داخرانی ڕۆژهەڵات تیڤی بەمانای داخران و وەستانی كار و چالاكییەكانمان نییە

وتووێژی ئاسۆی ڕۆژهەڵات لەگەڵ ئێدریس کولاهدووزی، بەرپرسی کەناڵی ئاسمانی ڕۆژهەڵات تیڤی، بەبۆنەی داخرانی کاناڵ ئاسمانی ڕۆژهەڵات تیڤییەوە.
ئاسۆی ڕۆژهەڵات: دەنگووی ئەوەی هەیە كە بڕیارە ڕۆژهەڵات تیڤی دابخڕێت، گرێنگترین هۆكاڕی سەڕەكی داخڕانی ئەم کەناڵە ئاسمانیە بۆ چی دەگەڕێتەوە؟

وڵام: بەداخەوە ئەوە دەنگۆ نییە و ڕاستییە كە كەناڵی ئاسمانی ڕۆژهەڵات تیڤی بۆماوەی چەند مانگێك دادەخرێت و تا كۆتایی ئەم مانگە، واتە مانگی ڤێبریواری 2016، بەردەوام دەبێت و هیوادارم دوای چەند مانگێك بەدەستی پڕەوە بگەڕێنەوە ئامیزی بینەرانی خۆشەویست. بۆخۆتان دەزانن كە كاری میدیایی و ڕاگەیاندن و، لەسەروی هەموویانەوە تێلێڤیزیۆن، بەهێزی ئینسانی پڕۆفێشناڵ و حرفەیی و ئیمكاناتی پێویست بەڕێوەدەچێت و هەموو ئەوانەش پارەی پێویستیان دەوێت كە بەداخەوە لە ئێستادا پارەی پێویست بۆبەردەوام بوونی ڕۆژهەڵات تیڤیمان لە بەردەستدا نییە؛ ناڵێم تەنیا ئەو كێشەیەمان هەیە، بەڵام كە پارە نەبوو زۆر كێشەی دیكەش سەر هەڵدەدات كە لێی دەكۆڵیتەوە سەرچاوەكەی بۆ بێپارەیی دەگەڕێتەوە و هیوادارم بەزووترین كات بەچارەسەركردنی ئەو كێشەیە بتوانین کار و چالاکی و وەشانی خۆمان دەستپێبكەینەوە.

ئاسۆی ڕۆژهەڵات: سەبارەت بەداخڕانی ڕۆژهەڵات تیڤی، پێشتر و لەژمارەی 124 ئاسۆی ڕۆژهەڵات، هاوڕێ عەبدوڵڵا موهتەدی سكڕتیڕی گشتی كۆمەڵە، ئاماژەی بەوە دابوو كە بڕیاڕە ڕۆژهەڵات تیڤی لەسەڕی مانگەوە دابخڕێت بەڵام بۆ مانگێك درێژكرایەوە، هۆكاڕی دواخستنەکە بۆ چی دەگەڕێتەوە؟

وڵام: بەڵێ‌، ڕاستە بڕیار وابوو كە ڕۆژهەڵات تیڤی مانگی پێشووی دابخرێت، بەڵام بەسەرنجدان بەوەی كە ئێمە ڕۆژی 26 ڕێبەندان، ڕۆژی ئاشكرابوونی خەباتی كۆمەڵەمان لە بەردەمدا بوو و هاوكاتیش لەسەر داوای كۆمەڵێك لەهەڵسوراوان و چالاكانی كۆمەڵە بۆ كاركردن لەسەر ئەو ڕۆژە، كە ڕۆژێكی گرینگ و مێژووییە لە بزافی شۆڕشگێڕانە و ڕزگاریخوازانەی گەلی كورددا، بریاماندا كە بۆماوەی یەك مانگی دیكە بەردەوام بین لە چالاكی و هەڵسووڕانمان لە ڕۆژهەڵات تیڤی و وەک ڕۆژهەڵات تیڤی.

