وەك مێژوومان لە ئایندەشدا پێشڕەو دەبین

رەفێق حوسەین پەناهی


وەك مێژوومان لە ئایندەشدا پێشڕەو دەبین
بەرەو پێشوازی26ی رێبەندان ساڵڕۆژی خەباتی ئاشكرای كۆمەڵە



لە ڕۆژی 26ی رێبەندانی ساڵی 1357ی هەتاویدا، ئێران و كوردستان شاهیدی ئاشكرابوون و هاتنە مەیدانی ڕێكخراو و ڕەوتێك بوون كە بەهاتنیان بۆنێو پانتای خەبات و تێكۆشان توانی رێگەی نوێ و گونجاو ئاراستە بكات و لە هەمانكاتدا رێچكەی نوێ بنیات بنێن لە خەباتی بزووتنەوەی شۆڕگێڕانەی كوردستاندا، رێكخراوێك كە بەرهەمی سەردەمێكی پڕ لەگۆڕانكاری لە ئاستی جیهان و ناوچە و لە ئێران و كوردستان بەتایبەتی،  هێزێك كە لەگەڵ ئاشكرابوون و دەركەوتنیدا، توانی ببێتە رابەر و رێنوێنیكەر و ئەندازیاری رێبازێكی تازە و سەردەمیانە لە كوردستاندا. بێگومان بزووتنەوەی كورد لە كوردستانی ئێراندا پێش هاتنی كۆمەڵە بۆنێو گۆڕەپانی خەبات جۆرێك لە حیزبایەتی بوونی هەبوو بەڵام ئەو شێوازە و ئەو مێتودانەی رابردووی خەبات لە كوردستاندا وەڵامدەرەوەی خواستی هەموو لایەن و چین و توێژەكانی كۆمەڵگای كوردستان نەبوو، ئەگەر تا ئەو سەردەم زیاتر توێژ یان چینێك یان خەڵكانێكی ئاسایی خەباتیان كردبوو، بە هاتنی كۆمەڵە نوخبەكان و ڕوناكبیران و نووسەرانی كوردستان و چین و توێژەکانی دیكە شانبەشانی خەڵك لە خەبات بۆ دێمۆكراسی و دادپەروەری و رەهایی ئینسان لە زۆڵم و زۆر بەشداری بكەن .

ئەم هێزە بە ئیبتكار و بیرتیژی كۆمەڵێك خوێندكار و روناكبیر كە لە زانكۆكانی ئێراندا لە پەنای خوێندندا دید و ڕوانینیان بۆ داهاتوو و خوێندنەوە بۆ سەردەمی خۆیان، هەستیان بە بۆشایكی گەورە كرد و زەینیان كەڵكەڵەی درووستکردنی حیزبێك بوو كە ببێتە زەرفێك بۆ ئینسانە ئازادیخوازەكان و موبارزەكان، لێرەدایە كە لەساڵی 1348ی هەتاویدا جەرەقەی ئەم ڕەووتە لێدەدرێت. كۆمەڵە پاش نۆ ساڵ كاری پڕاوپڕ لە تێكۆشان بەنهێنی لەنێو دڵی ئیستبدادی رژیمی پاشایەتیدا بەردی بناغەی حیزبێكی تازەی نایە سەر یەك، كە دواتر بە دوای شەهیدبوونی یەكێك لە رابەرانی ئەم هێزە (كاك حەمە حسێن كەریمی) لە 26ی رێبەندانی ساڵی 1357 خۆی ئاشكراكرد. ئاشكرابوونی هێزێكی وەك كۆمەڵە لەكۆمەڵگای ئەو سەردەمی كوردستاندا، كە بە بیریكی تازە و پێشكەوتنخواز و چەپ تا رادەیەك نامۆ بوو، بەڵام بە تێكۆشان و هێنانی كولتوورێكی تازە بۆنێو خەباتی رزگاریخوازانەی كوردستان و هەروەها هەوڵ بۆ بنیاتنانی كۆمەڵێك كولتووری نوێی سیاسی و كۆمەڵایەتی لە ئاستە جۆربەجۆرەكاندا و بە فیداكاری و لەخۆبردوویی و راستگۆیی و كۆمەڵێك بەهای ئینسانی و پرنسیپ، بە درووستكردنی یەكێتی جووتیاران و جەمعییەتەكان و هەروەها هاندانی خەڵك بۆئەوەی بتوانن خۆیان لەچوارچێوەی ئەو رێكخراوانەدا سازمان بدەن و چالاكی بكەن، ئەم كارانە و خۆشناوبوونی رابەران و كادرەكان و ئینسانە باشەكان، كە لەدەوری كۆمەڵە كۆببوونەوە، توانی ئەم هێزە لە رێكخراوێكی چكولەوە بە خێرایی ببێت بە هێزێكی جەماوەری و گەورە و جێمتمانەی كۆمەڵانی خەڵكی كوردستان. كۆمەڵە وەكوو هێزی بزووتنەوە كۆمەڵایەتیەكان، هەر ئەو كات نیشانیدا كە بەڕەچاوكردنی سیاسەتی درووست، توانایی وەڕێخستنی كۆبوونەوە و میتینگی ئیعترازی گەورەی هەیە و بە رێكخستنی چەند حەرەكەت لە شارەكانی كوردستان و رابەرایەتیكردنی شەڕی 24 رۆژەی شاری سنە، سەلماندی كە ئەم حیزبە جیاواز و تازەیە دەبێتە رابەر و پێشڕەویی بزووتنەوەی شۆڕشگێڕانەی كوردستان.

