پەیامی کومیتەی ناوەندی کۆمەڵە بە بۆنەی ٢٦ی ڕێبەندان (ڕۆژی کۆمەڵە)

خەڵكی خەباتكاری كوردستان!
كرێكاران، زەحمەتكێشان!
دۆستان، پێشمەرگەكان و ئەندامانی كۆمەڵە!
نزیك بە چوار دەیە لەوەپیش محەمەدحوسەینی كەریمی كادری ناوەندی و دامەزرێنەری كۆمەڵە، لە گەڵ جەماوەری خەڵكی شاری سەقز، لە كاتی هێرش بۆ سەر پاسگای پۆلیس لەم شارە بریندار دەبێ و دوای سێ رۆژ لە نەخۆشخانەی شار گیانی لە دەست دەدا، دوا بەدوای ئەو ڕووداوە كۆمەڵە بڕیاری دەستپێكی چالاكی ئاشكرا دەردەكات و بەو شیوەیە حیزبێك كە ئەو كات نزیك  بە دەساڵ بە شیوەی نهێنی چالاكی دەكرد و كادر و ئەندامانی دەوریكی كاریگەریان لە بزووتنەوەی خەڵكی كوردستان بە دژی دەسەڵاتی داپڵۆسێنەری پاشایەتی دەگێڕا و زۆریان خۆشەویستی خەڵكی شار و دێهاتەكانی كوردستان بوون، پێی نایە قۆناغی چالاكی ئاشكرا.

كۆمەڵە دیاردەیەكی نوێ بوو لە خەباتێكی مێژوویی نەتەوەی كورد. كۆمەڵە بە ئاوێتەكردنی خەبات بە دژی ستەمی نەتەوایەتی لە گەڵ خەبات بۆ دادپەروەری كۆمەڵایەتی ڕێگای خۆش كرد بۆ هاتنە مەیدانی بەرفراوانترین جەماوەری خەڵك بە تایبەت لە چینی هەژار و بندەست، كه نەك وەك سیاهی لەشكر، بەڵكو وەك خاوەنی بزووتنەوەكە، بێنە مەیدانی خەبات و دەورێكی كاریگەر بگێڕن. بە هێنانە گۆڕی پرسی  یەكسانی ژن و پیاو نەك تەنیا ڕێگا خۆشكەر بوو بۆ هاتنی ژنان بۆ ناو ڕیزەكانی هێزی پێشمەرگە، بەڵكو شەقێكی گەورەی خستە نێو دیواری كۆنەپەرستی و داب و نەریتی پیاو ساڵاری و بەو شێوەیە وزە و توانایەكی نوێی خستە نێو بزووتنەوەی حەقخوازانەی گەلی كورد.
لەو كاتەوە تا ئێستا خەبات بەردەوام درێژەی هەبووە و سەرەڕای هەوراز و نشێوی زۆر هەردەم لە شكڵ و شێوازی نوێ هاتۆتەوە مەیدان. ئەو بەردەوامی و نەپچڕانە خۆی لە میژووی گەلی كورد دیاردەیەكی نوێیه و دەركەوتەكانی گرینگن. هێزی پێشمەرگەی كۆمەڵە وەك باسكی چەكدار و بەهیزی بزووتنەوە لە تاقیكردنەوە یەك لە دوای یەكەكاندا سەركەوتووانە هاتووەتە دەر و هیچ كات پێوەندی لە گەڵ جەماوەر و خەباتیان نەپچڕاوە.
بۆیەش جێگای خۆیەتی بە بۆنەی ساڵۆگەڕی ئەم رۆژە، بە هەموو ئەو خۆشەویستانە، بە پیشمەرگە دێرینەكان، پێشمەرگە تازەكان، ئەندامانی كۆمەڵە و گشت ئەو كەسانەی بۆ هەر ماوەیەك هەرچەند كورتیش لە ڕیزی كۆمەڵە خەباتیان كردووە و ئەركیان لە بەرەو پێشبردنی ئەم ڕەوتە وەئەستۆ گرتووە، پیرۆزبایی بڵێین. هەروەها پیرۆزبایی بڵێین بە بنەماڵەی شەهیدانی سەربەرزی كۆمەڵە، بە هاوڕێیانی بەندكراومان و بنەماڵەكانیان و سەرئەنجام سپاس و پێزانینی خۆمان ئاراستەی گەلی كورد، هەموو دانیشتووانی خەباتكاری شار و گوندەكانی كوردستان بكەین، بە نەوەی كۆن و نوێ كە كۆمەڵەیان لە ئامێزی گەرم و پڕ لە هەستی خۆیان گرتووە، پشتیوانی بوون و پاراستوویانە.

