە فرمێسك و هەناسەی تاساویانەوە لە بارەی ئەم ئینسانگەلەوە بنووسرێ، هەڵوەستەش لەسەر دیوی واقعی و پڕ لە سەروەری و ئەزموونی ناوازەیانەوە بكەین كە دواجار ئەمە بەشێكیشە لە مێژووی گەلەكەمان و پێویستە بخرێتە سەر كاغەز و لە لاپەڕەكانی مێژوودا دایبنێین. ئەم هەموو سووتان و بۆنی كڕووزی هەناوی ئەم میلەتە بۆ لە دەستدانی ئەم قارەمانانە خۆ لە خۆڕا نییە، وەك چۆن هەروا بە سانایی درووست نەبوونە و نەبوون بەنموونە لە گیانبازی و خۆنەویستی بۆ ئازادی خاك و ئازادی و دادپەروەری و رزگاری گەلەكەیان، بۆیە هێندەیان هەیە بتوانی دەیان جار لە سەریان بنووسی بێئەوەی هیچ زێدەڕەوییەك بكەی، یان پەنا بۆ سۆز ببەی.
ژینگەی داگیركاری و ستەم، كۆت و بەندكردن، ئینسانی ئازا بەرەو یاخیبوون و بەرگری لە نیشتمانەكەی و رزگاركردنی خاكەكەی ئاراستە دەكات، بەڵام هەمیشە شۆڕش و ئارمانە ئەم یاخیبوونە رێكدەخات و قارەمانەكانیش پەروەردە دەكات و ئازایەتییان و بیری شۆڕٍشگێڕیانە ئاوێتە دەبن و ئاراستەی شۆڕش راستتر دەڕوات. ئەگەر بۆ هەموو بوارەكانی ژیان زانكۆ و فێرگەی رەسمی و ئاكادمیا هەبن بۆ ئەوەی كاراكتەری تایبەتمەند و پسپۆر پێ بگەیەنن، خۆ بۆ پێگەیاندنی شۆڕشگێڕی راستەقینە جگە شۆڕش و قاڵبوون و تاڵییەكانی ژیان هیچیتر بوونی نییە .
ئینسان و تاكی كورد هەموو كات هەوڵی ئەوەی داوە كە لە ژیاندا سەربەرزانە تەمەن ڕابوێرێت و پشت بە تەنگ و چەڵەمەكان بچەمێنێت و خۆی وەك رەوەز لەسەر پێ بوەستێت. هەر ئەم خسڵەتەش بۆتە هۆی ئەوەی كە بە درێژایی مێژوو لە بەرامبەر دژوارییەكانی ژیان و زەخت و ئاستەنگەكانی سەردەمداران بوەستێت و پارێزگاریی مان و هەبوون بێت. لەو نێوەدا ئەگەرچی دوژمنان و نەیارانی ئەم نەتەوەیە هەموو كات هەوڵیان داوە كە ئەو نەچەمینە تێك بشكێنن و ئینسانی دەستەمۆ لە تاكەكانی ئەم گەلە درووست بكەن، بەڵام هەموو كات لەگەڵ ورەی پۆڵایینی شۆڕشگێڕانی ئەم گەلە بەرەوڕوو بوونەتەوە و پیلانەكانیان بۆتە بڵقی سەر ئاو.
گیانبەختكردوانێكی شۆڕشگێڕ كە ئەم ئەركە پیرۆزەیان گرتە ئەستۆ و ئەو ئینسانە خۆنەویستانەی بە درێژایی مێژوو دەیان ئاوات و ئارەزووییان وەلا نا و لەپێناو ژیانی شیاوتر و ئینسانیتر و رزگاری نەتەوەكەیان هاتنە مەیدان؛ چەك لە دەست و وەرە بەرز و باوەڕ جوان گیانی ئازیزیان كردە پردەبازی رووناكیبەخشی وەدیهێنانی داهاتوویەكی گەش. ئەو ئیسنانە شۆڕشگێڕانەی راگرتنی قامەتی بەرزی نیشتمانەكەیان لە سەرەوەی هەموو بەهاكان دانا و سەركەوتن و ئازادی و ئیسنانیەت و ژیانێكی شیاوی سەردەمیان كردە بیرۆكەی تێكۆشان و لە پێناویدا ئازیزترین سەرمایەی ژیانیان بەختكرد. لە درێژەی ئەم كاروانەدا 2ی پوشپەڕی ئەمساڵ پولێك پێشمەرگەی كۆمەڵە لە شاری سنە گیانیان بەختكرد، ئەم گیانبختكردووانە دیسان وانەكەی گوردانی شوان و هەزاران گیانبخكردووی كۆمەڵەیان دووپات كردەوە كە ئەگەر تەسلیمی عەقڵی بە هێزی ئەبزاری و مەنتێقی حەسابگەر بوونایا، ئێستا كورد و بزووتنەوەی شۆڕشگێڕانەی رۆژهەڵات بەتەواوی توابووەوە و لە رۆحی شۆڕشگێڕانە داماڵڕابوو.
ئەوان لێیان ڕوون بوو و دەیانزانی كە لە بەردەم بڕیارێكی دژواردان، بڕیارێكی پڕ لە ژان و ئێش، بڕیارێك كە تەنیا گرێدراوی ژیانی خۆمان نییە كە بەئاسانی بەرپرسایەتییەكەی وەئەستۆ بگرین و مەرگی خۆمان لە باوەش بگرین بەڵكوو بڕیارێكە كە پێوەندیی بە ژیانی هەموومان و نەمانی ئەم رۆحە شۆڕشگێڕانەیە لەنێو گەڵەكەیاندا، بۆیە ئەو وانەیە كە حامێد و بهزاد و سەباح لە بەردەم ئەو قۆناغە سەختەدا بۆمان دووپات دەكەنەوە ئەوەیە كە ئەگەر تاك بە تاكی ئێمە یەك لە دوای یەك لەسەر خاكی كوردستان خوێنمان بڕژێت باشترە لەوەی تاك و رێكخستن و پێكهاتەیەكمان بۆ بمێنێتەوە كە شەرمەزاری مێژووی گەلێكی زۆڵم لێكراو بین. ئەم وانەیەیە كە منی هاوڕێ و هاوسەنگەریان كاتێك هەواڵی گیانبختكردنیان دەبیستم چركە بە چركەی كۆتاییەكانی ژیانیان بهێنمەوە بەر چاوی خۆم كە حامێد و بهزاد و سەباح دەبینم باس لەو وانەیە دەكەن و لەبەرخۆیانەوە دەیڵێنەوە كە ئەوە وانەی ژیان و مەرگی شۆڕشگێڕییە؛ ئەو وانەیە كە منی هاوسەنگەر و دەیان و سەدان كچ و كوڕی ئەو كوردستان و نەتەوەكەم هەڵدەستێنێتەوە سەر پێ. هەر بۆیە مەرگی ئەوان خەمگینم ناكەن، بەڵكوو قیبلەنمایەكن بۆ من و هەزاران لاوی خەباتكاری كوردستانی رۆژهەڵات كە رێگاكەمانی پێ بدۆزینەوە .


ئه‌م بابه‌ته 632 جار خوێنراوه‌ته‌وه‌‌

PM:07:49:09/09/2017


زۆرترین خوێندراو