لەپەنای ئەمانەدا یەكێكی دیكە لەو كارە گرنگانەی كۆمەڵە لە كوردستاندا هەوڵی بنیاتنانی دا، هێنانی ژنان بوو بۆ نێو ریزەكانی خەبات و تێكۆشان، كە هەمووان ئەوە دەزانن لەو سەردەمەدا و بەو هەموو ئاستنگانەی سەررێگا لەڕووی كولتووری و بافتی كۆمەڵایەتی و تەنانەت تەبلێغی خراپ و بەدوور لە ئیسنانیەتی دوژمنان و خراپتریش نەیارانی كۆمەڵە، ئەم هێزە تێكەڵكرا و یەك خەبات و یەك ئاراستەی پێدرا و شانبەشان لە سەنگەردا رێكیخستن .كۆمەڵە بە هەڵبژاردنی ئەم ئاراستە درووستە لە شێوازی حیزبایەتیدا، بەمێتودی تازەوە توانی نەك هەر ژنان، بەڵكو سەرجەم چین و توێژگەلێك لەوانە، كرێكاران و خەڵكی هەژار و فەقیر و زەحمەتكێش و هەتا دوای، لە دەوری یەك ئامانج كۆبكاتەوە و سەرەنجی بەلای خۆیدا رابكێشێت. بەمجۆرە بوو كە لە ماوەیەكی كورتدا بەدوای ئاشكراكردنی خەباتی خۆی ڕووبەڕووی پێشوازیەكی بێوێنەی جەماوەری خەڵكی كوردستان بووەوە؛ ئەم پێشوازییە و ئەم رووتێكردنەی جەماوەری بەرینی كۆمەڵگای كوردستان، بەرهەمی خەباتی كادرەكان و سەرجەم هەڵسوڕاوانی ئەو كاتی كۆمەڵە بوو كە بە خوێندنەوی درووست و سیاسەتی شەفاف و هەڵوێستی بوێرانە لە بەرانبەر هێزە دواكەوتووەكان و كۆنەپەرەستەكانی ئەو سەردەمەدا ببنە هێزێكی جێ متمانە بۆ قوناغەكانی دواتر.
قوناغی دووهەمی مێژووی پڕ لە شانازی و پڕ لە سەروەریی و زێڕینی درووستكردنی هێزێكی چەكداری خاوەن بڕوا و بە دیسیپلینێكی پۆڵاین، كە نە تەنیا هێزێكی چەك لە شان، بەڵكوو وەك هێزێكی خاوەن بیر و باوەڕی سیاسی كە بە بیری نوێ و ئیستدلالی عەقڵی و لۆژیکی و هەستێكی پاك و وەرەیەكی قایم و شەڕكەرێكی خاوەن تاكتیك و ئیستراتێژ
یك پێی نایە خەبات لە دژی داگیركەران. كە دواترەكان لەمەیداندا نیشانیاندا كە ئەم هێزە لەهەموو ڕوویەكەوە جیاواز و پێشڕەوە، هەر بۆیە بەخێرایی سەرەنجی نەك خەڵكی كورد، بەڵكوو بانگەوازی گەیشتە گوێی ئازادیخوازانی سەرتاسەری ئێران، كە دواترەكان بە بەشداری دەیان كەس لە ریزی هێزی پێشمەرگەدا گیانیان بەختكرد، پێبەند بوون بە یاسای شەڕ، بەرخوردی درووست بە گیراوانی شەڕ، تاكتیكی تازە و بەكارهێنانی فەن و فنوونی نوێ لە گرتنی بنكە و مەقڕەكانی رژیم و خۆڕاگری و تا دواهەناسە شەڕكردنی ئەم هێزە دوژمنانیشی سەرسام كردبوو.

