دەقی وتەکانی هاوڕێ «بەختیار عەلیار» بە بۆنەی پەیوەست بوونی پۆلێکی دیکە لە لاوانی کوردستانی بە ڕیزی هێزی پێشمەرگەی کۆمەڵەوە

دەقی وتەکانی هاوڕێ «بەختیار عەلیار»
 بە بۆنەی پەیوەست بوونی پۆلێکی دیکە لە لاوانی کوردستانی بە ڕیزی هێزی پێشمەرگەی کۆمەڵەوە
بەشداربووانی خۆشەویست
ئەندامانی سەرکردایەتی کۆمەڵە
کادر و ئەندام و پيشمەرگەکانی کۆمەڵە
بەناوی سەرکردایەتی کۆمەڵەوە بەخێرهاتنتان دەکەم بۆ مەڕاسمی چەکدار بوونەوەی پۆلێکی دیکە لە کچان و کوڕانی شۆڕشگێڕ، ئازادیخواز و خوێنگەرمی کوردستانی ڕۆژهەڵات لە ژێر ناوی پەلی شەهید ڕامین حسێن پەناهی و پەیوەست بوونیان بە ڕیزی پڕ لە شاناز هێزی پێشمەرگەی کۆمەڵە.
هاوڕێیانی خۆشه‌ویست هه‌ر وه‌ك هه‌مووان ئاگادارن و به‌ دڵنیاییه‌وه‌ ته‌عقیبی ڕۆژانه‌ی بارودۆخی هه‌ستیاری جیهان، ناوچه‌كه‌ و ئێران و ڕۆژهه‌ڵاتیش له‌م سه‌رده‌مه‌دا ده‌كه‌ن، ده‌زانن كه‌ بزووتنه‌وه‌ی كوردستانی ڕۆژهه‌ڵات به‌گشتی و كۆمه‌ڵه‌ش به‌ تایبه‌تی هه‌لێكی مێژوویمان بۆ هه‌ڵكه‌وتووه‌. هه‌لێك كه‌ بۆ ئێمه‌ و هه‌موو دژبه‌رانی كۆماری ئیسلامی بێ وێنه‌یه‌.
حكوومته‌ی كۆماری ئیسلامی گیرۆده‌ی قه‌یران گه‌لی جۆراوجۆره‌. له‌ بواری ئابووری ئێمه‌ شاهیدی داڕمانی ئابووری ده‌ره‌نجامی سیاسه‌تی ئابووری هه‌ڵه‌ی به‌رپرسانی ئه‌م وڵاته‌ له‌ لایه‌ك و گه‌نده‌ڵی و دزی و ڕانتخۆری هه‌ر ئه‌و به‌رپرسانه‌ له‌ لایه‌كی دیكه‌وه‌ هۆكارگه‌لی سه‌ره‌كی ئه‌و بارودۆخه‌ن كه‌ ئێستا به‌داخه‌وه‌ خه‌ڵكی به‌شمه‌ینه‌تی ئێران و به‌ تایبه‌تی خه‌ڵكی فه‌قیر و هه‌ژاری ئێرانی زیاتر له‌ هه‌میشه‌ خستۆته‌ قه‌یرانه‌وه‌ و له‌ ژێر گوشارێكی مه‌عیشه‌تی تاقه‌ت پروكێن دان.
ئیعدام و زیندان و زه‌بر و زه‌نگی حكوومه‌ت به‌ دژی خه‌ڵكی ئێران به‌ تایبه‌تی خه‌ڵكی كوردستان درێژه‌ی هه‌یه‌ و ڕۆژانه‌ زیاتر ده‌بێت و حاكمییه‌ت به‌ دڕێژایی مێژووی خۆی ئه‌و ئامرازانه‌ وه‌ك ڕێگه‌ چاره‌سه‌رێكی سه‌ره‌كی بۆ مانه‌وه‌ی خۆی له‌ سه‌ر حوكم و ده‌سه‌ڵات بینیوه‌.
ماجه‌راجۆیی ئه‌م ڕژیمه‌ له‌ ناوچه‌كه‌ و جیهان یه‌كێكی تر له‌و گرفتانه‌یه‌ كه‌ بۆته‌ هۆكاری په‌راوێزكه‌وتنی زیاتری ئه‌م ڕژیمه‌ له‌ ناوچه‌كه‌ و جیهان و تا دێت په‌یوه‌ندی وڵاتانی ناوچه‌كه‌ به‌ دژی كۆماری ئیسلامی گه‌رمتر و زیاتر ده‌بێت و مه‌ترسی سیاسه‌تی زێده‌خوازانه‌ و ئێمپێریالیستی كۆماری ئیسلامی زیاتر هه‌ست پێ ده‌كرێت.
