ڕاگەیاندنی ناوەندی هاوکاری حیزبەکانی کوردستانی ڕۆژهەڵات بە بۆنەی ٢٨ی گەلاوێژ

لە یادی ٣٩ساڵەی فەرمانی جیهادی خومەینی دژ بە خەڵكی كوردستان

خەڵكی مافخواز و خۆڕاگری كوردستان!
هاونیشتمانانی خۆشەویست!
٣٩ ساڵ لەوەپێش و لە وەها وەرزێك‌دا، حكومەتی تازە بە دەسەڵاتگەیشتووی كۆماری ئیسلامی ئێران بە نوێنەرایەتیی بیرۆكەی بناژۆخوازی مەزهەبی كە دەیهەویست وەك هاوتا داعشەكانی ئەم ساڵانەی دوایی خۆی پێناسە بكات، لە ڕۆژی ٢٨ی گەلاوێژی ساڵی ١٣٥٨دا، بە بیانووگەلێكی بەدوور لە ڕاستی و بێ‌بنەما، دەستی دایە هێرشێكی بەربڵاو و هەمەلایەنە بۆ سەر خەڵكی كورد لە رۆژهەڵاتی كوردستان.
تەنیا ٩ مانگ دوای ڕووخانی ڕێژیمی پاشایەتی و لە كاتێكدا كە كوردستان وەك دووڕگەی ئەهوەن و سەقامگیر وێنا دەكرا، لە تاران و لە پشت مێحرابی مزگەوتەكان و تریبوونە جۆراوجۆرەكانەوە، دەنگۆ و بۆختان بۆ خەڵكی كوردستان و بزووتنەوە مافخوازانەكەی هەڵدەبەسترا و بە ئاشكرا بۆ كوشتن و بڕینی خەڵكی كوردستان بانگەوازی جیهاد دەكرا.
لە لایەك رێبەر و ئیمامی رێژیمی تازە بە دەسەڵاتگەیشوو (خومەینی)، كوردەكانی وەك كافر و فاسد پێناسە دەكرد و فتوای جیهادی لە دژیان دەردەكرد و لە لایەكی‌ ترەوە كاربەدەستانی دیكەی ئەم رێژیمە بە هاندانی هێزە سەركوتگەر و دەمارگرژەكان، ڕشتنی خوێنی خەڵكی كوردستانیان بە حەڵاڵ دەزانی و بڕیاری پاكتاوكردن و سڕینەوەی ئەم میللەتەیان دەردەكرد.
لەم ماوەیەدا هاوكات لەگەڵ ئەوەی كە ژیان و گوزەرانی خەڵك لە كوردستان لە ژێر كۆنتڕۆڵی ‌هێزە سیاسییەكان كوردستان و هێزی پێشمەرگەدا ڕۆژبەڕۆژ ڕوو لە گەشانەوە و پێشكەوتن هەنگاوی دەنا، بە پێچەوانەكەی لە تاران و شوێنەكانی دیكەی ئێران، لە ژێر چەپۆكی بیری كۆنەپەرەستانەی كۆمەڵێك ئاخوند و فاشیزمی مەزهەبیدا شێوی ژیان و گوزەرانی خەڵك بە خێرایی بەرەو پاش دەگەڕایەوە، ژنان بەردەباران دەكران و چارشێوی ڕەش بەسەریاندا دەكێشرا، تاقم و گرووپی تۆقێنەر بەناوی حیزبوڵڵا ئازادییەكانیان لە خەڵك زەوت دەكرد، دەنگی ناڕازییان و دژبەران كپ دەكران، مافی كەمایەتییە ئایینییەكان پێشیڵ دەكران و ماڵ و سامانیان تاڵان و ئاگر تێ‌بەردەدرا، جیابیران دەمكوت دەكران، پێنووسە ئازا و سەربەخۆكان دەشكێندران و ڕۆژنامە و گۆڤار و بڵاوكراوەكان یەك لەدوای یەك دادەخران.