ئاسۆی رۆژهەڵات: ئەگەڕ بڕیاڕە دراوە کە ڕۆژهەڵات تیڤی دابخرێت، ئایا لە داهاتودا ڕۆژهەڵات تیڤی دووبارە چالاك دەكڕێتەوە یان نا؟

وڵام: بەڵێ، بڕیارەكە ئەوەیە كە دوای چەند مانگێك لە ڕاگرتن و ڕاوەستان و پشوو و پێداچوونەوە بە كاروبارەكانی پەیوەست بە ڕۆژهەڵات تیڤیەوە، جارێكی دیكە چالاكییەكانمان دەستپێبكەینەوە و سەرلەنوێ بیبووژێنینەوە و بەتین و نەفەسێکی دیکەوە بگەڕێینەوە و بێینەوە مەیدان. بەڵام ڕاستییەكەی ئەوەش بەشێكی دەگەرێتەوە بۆخۆمان كە سەرلەنوێ وزەی خۆمان بۆ وەگەڕخستنەوەی ڕۆژهەڵات تیڤی دەستپێبكەینەوە كە ئەویش ئامادەیی و سووربوونی ئێمەیە لەسەر كار و چالاكییەكانمان و لەم ڕێگایەوە بەردەوام بوون لەخزمەت و تێكۆشان كە ئێمە هەر هەموومان وەك پێشمەرگە و كارگێر و بەڕێوەبەرانی ڕۆژهەڵات تیڤی ئامادەین بەهەمان ورە وە رۆحیەی بەرزی شۆرشگێرانە و بەبێ هیچ چاوەڕوانییەك لەخزمەت بەگەل و نیشتمان لەهیچ چەشنە فیداكاری و تێكۆشانێك درێغی نەكەین؛ بەشەكەی دیكەشی پەیوەندی بەدڵسۆزان و خەمخۆرانی خەڵکی کوردستان و گەلی كورد لە بەشەكانی دیكەی كوردستان، بەتایبەتی كوردستانی ڕۆژهەڵاتەوە، هەیە كە چەندە یارمەتی ئەو كەناڵە دەكەن بۆ سەرلەنوێ دەستبەكاربوونەوەی. هەرچی هەوڵەكان زۆرتر بن و خەمخۆرانی كورد بەخەمەوە بن بۆدەستبەكاربوونەوەی ڕۆژهەڵات تیڤی، کە یەكەم كەناڵی ئاسمانی كوردستانی ڕۆژهەڵاتە، بە دڵنیاییەوە ڕۆژهەڵات تیڤی زووتر دەستبەكاردەبێتەوە و پتەوتر لەجاران دەردەکەوێت.

ئاسۆی ڕۆژهەڵات: ئێوە وەك بەڕپرسی ئێستای ڕۆژهەڵات تیڤی، ئەگەڕ ڕۆژهەڵات تیڤی دابخڕێت و دیسانەوە چالاك بكڕێتەوە شێوازی كاڕ و چالاكیەكەی بە چ شێوەیەك دەبێت؟ کوالیتی و كەیفیەتی بەڕنامەكانی لە چ ئاستیكدا دەبێت و چۆنی ڕێکدەخەنەوە؟