سەردەمی بووژاندنەوەی كۆمەڵە و هاتنەدەر لە حیزبی كومنیستی ئێران، پاش ساڵها دەستەوەستان و كزمانەوە و نوشستی ساڵانێك، بۆ جارێكتر  كۆمەڵە هاتەوە مەیدان و بە بیری نوێ و پرۆژەی نوێ و پرۆگرامی نوێی باوەشی جەماوەری بۆ كرایەوە و شەپۆلێكی گەورەی ڕووتێكردن لە نەسڵی نوێ و لەو جەماوەرە دانیشتووە و دەستەوەستانە دەستیپێكردەوە، وێڕای ئەمانە پێشوازییەكی بەرینی كۆمەڵایەتی و سیاسی خەڵكی لێكەوتەوە، هەموو ئەمانەش بەرهەمی لێكدانەوەی درووست، ڕەچاوكردنی سیاسەتی شیاو و گونجاو و سەردەمیانە بوو، بە هەڵكردنی ئاڵای كوردستان و هەڵبژاردنی دروشمی فێدرالیزم وەكوو رێگە چارەیەكی گونجاو بۆ چارەسەری كێشەی گەلان لە ئێراندا، پیشنیاری درووستكردنی بەرەی كوردستانی بۆ حیزبە رۆژهەڵاتییەكان و پیشنیاری چەترێك بۆ كۆكردنەوەی هێزە ئازادیخواز و دێمۆكراتەكانی ئوپۆزسیونی ئێران بەگشتی، لە پەنای ئەمانەشدا بووژاندنەوەی سەرلەنوێی خەباتی پێشمەرگانە، جارێكتر كۆمەڵە بووەوە بەهێزە پێشڕەو و رابەرەكەی بزووتنەوەی شۆڕشگێڕانەی گەلی كورد لە كورستانی رۆژهەڵات .