ناڕه‌زایه‌تییه‌ جه‌ماوه‌رییه‌كان تا دێت په‌ره‌ده‌ستێنێت و تا زیاتر به‌ عومری ئه‌م ڕژیمه‌ زیاد ده‌كات، ناڕه‌زایه‌تی خه‌ڵكیش ڕوو له‌ هه‌ڵكشان ده‌بێت. ناڕه‌زایه‌تییه‌كانی چه‌ند مانگی ڕابردووی ئێران له‌ بواری پانتایی جوگرافیاوه‌ زۆرتر به‌ربڵاو بۆته‌وه‌ و له‌ بواری به‌شداریشه‌وه‌ چین و توێژی جیاوازی به‌ خواستی جیاوازه‌وه‌ تێیدا به‌شدار بووه‌. ڕاپه‌ڕینی كرێكاران، ناڕه‌زایه‌تی ژنان، ڕابوونی موعه‌لیمان و هتد… تا دێت ڕوو له‌هه‌ڵكشانه‌ و به‌ره‌ به‌ره‌ تا دێت ناڕه‌زایه‌تییه‌كان به‌ربڵاوتر ده‌بن و ژماره‌یه‌كی زیاتر به‌ ده‌ریای ناڕازیانی جه‌ماوه‌ری په‌یوه‌ست ده‌بن.
له‌م بارودۆخه‌ دایه‌ كه‌ ڕه‌ساڵه‌تی مێژووی هێزێكی شۆڕشگێڕی وه‌ك كۆمه‌ڵه‌ زیاتر له‌ هه‌میشه‌ خۆ ده‌نوێنێ و ئه‌ویش هیچ نییه‌ جگه‌ له‌ پشتیوانی هه‌مه‌لایه‌نه له‌ خه‌ڵكی هه‌ژار و فه‌قیر و به‌شمه‌ینه‌تی ئێران و كوردستان به‌ تایبه‌تی. هێزی پێشمه‌رگه‌ی كۆمه‌ڵه‌ كه‌ به‌ درێژایی مێژوو پڕ له‌ شانازی و سه‌روه‌ری خۆی هه‌رده‌م توانیویه‌تی ئه‌م ئه‌ركه‌ پیرۆزه‌ی خۆی به‌ باشی به‌ جێ بگه‌یه‌نێت و ببێته‌ جێگه‌ی هومێد و متمانه‌ و دڵپێبه‌ستنی هه‌موو خه‌ڵكی كوردستانی ڕۆژهه‌ڵات. فیداكاری و ده‌ستپاكی و داوێنپاكی و خۆنه‌ویستی پێناسه‌ی هێزی پێشمه‌رگه‌ی كۆمه‌ڵه‌ بووه‌ و وێردی زمانی هه‌وو خه‌ڵكی كوردستانه‌ و هه‌رده‌م ئێمه‌ش وه‌ك پێشمه‌رگه‌ی كۆمه‌ڵه‌ به‌م دڵخۆشییه‌وه‌ درێژه‌ به‌ خه‌باتمان ده‌ده‌ین.
ئێوه‌ هاوڕێیانێك كه‌ ئه‌مڕۆ به‌ ڕیزی هێزی پێشمه‌رگه‌ی كۆمه‌ڵه‌ په‌یوه‌ست ده‌بن و چه‌كی پڕ له‌ شانازی كۆمه‌ڵه‌ ده‌كه‌نه‌ شانتان، ده‌بێت ئه‌وه‌ بزانن كه‌ پێ ده‌خه‌نه‌ جێ پێی كۆمه‌ڵێك ئینسانی ئازاده‌ و گه‌وره‌ كه‌ به‌ به‌خت كردنی گیانی ئازیزیان مه‌شغه‌ڵی ئه‌م شۆڕشه‌یان بۆ ئێمه‌ و ئێوه‌ گه‌شاوه‌ ڕاگرتووه‌ و هیوادارم شانی ئێمه‌ و ئێوه‌ش ئه‌ونده‌ به‌هێز بێت كه‌ هه‌ڵگری ئه‌م ئامانجه‌ پیرۆزه‌ بێت.
جارێكی دیكه‌ به‌ ناوی سه‌ركردایه‌تی كۆمه‌ڵه‌وه‌ پیرۆزبایی له‌ هاوڕێیانی تازه‌ پێشمه‌رگه‌ ده‌كه‌م و به‌خێر بێن بۆ كانگای خه‌بات و خۆڕاگری، ڕیزه‌كانی هێزی پێشمه‌رگه‌ی كۆمه‌ڵه‌.


كومیته‌ی ناوه‌ندی كۆمه‌ڵه‌
٢٣ی دێسامبری ٢٠١٨ی زایینی
٢ی به‌فرانباری ١٣٩٧ی هه‌تاوی

ئه‌م بابه‌ته 457 جار خوێنراوه‌ته‌وه‌‌

AM:10:07:02/01/2019