وڵام: بەخۆشییەوە دەتوانم بڵێم ئێمە لەم ماوەی كاركردنەماندا لە ڕۆژهەڵات تیڤیدا خاوەن كۆمەڵێك تەجروبە و ئەزموونی كاركردنین كە بەدڵنیاییەوە ئەو ئەزموونانە چرای داهاتوومانن و هاوكاتیش خاوەن ئارشیڤێكی دەوڵەمەند و بەهێزین كە كاریگەریان لەسەر باشتركردنی بەرنامە و پرۆگرامەكانی داهاتووی ڕۆژهەڵات تیڤی دەبێت. ئێمە خەون و ئاواتمان زۆرە بۆ كاری داهاتووی ڕۆژهەڵات تیڤی، بەڵام خەون و ئاوات شتێكە و واقەعیەتی مەسەلەكەش شتێكی دیكە. هەر چركەیەكی كاری میدیایی و ڕاگەیاندن پێویستی بە ئیمكاناتی ماڵی و هێزی ئینسانییە و كاری تێلێڤیزیۆن كاری قۆناغ بە قۆناغ و پلە بە پلەیە و لەسەرەتای هەوڵەكانی داهاتووماندا لە هەوڵداین ئەو ئیمكاناتە دەستەبەربكەین و هاوكاتیش لەبواری فەننی تێلێڤیزیۆندا ئاڵوگۆرێك پێكبێنین و پێش دەستبەكاربوونەوە، دڵنایی تەواومان هەبێت كە دەتوانین بەردەوام بین و لەئاستی بەردەنگانی خۆمانداین. هەروەها بەنیازین ئەگەر بكرێت و بتوانین لە زۆربەی شارەكانی كوردستانی ڕۆژهەڵاتدا كاری جیدیتر و چروپڕتر بكەین و هەواڵنێر و ڕێپۆرتێری تایبەت تەیار و ئامادە بكەین و هەواڵ و زانیارییە وردەكانی پەیوەست بەسەرجەم شارەكانی كوردستان ئامادە و بڵاوبكەینەوە، ئەگەرچی دەزانن كە بە هۆكاری ئەمنیەتی و فەزای داخراوی ئێران و كوردستان ئەو كارە تاڕادەیەك سەخت و ئەستمە، بەڵام بەخۆشییەوە زۆرن ئەو كور و كچە گەنجە شۆڕشگێڕانەی كە ئامادەیی خۆیان بۆهاوكاری چڕوپڕتر لەگەڵ ڕۆژهەڵات تیڤی ئامادەكردووە و خۆیان بەخاوەن تێلێڤیزیۆنی ڕۆژهەڵات تیڤی دەزانن. هەروەها لەكوردستانی باشووریش بنكە و لقەكانی تایبەت بە ڕۆژهەڵات تیڤی بەرفراوانتر دەكەینەوە و پەرەیەکی زۆرتری پێدەدەین. لە وڵاتە ئۆرووپاییەکانیش بەهەمان شێوە، بەنیازین لەماوەی ئەو پشووەماندا چاوێكیش بەكار و چالاكییەكانی ڕۆژهەڵات تیڤیدا بخشێنینەوە و كەموكۆڕییەكانی پەیوەندیدار بەكاری نەک هەر ڕۆژهەڵات تیڤی بەڵكوو کۆی ڕاگەیاندنی كۆمەڵەدا بخشێنینەوە و خاڵە بەهێزە و پۆزۆتیڤەكانمان بەهێزتر بكەین و ئەگەر كەموكۆرییەكیش لەو بارەیەوە بەدیكرا چارەسەریان بۆ بدۆزینەوە.

ئاسۆی ڕۆژهەڵات: لەماوەی داخستنی تلویویزیوندا پێتان وایە دەبێت چۆن زەمینە فەراهەم بكڕێت بۆ گەڕاندنەوەی دووبارەی ڕۆژهەڵات تیڤی؟

وڵام: دیارە بڕیاری داخستنی ڕۆژهەڵات تیڤی لەلایەن كومیتەی مەركەزی كۆمەڵەوە دراوە و کۆمێتەی مەرکەزیش ماوەی چەند مانگێک بە تێر و تەسەلی قسەیان لەسەر کردوە و تاوتوێیان کردوە و پاشان بەو قەناعەتە گەیشتن کە بۆ ماوەیەک ڕۆژهەڵات تیڤی دابخرێت بۆیە داخستن و ڕاگرتنی ڕۆژهەڵات تیڤی بڕیارێكی لەناكاو و كوتوپڕی لەسەر نەدراوە، بەڵكوو لەسەر ئەساسی كۆمەڵێك دەرئەنجام و دەرهاوێشتەی ڕاست و دروست بووە كە ڕێبەری كۆمەڵەی هێناوەتە سەر ئەو قەناعەتەی كە ئەگەر دەیهەوێت تێلێڤیزیۆنێكی كارا و كارامەتری هەبێت، كە كاریگەری جیدی هەبێت لەسەر ڕەوتی ڕووداوەكان و خەت و ڕێبازی حیزبیمان لەو تێلێڤیزیۆنەدا ڕەنگدانەوەی هەبێت، پێویستە بۆماوەی چەند مانگێك ڕابگیرێت و ئاوڕێكی جیدی لەسەر سەرجەم بەرنامە و پرۆگرامەكانی و هاوكاتیش نیرو و هێزی ئینسانییەكەی و لایەنە فەننیەكەی بدرێتەوە.