گومان لەوەدا نییە كە هەر هێزێك لە كوردستان بێگرفت و بێهەڵەش نەبووە، كۆمەڵەش وەكوو هێزێكی پێشڕەو لە هەندێك قوناغی مێژوویدا تووشی گرفت و هەڵەش هاتووە، بەڵام بە خۆشحاڵییەوە پاش 38 ساڵ خەباتی ئاشكرا، سەرەڕای ئەوەی ناوچەكە پڕ لە ئاڵوزی و لە هەمانكاتیشدا گۆڕانكارییە، سەرەڕای ئەوەی كە تاقە یەك دەرفەت كە بە قازانجی بزووتنەوەی كورد لە كوردستاندا نەهاتووەتە ئارایەوە، وێڕای ئەوەی كە رۆژ لەگەڵ رۆژ دوژمنی داگیركەر پڕچەكتر و لەڕووی سەربازی و ئیتلاعاتییەوە بەهێزتر بووە، سەرجەمی چەند ساڵی رابردوو لەپەنای ئەو ركوودە سیاسیە لە كوردستاندا هەبووە، لەپەنای ئەوەی كە حیزبەكانی رۆژهەڵات لەگەڵ گرفتی تەشكیلاتی و سیاسی و ئابووری و ئەمنییەتیی ڕووبەڕووبوونەتەوە، بەڵام ئەوە كۆمەڵە بوو كە بە سیاسەتی درووست و هێنانەئارای گوتاری رۆژهەڵات تەوەری و پیشنیاری بەستنی كونگرەی رۆژهەڵات و پیشنیاری كاری هاوبەشی نیزامی و درووستكردنی ژوورێكی فەرماندەیی و دانانی تلفزیونی هاوبەش و سەرلەنوێ هاندانی لایەنەكانی رۆژهەڵات بۆ درووستكردنی بەرەیەكی كوردستانی و كۆمەڵێك كاری لەو شێوە كە لە پەنای چالاكییە حیزبییەكان، لەوانە حزووری زیاتری چالاكی پێشمەرگانە، پشتیوانی و هاندان و رابەرایەتیكردنی بزووتنەوە ئیعترازییەكان لە كوردستان و بەتایبەتی لە مەریوان و سنە و هەندێك شاری دیكە، چالاكی بەربڵاو و گرتنەبەر شێوازگەلێكی جۆراوجۆر لە تەبلیغات لە بۆنە حیزبییەكاندا، دیپلۆماسیەكی بەهێز لە ئاستی ناوچەیی و جیهانیدا كە هەوڵدرا كەیسی رۆژهەڵات لەژێر سێبەری هژموونی بەشەكانی دیكە ون نەبێ و بەرچاو بكەوێت، كۆی ئەمانە جارێكیتر كۆمەڵەی كردووەتەوە پێشڕەو، بەڵام لە راستیدا بە لەبەرچاوگرتنی ئەوەی كە چارەنووسی كوردی روژهەڵات و بزووتنەوەكەی لەم ناوچە ئاڵوزەدا هێشتا دیار نییە بە كام باردا دەكەوێت، نیشانەگەلێك بەپێی ئەوەی كە لەم ساڵانەدا بزووتنەوە كۆمەڵایەتییەكان وەكوو بوركان لەژێر زەمینی كوردستانی رۆژهەڵاتدا هەرجارە و لە شوێنێك خۆیان نیشان دەدا، فەقیری و بێدەرەتانی و ماڵوێرانی كۆمەڵایەتی بەرۆكی بەخەڵك گرتووە و ئاستی ناڕەزایەتییەكان لە كۆمەڵگای كوردستان و ئێراندا بە ڕادەیەك گەیشتووەتە كە هەر ئان چاوەڕوان دەكرێ خرۆشانێك لە دژی ئەم رژیمە بێتە ئاراوە، ئەمە وێڕای ئەوەیە كە كۆمەڵگای نێونەتەوەیش زیاتر لەجاران وەزاڵە هاتوون لە سەرپێچی و جموجۆڵە تێرۆریستیەكانی ئەم رژیمە لە ناوچەكە  و دەستێوەردانەكانی، كە وەكوو جاڵجاڵۆكە لاقی بڵاوە پێكردووە لە زۆربەی وڵاتانی رۆژهەڵاتی ناوەڕاستدا. كۆی ئەمانەش نیشان دەدات كە ئەم باروودۆخە پێویستی بە حیزبی پێشڕەوە هەیە بۆ ئەوەی بە باشترین شێوە هەلەكان بقۆزێتەوە و هاندەر و رابەری هەڵسانی خەڵك بێت و بەگژی ئەم رژیمەدا بچێتەوە. بەشێكی زۆری ئەم ئەركە كەوتووەتە سەرشانی كۆمەڵە، كەوابوو با وەكوو مێژوومان لە ئایندەشدا پێشڕەو بین .










ئه‌م بابه‌ته 2427 جار خوێنراوه‌ته‌وه‌‌

AM:11:34:08/01/2017


زۆرترین خوێندراو