پەیامی تەشكیلاتی زاگرۆس بۆ رێكخستنە نهێنییەكانی كۆمەڵە

هاوڕێیان؛
هەڵسوڕاوان و تێكۆشەرانی نهێنی سەنگەری شاری كۆمەڵە لە كوردستانی رۆژهەڵات

لە ساڵیادی حیزبە شۆڕشگێڕەكەماندا جارێكیتر كوردستانی رۆژهەڵاتتان بە ئاڵای سووری كۆمەڵە و بە  دروشمی پیرۆز بێت 26ی رێبەندان رازاندەوە، هاوڕێیانی نهێنی كۆمەڵە لە سەرتاسەری كوردستان هەر لە ورمێ و برادۆستەوە هەتاكوو ئیلام و كرماشان ، بێگومان ئەرك و خەباتی ئێوە لە نێۆ جەرگەی جەماوەردا ئەركێكی پڕ بایەخ و بەردەوام و شۆڕشگێڕانەیە،  هەر لە سازماندان و رێكخستنی خەڵكی چەوساوە و ناساندنی ماف و داخۆازیەكانیان، سازدانی كۆر و كۆمەڵی ناڕەزایەتی لە دژی كوشتنی كۆڵبەران و گرتنی كەرنەڤاڵی بەرین بۆ پیشتیوانی لە مافی چارەی خو نووسینی كورد لە باشوورەوە بگرە هەتا رێبەری كردن و هاندانی خەڵك بۆ بە هاناوە چوونی خەڵكی خەساردیتووی سەرپێڵی زەهاو و ناوچەی كرماشان ، سازماندانی خەڵك بۆ پشتیوانی لە ناڕەزایەتیەكانی شارەكانی دیكەی ئێران و پشتیوانی لە بەندكراوانی سیاسی كورد و كەمپەین ساز كردن بۆ نە بە سێدارە و دەیان و سەددان جووڵەی مەدەنی و سیاسی لە كوردستان ، بەشداری چالاكانەتان كرد و لە پێشەوەی ئەو جم و جۆڵانەوە بوون ، دیارە ئەم ئەركانە لە كوردستانێكی داگیركراودا و لە ژێر زەبر و زەنگ و چاودێری دەسەڵاتی رەشی كۆماری ئیسلامیدا ئاسان و بێ مەترسی نیە، بەڵام دیكتاتوریەتی ئیسلامی بە هەموو دام و دەزگا سەركوتگەر و بە هەموو كردەوەیەكی جینایەتكارانەی تا ئێستا نەیتوانیوە تین و تەوژمی خەبات و تێكۆشانتان لاواز و خەباتكاران لە مەیدان بە دەر بكات .
چالاكی تەبلیغی رۆژانی رابردوی ئێوە ، نموونەیەكی هەرە بە چاو و حاشاهەڵنەگری ئەم خەباتەیە كە سەرە رای نالەباری دۆخی ئەمنییەتی و حوزووری هێزە بە كرێگیرا و سەركوتكەرەكانی كۆماری ئیسلامی زوربەی هەرە زۆری شار و لادێ و ناوچەكانی كوردستانی گرتەوە، بە بڵاو كردنەوەی تراكت  و وێنەی شەهیدان، هەڵكردن و هەڵواسینی ئاڵای سووری كۆمەڵە لە سەر دەرك و دیواری ئیداراتی دەوڵەتی و شەقام و كۆڵانەكانی، نووسینی دروشم لە شەقام و شوێنە گشتییەكان، چوونە سەر گۆڕی گیانبەخكردووانی كۆمەڵە و سەردانی بنەماڵە ئازیزەكانیان ، بە كردنەوەی ئاگر لە سەر كێو و بەرزایەكان و هەر وەها بە بە كار هێنانی دەیان شكڵ و شێوازی تازە لە كاری تەبلێغی رێزتان لە 26ی  رێبەندان و ساڵرۆژی ئاشكرا بوونی خەباتی كۆمەڵە گرت و بە هەمووان ئەو راستییەتان سەلماند كە تێكۆشەرانی رێبازی كۆمەڵە ئەو كچە چاو نەترسانەی كە بە رۆژی رۆشن لە كۆڵانەكان دروشمی بژی كۆمەڵە و پیرۆزبایی 26ی رێبەندانیان نووسیەوە ئەو كوڕانەی كە ئازایانە شاخ و شاریان بە ئاڵای كۆمەڵە رازاندەوە ، لە شەوە زەنگی كۆماری كۆنەپەرەستی ئیسلامی سڵ ناكەن و لە تاریكستانی ئەم رۆژانەی ئێراندا شەونامەی هیوا و ورەبەخش بڵاو دەكەنەوە ، ئێوە هەمیشە هەڵگری مەشخەڵی رزگاری و ئازادی چەوساوەكانی كوردستانن و فرمێسك لە چاوی هەژاران دەسڕنەوە و تەنیا قڵغان و سەنگەری بەرگریتان لێهاتوویی و ئەزموونی خەباتكارانە و حەقانیەتی رێگاتانە .
ئێمەش لە ناخی دڵمانەوە دەستخۆشی و ماندوو نەبوونی لە ئێوە، هاوسەنگەران و هاوڕێیانی نهێنی كۆمەڵە لە سەرتا سەری كوردستان دەكەین و سەركەوتن و سەرفرازی زیاترتان بۆ بە ئاوات دەخوازین ، هەر وەها لەم یادە پیرۆزەدا لە گەڵتان بەڵێن تازە دەكەینەوە لە پێناو گەیشتن بە ئامانجە بەرزەكانی كۆمەڵە و بزووتنەوەی شۆڕشگێرانەی گەلی كورد و دامەزراندنی كوردستانێكی ئازاد و پێشكەوتوو هاوشان  لە هیچ ماندوو بوون و فیداكاریك درێغ ناكەین.

هەر بژین و سەربەرز بژین بۆ كۆمەڵەو چەوساوەكانی كوردستان
برۆخی دەسەڵاتی كۆنەپەرەستی كۆماری ئیسلامی
سەركەوێ خەباتی رزگاریخوازانەی گەلی كورد
هەر شكۆدار بێت 26ی رێبەندان ساڵرۆژی كۆمەڵە
تەشكیلاتی زاگرۆسی كۆمەڵەی شۆڕشگێڕی زەحمەتكێشانی كوردستانی ئێران
26ی رێبەندانی 1396ی هەتاوی

ئه‌م بابه‌ته 533 جار خوێنراوه‌ته‌وه‌‌

PM:01:54:15/02/2018