ئاسۆی ڕۆژهەڵات: پێتان وایە دوای داخستنی ڕۆژهەڵات تیڤی ئەركی ڕاگەیاندن چۆن دەبێت و پێویستە چۆن بۆشایی نەبوونی ڕۆژهەڵات تیڤی پڕبكرێتەوە؟

وڵام: بەخۆشییەوە بەهۆی ڕەوتی ڕوولەگەشەی بەردەوامی دنیای مەجازی و ئینتێرنێت و خێرایی بڵاوبوونەوەی زانیارییەكان لەئاستی كۆمەڵگای مرۆڤایەتیدا، ئامێر و كەرەسەكانی گواستنەوە یەكجار زۆرن كە ئەمە خۆی لەخۆیدا جێگای دڵخۆشییە، بەڵام بۆ ئێمەی كوردی كوردستانی ڕۆژهەڵات بەهۆی نەبوونی ئازادی ڕادەربرین و كەشی ئەمنیەتی زاڵ بەسەر كوردستان و كوشت و بڕ و زەبر و زەنگ، وەك پێویست لەو دونیا مەجازییە و ئەو دەستكەوتانەی جیهانی سەردەم و مرۆڤایەتی كەڵك وەرناگیرێت و ڕژیم ڕێگری دەكات و ئەوانەش كە لەو دەستكەوتانە كەڵكوەردەگرن لەگەڵ دەیان مەترسی ڕووبەڕوو دەبنەوە و هاوكاتیش ڕژیم زۆرێك لەو ماڵپەر و سایتانەی فیلتێر كردووە و دەستپێڕاگەیشتن بەزانیاری نوێ و جیهانی سەردەمی بەرتەسك كردۆتەوە، كەوابوو تێلێڤیزیۆن ڕۆڵی زۆر باش و كاریگەر لەسەر ڕەوتی ڕووداوەكان و بینەری خۆی بەجێدێڵێت، ئەگەرچی ئەویش لەلایەن ڕژیمەوە بەردەوام تەشویش و پارازتی دەخرێتە سەر، بەڵام گشتیترە و دەستپێراگەیشتن پێی ئاسانترە.
 هاوكاتیش ئێمە دوای ڕاوەستانی ڕۆژهەڵات تیڤی و بە مەبەستی پڕكردنەوەی ئەو بۆشاییە، چالاكییەكانی خۆمان لەسەرجەم میدیا كوردییەكانی دیكەوە، كە بە خۆشییەوە ئێستا زۆرن، چرتر دەكەینەوە و هاوكاتیش سەرجەم سایت و ماڵپەرەكانی خۆمان چالاكتر دەكەینەوە و لەڕاستیدا ڕاوەستانیڕۆژهەڵات تیڤی بەمانای ڕاوەستانی كاروچالاكییەكانمان نییە. لەكۆتاییدا داواكارم لە سەرجەم تێكۆشەران و دڵسۆزانی گەلی كورد لەهەر شوێنێكی ئەم گۆی زەویە دەژین، یارمەتیدرەی خەباتی ڕۆژهەڵاتی كوردستان بن و لەپێناو وەگەرخستنەوە و سەرلەنوێ دەستبەكاربوونەوەی كەناڵی ئاسمانی ڕۆژهەڵات تیڤی چییان لە دەست دێت درێغی نەكەن و پڕاوپڕ پشتگیری بکەن.

ئه‌م بابه‌ته 1882 جار خوێنراوه‌ته‌وه‌‌

AM:11:07:29/04/2016