لەو كاتە كورت ماوەی دوای سەركەوتنی شۆڕش‌دا، خەڵكی كوردستان سەردەمێكی نوێی لە ئازادژیان و پێكەوەژیانیانی دێموكراتیكانەی تەجرووبە دەكرد. شوورای گوند و شارەكان و ئەنجوومەنە سینفییەكان دامەزرابوون و خەڵك ئازادانەدا خۆیان بەڕێوە دەبرد. لایەنە سیاسی و فكرییەكان ئازادانە بیرۆكەی خۆیان بانگەشە دەكرد و كرانەویەكی سیاسیی واقعی سەری هەڵدابوو. ڕێز لە بێروڕا جیاوازەكان و باوڕە جۆراوجۆرە ئایینییەكان دەگیردرا و ژنان وەكوو نیوەی هێز و وزەی كۆمەڵگا لە گۆڕەپانی ئاڵوگۆڕەكاندا لە گەشەسەند‌ا بوون. بڵاوكراوە و چاپەمەنییەكان ئازادانە بیروبۆچوونە جیاوازەكانی كۆمەڵگایان بڵاو دەكردەوە و ڕێكخراو و یەكییەتییە جۆراوجۆرەكانی تایبەت بە چین و توێژەكانی كۆمەڵگا بەرەو پەرەسەندن دەچولە پەرەسەند‌دا بوون.
زۆری نەخایاند كە بۆ كاربەدەستانی ڕێژیمی كۆنەپەرەستی بە دەسەڵات گەیشتوو ڕوون بوویەوە، تاقە ڕێگای داسەپاندنی دەسەڵات بەسەر وڵات‌دا، دژایەتیكردنی كورد و كوردستان و لەنێوبردنی ئەو ئەزموونە ساوا و لە هەمانكات‌دا سەركەوتوویەی كوردستان بوو. لای ئەوان سەركوتكردنی كوردستانی ئازاد، گرتنی دوایین سەنگەری ئازادی لە ئێران‌دا بوو. لە ڕاستیدا هۆكاری سەرەكی ئەو هێرشە، نەك ئەو ئیدیعا و چەواشەكارییە پووچ و بێ‌مانایانە بوون كە دەكران، بەڵكوو هەبوونی كوردستانێكی ئازاد و دێمۆكرات و سكۆلار بوو كە بۆ دەسەڵاتی پاوانخوازی ناوەند قبووڵ نەدەكرا. هەر بەم بۆنەوە، لە ناوەندەوە و ڕاست لە لایەن نوێنەرانی بیرۆكەی ڕەشی مەزهەبییەوە فەرمان دەركرا بۆ ئەوەی هەموو هێزە سەرەكوتكەرەكانی ڕێژیم لە هەموو شوێنەكانی ئێرانەوە ڕەوانەی كوردستان بكرێن.
بەڵام جەماوەری خۆڕاگری گەلی كورد و حیزبە سیاسییەكانی، كە چەند مانگ پێشتری بە شێوازی دێمۆكراتیك و مەدەنیانە بە بەشدارینەكردن لە بەناو ڕێفراندۆمی! خاكەلێوەی ١٣٥٨دا، بەم ڕێژیمەیان وتبوو نا، بڕیاریان دا بۆ پارێزگاری لەو دەسكەوت و بەهایانەی كە دەستیان كەوتبوو، لە چوارچێوەی بەرگریی ڕەوادا بە هەموو تواناوە لە بەرامبەر هێرشی هێز و لەشكری سەركوتكەرا بوەستنەوە و بۆ جارێكی دیكە [نا]یەكی دیكە بەم نیزامە دژی‌گەلییە بڵێنەوە. لە ئاكامی ئەم بەرەنگارییە ڕەوایەدا بەرانبەر بە هێرشی رێژیم بۆ سەر كوردستان كە ئەدەبیاتی سیاسیی كوردستان‌دا بە "بەرگریی خەڵكی كوردستان لە شەڕی سێ مانگە"دا ناسراوە، ڕژیم ناچار بە وتووێژ و گوێ ڕاگرتن لە نوێنەرانی خەڵكی كوردستان كرا.
بەم شێوەیە بوو كە كوردستان بە خۆڕاگرییەكی بێ‌وێنه و فیداكردنی گیانی سەدان و هەزاران ڕۆڵەی تێكۆشەر و خەباتكار، خۆی وەك یەكەم سەنگەری بەرەنگاری لە هەمبەر كۆماری ئیسلامی ئێراندا وێنا كرد و هەتا ئێستایشی لەگەڵ بێت خەڵكی كوردستان و بزووتنەوە مافخوازەكەی جدیترین و لێبڕاوترین دژبەرانی رێژیمی كۆماری ئیسلامی ئێرانن.
