راگەیاندنی كۆمیتەی ناوەندیی كۆمەڵە بە بۆنەی ٣١ی جۆزەردان، رۆژی پێشمەرگەی كۆمەڵە

راگەیاندنی كۆمیتەی ناوەندیی كۆمەڵەی شۆڕشگێڕی زەحمەتكێشانی كوردستانی ئێران بە بۆنەی ٣١ی جۆزەردان، رۆژی پێشمەرگەی كۆمەڵە

كۆمەڵانی خەڵكی كوردستان
بنەماڵەی سەربەرزی گیانبەختكردوان
هاوڕێیانی پێشمەرگە
٤٠ ساڵ لەمەوبەر رۆژی ٣١ی جۆزەردانی ١٣٥٧ ‌هاورێ سەعید موعینی (خانە) لە سەر بریارێكی حیزبی، لە گەڵ ژمارەیەك لە پێشمەرگەكانی یەكیەتی نیشتمانی كوردستان، لە شەڕێكی قارەمانانە و نابەرابەردا لە دژی ھێزەكانی بەعسی عێراق لە گوندی دڕێ سەر بە شارۆچكەی ماوەت لە كوردستانی باشوور، لە پێناو گەیشتن بە ئامانجە بەرزكانی و روخانی قەڵای زۆرداری، گیانی خۆی بەخت كرد. هاوڕێ خانە یەكەم پێشمەرگەی شەهیدی كۆمەڵەیە  و هەر بەو بۆنەوە كۆمەڵە ٣١ی جۆزەردانی وەك رۆژی پێشمەرگەی كۆمەڵە دیاری كردووە. لەو كاتەوە تا ئێستا، ھەموو سالێك سەرجەم  تێكۆشەرانی كۆمەڵە لەو رۆژەدا وێرای نوێكردنەوەی پەیمان لەگەڵ یەكێك لە ئازیزترین خەباتكارانی گیانبەختكردوی كۆمەڵە وكورستان، رێزیش دەگرن لە یادی ھەزاران گیانبەختكردووی كۆمەڵە كە لە پێناو خەباتی ڕەوای گەلی كورد بۆ نەهێشتنی بندەستەیی نەتەوەیی و دادپەروەری كۆمەلایەتی و نەھێشتنی چەوسانەوە، تێكۆشاون و ئەركی پیرۆزی پێشمەرگایەتیان وەئەستۆ گرتووە. .

سەعید موعینی لە تەمەنی زۆر لاویدا شۆرشگێرێكی شێلگیری خەباتی نەھێنی، نمونەی ھەرە بەرزو بێ ھاوتای خۆڕاگری ناو بەندیخانە و دواتریش ھەلبژاردەی رێبەری ئەو كاتی كۆمەڵە بوو بۆ چوون بۆ كوردستانی باشوور و وەرگرتنی ئەزموونی پێشمەرگایەتی لە ناو ریزەكانی یەكێتی نیشتمانی كوردستان بۆ خزمەتكردن بە داھاتووی خەباتی چەكداری و پێشمەرگانەی كوردستانی رۆژھەڵات كە ئەو سەردەم بیری لێكرابۆوە.

پاش روداوی تاڵی گیانبەختكردنی خانە، زۆری نەخایاند بە ھێزی خەباتی خەڵك كۆشكی زۆرداری رژیمی پاشایەتی روخا، بەڵام بەداخەوە لەماوەیەكی كەمدا دەسەلاتێكی ئایینی و سەرەڕۆ و سەركوتكەرتر لە رژیمی پێشوو شوێنی گرتەوە. ئەم دەسەڵاتە خراپتر لە رژیمی پێشوو كەوتە دژایەتی خواست و ویستی گەلانی ئێران و یەك لەوانە گەلی كورد. هێرش بۆ سەر كوردستان و سەركوتی گەڵی كورد لە سەروی هەموو ئەولەوییەتەكانی كۆماری ئیسلامی بوو و زۆریشی نەخایاند  كە ئەو خەونەی بە كردەوە دەرهێنا. هێزی پێشمەرگەی كۆمەڵە بۆ وەڵامدانەوە بەو هێرشە و وەڵامی شۆڕشگێڕانە بە پێداویسیتیەی سەردەم بوو كە رێكخرا و هاتە ناو گۆڕەپانی خەبات و بزوتنەوەی رزگاریبەخشی كوردستان.