ئەمساڵ كە ٣٩ ساڵ بەسەر ڕاگەیاندنی فەرمانی جیهادی خومەینی دژ بە خەڵكی كوردستان تێپەڕ دەبێ، لە سەروبەندێكدا ڕێز لە خۆڕاگریی مێژوویی خەڵكەكەمان دەگرین كە زۆربەی نزیك بە تەواوی شوینە جیاجیاكانی ئێران بەڕانبەر بە سیاسەتەكانی ئەم رێژیمە هەركامەیان بوونەتە كوردستانێك و خەڵكی زۆربەی شارەكانی ئێران لەدژی ئەم دەسەڵاتە هاوهەڵوێستی خەڵكی كوردستانن و داوای ئاڵۆگۆڕی قوڵ و بنەڕەتی لە نیزامی سیاسیی ئەم وڵاتەدا دەكەن.
لەدوای نزیك بە ٤٠ ساڵ لە دەسەڵاتدارێی ئەم رێژیمە بە سەر خەڵكی ئێران و كوردستان‌دا، تا ئێستایش ناو و ناوەڕۆكی كۆماری ئیسلامی ئێران، خولقێنەر و وەبیرهێنەرەوەی تێرۆر، مەرگ، زیندان، سەركوت و بەرەو پاش گەڕانەوەیە. بەرهەمەكانی ئەم نیزامە بۆ خەڵك لەم چوار دەیەدا بەشی زۆری بریتین لە: هەژاری، برسییەتی، گەندەڵی، بێكاری، پەرەسەندنی مەسرەفی مادەهۆشبەرەكان، كەم‌ئاویی، تەڵاق، خۆكوشتن و دەیان دیاردەی دزێوی دیكەی سیاسیم ئابووری و كۆمەڵایەتی. سەرهەڵدان و ناڕەزایەتییەكانی تەنیا یەكساڵی ڕابردوو خەڵكی ئێران بە گشتی سەلمێنەری ئەو راستییەیە خەڵك بە تەواوەتی لەم رێژیمە بێزراون و خوازیاری لاچوون و كۆتایی هاتنی ئەم نیزامەن.
لەسەر ئەم شێوه دەسەڵاتانه پێشتریش مێژوو بڕیاری خۆی داوە، هیچ دەسەڵاتێكی دیكتاتۆر و دژی‌گەلی نەیتوانیوە و ناتوانێ تا سەر لە بەرنانبەر ئیرادەی خەڵكەكەی خۆی ڕابوەستێ. كۆماری ئیسڵامیش لەو قاعیدەیە بەدەر نیه. سەروەری بۆ ئەوانه دەمێنێتەوە كە بەرانبەری وەستانەوە و ئیلهامی ئازادی، سەربەستی و كەرامەتی مرۆڤ هانی دان بۆ دوارۆژێكی گەش كە تێیدا دەسەڵاتێكی دێموكراتیك زامنی مافی هەموومان بێت.
ئێستا كە كۆماری كۆنەپەرەستی تێرۆر و سێدارە رووبەردووی دەیان قەیرانی نێوخۆیی، ناوچەیی و جیهانی بۆتەوەو و كۆمەڵانی خەڵك لێبڕاوانەتر لە هەمیشە بەرانبەری ڕاوەستاون، ئێمە هێزە سیاسییەكانی رۆژهەڵاتی كوردستان دەستمان لە نێو دەستی یەكتر، بە مەبەستی گەیشتن بە كۆمەڵگایەكی ئازاد و دێموكراتیك، بە ئیرادەیەكی قورسترەوە بەرەو داهاتوویەكی گەشاوە یەككەوتووین و خۆ ڕێكدەخەین تاكوو هەنگاوەكانمان پتەوتر لە هەمیشە بەرەوپێش بهاوێین.

ناوەندی هاوكاریی حیزبەكانی كوردستانی ئێران
٢٨ی گەلاوێژ
ی ١٣٩٧ی هەتاوی

ئه‌م بابه‌ته 356 جار خوێنراوه‌ته‌وه‌‌

PM:05:21:19/08/2018