ھێزی پێشمەرگەی كۆمەڵە بە زۆر قۆناغدا تێپەریوە، مێژوی دژوارترین بەرەنگاریەكانی بۆخۆی تۆمار كردوە و كۆمەلێك ھەوراز و نشێوی سیاسی و نیزامی تێپەر كردووە، دوژمن لە پیلانگێڕان و ھەوڵدان بۆ لە نێو بردنی ھێزی پێشمەرگەی كۆمەڵە ھەوڵی كەمی نەداوە، بەڵام یەك ئەسل نەگۆڕ ماوە و دەمێنێ، پێشمەرگەی كۆمەڵە سەرەڕای ھەموو ھێرشەكان و لەمپەرەكان ماوە و بەردەوامە، شێلگیرە و بەرچاوی روونە تا دەگات بە ئامانج، بەردەوامە تا نیشانی بدات خوێنی نزیك بە ٣٠٠٠ ھەزار خەباتكاری ریزەكانی خۆی بۆتە ھەوێنی نەسرەوتن و تێكۆشانی بەردەوام تا بنەماڵەی سەربەرزی گیانبەختكردووان وخەڵكی كوردستان دڵنیا كات سەنگەری رۆلەكانیان چۆل نەكراوە و جامەدانەی نەسلی نوێ بۆ خەبات ودرێژەدانی رێبازیان ھەر ئیستا ئارەقی ماندویی پێشمەرگەی كۆمەڵە لە شاخ دەسڕێتەوە.

پێشمەرگە دێرینەكانی كۆمەڵە
بنەماڵەی ئازیزی گیانبەختكردوان
جۆزەردان رۆژی رێزگرتنە لە خەبات و تێكۆشانی هەموو ئەو كەسانەی كە رۆژێك لە رۆژان لە ریزەكانی كۆمەڵەدا خەباتیان كردوە. لەم رۆژەدا رێز لە یادی ئازیزی ھەموو گیان بەختكردوانی ریزەكانی كۆمەڵە دەگرین كە بە گیانبازی و فیداكاری بێ وێنەی خۆیان مەشخەڵی خۆڕاگری و ملكەچ نەبوون بە كۆنەپەرەستی كۆماری ئیسلامیان ھەروا بە گوڕو تین ڕاگرتووە. رێز دەگرین لە پێشمەرگە كەم ئەندامەكانی كۆمەڵە كە بەشێك لە جەستەی خۆیان پێشكەشی ئامانجە بەرزەكانی كۆمەڵە و بزاڤی رزگاریخوازی گەلی كورد كردوە. لە رۆژی پێشمەرگەی كۆمەڵەدا  لە گەڵ گیانبەختكردوانی كۆمەڵە و كوردستان پەیمان نوێ دەكەینەوە كە تا گەیشتن بە ئاوات و ئامانجەكان و رزگاری خەڵكی كوردستان لە ژێر ستەمی نەتەوایەتی و كۆنەپەرستی كۆماری ئیسلامی لە تێكۆشان نەوەستین.

جۆزەردانی ئەمسال لە زۆر ڕووەوە جیاوازه لە ساڵانی ڕابردوو، كۆماری ئیسلامی به گوتەی تەنانەت كاربەدەستانی خۆشی له گەورەترین قەیرانی ٤ دەیەی ڕابردوو دایه، مەشرووعیەتی بە دوای ئاخێزەكانی بەفرانباردا بە تەواوی ڕوو لە داكشانه، گووشاره دەرەكیەكان زیادیان كردووە و دەستی نەگریسی ئەو رەژیمه لە ناوچەكه و هەموو جیهان بەرەو كورت كردنەوە دەچێت، لە وەها باروودۆخێكدا هێزی پێشمەرگەی كۆمەڵە، بە بەشداری ئێوە و ئامادە بوونتان لە ڕیزەكانیدا پێویسته بەهێزتر بكرێت،  پێویسته وەك هێزی پێشمەرگەی كۆمەڵه لە هەموو كات ئامادەتر بین بۆ بەدی هێنان و پاراستنی خەونی لەمێژینەی گەلی كورد لە كوردستانی ئێران، بە پەیوەست بوونتان بە هێزی پێشمەرگەی كۆمەڵە، باسكی عەداڵەتخوازی و یەكسانیخوازی لە كوردستان بەرگری بكەن لە سەرجەم مافە رەوا، ئینسانی و نەتەوەییەكانی خۆتان و خەڵكی كوردستان.

سەركەوێ بزووتنەوەی ڕزگاریخوازی گەلی كورد لە كوردستانی ئێران
بژی هێزی پێشمەرگەی كۆمەڵە

كۆمەڵەی شۆرشگێڕی زەحمەتكێشانی كوردستانی ئێران
سكرتاریەتی كومیتەی ناوەندی


ئه‌م بابه‌ته 532 جار خوێنراوه‌ته‌وه‌‌

PM:08:21:20/06/2018