هاوڕێیانی خەباتكار!
ئەمساڵ بزووتنەوەی كوردستان سەر‌هەڵدانێكی نوێ و شكۆمەندی بە خۆیەوە بینی. پشتیوانی لە كۆڵبەران و ناڕەزایەتی بەرامبەر بە دۆخی نالەباری ژیانیان و كوشتنیان بە دەست هێزە چەكدارەكانی ڕژیم شیوازێكی تەواو جەماوەریی بە خۆیەوە گرت. دوابە دوای ئەوە، بەرەوڕوو بووین لە گەڵ پشتیوانی جەماوەریی و بێوێنەی هەموو شارەكانی كوردستانی ڕۆژهەڵات لە گشتپرسییەكەی كوردستانی باشوور بۆ سەربەخۆیی بە جۆرێك كە توانای هەر كاردانەوەیەكی بە پەلەی لە هێزە ئەمنییەتییەكانی ڕژیم ئەستاند، لە پاڵ پشتیوانی لە كوردستانی باشوور، خۆپیشاندانەكان بوو بە گۆڕەپانێكی دیكە لە ململانێی ئاشكرا لە گەڵ دەسەڵاتی ناوخۆیی ئێران. جێی خۆیەتی لێرەدا ئاماژە بكەین بە هاوپشتی و هاوسۆزی بێوێنەی گەلی كورد لە قوربانیانی بۆمەلەرزەكەی كرمانشان. ئەو ڕووداوە یەك لە دوای یەكانە، جارێكی دیكە دۆزی كوردی خستە ناو باس و خواسی بەشێك لە ڕووناكبیرانی ئێرانی.

لە بیرمان نەچێتەوە جوڵانەوە ناڕەزایەتییەكانی ئێران بە دوای ئەوەدا و لە مانگی بەفرانبار دەستیان پێكرد. كۆمەڵە لە چەندین مەجال هەر لە وتووێژەوە تا نووسراوەكانی لێكدانەوە و هەڵوێستی خۆی بەرامبەر بەو شەپۆڵە لە جوڵە ئیعترازییەكان بە ڕوونی باسكردووە. لێرەدا ناچینە ناو وردەكارییەكانی ئەو ڕووداوانە و پێمانوایە كە زۆربەی هەرە زۆری خەڵكی خەباتكاری كوردستان لە گەڵ هەڵوێستی كۆمەڵە ئاشنان. بە كورتی دەتوانین بڵێین كە كۆمەڵگای ئێران دوای ئەم ڕووداوانە بە دڵنیاییەوە چۆتە قۆناغێكی نوێ و  بە تەواوی جیاوازەوە. ناڕەزایەتی لە دۆخی خراپی ئابووری بە خێرایەكی سەرسوورهێنەر چۆته ناو ئاشكراترین شێوازی دەربڕینی ناڕەزایەتی بە دۆخی سیاسی ئێران و داواكاری بۆ ئاڵ و گۆڕ لە نیزامی سیاسی ئێران. گشتییەتی دەسەڵاتی ئایینی چۆته ژێر پرسیار و داوای هەڵپێچانی دەكرێت. رێفۆرمخوازی حكوومەتی كە بۆ نزیك بە دوو دەیە جێگا و ڕێگای ئۆپۆزیسیۆنی ناوخۆیی و تا ڕادەیەك لە دەرەوەی وڵاتیشیان پاوان كردبوو و دووڕێیانی بژاردەی خراپ لە جیاتی خەراپتریان كردبوو بە فەلسەفەی سیاسی بەشێكی بەرچاوی چین و توێژە ناڕازییەكانی ئێران، بە ڕاشكاوانەترین زمان خرانە پاڵ باڵەكانی دیكەی ڕژیم و بۆ یەكەمین جار ئاڵ و گۆڕ لە گشتییەتی نیزامی سیاسی ئێران بە هەموو باڵەكانییەوە، بوو بە ئامانجی خەڵكی وەگیان هاتووی كۆمەڵگا.
شەپۆلی ناڕەزایەتی خەڵكی ئێران لە مانگی بەفرامباردا لە شێواز و پێكهاتەی بەشداربووانیش بە تەواوی خۆی لە بزووتنەوەی ناوزەدكراو بە "سەوز" جیا كردەوە. چینە بندەست و هەژارەكان دەورێكی بەرچاوتریان گێرا و پانتایی ژێئۆپۆلیتیكی بزووتنەوەكە بەرینتر بوو، بە جۆرێك نزیك بە سەدشاری ئێرانی گرتەوە.
دەتوانین بڵێین كە ناڕەزایەتییەكان بە شێوەیەكی گشتی ئەم جارە زۆرتر لە گەڵ خواست و ئارەزووی كورد هاوتەریبە. خواستی نەمانی دامودەزگای كۆماری ئیسلامی هەمیشە خواستێكی گەڵی كورد بووە هەرچەن ئەوەش ئاشكرایە كە كورد بە هێزی خۆی بە تەنیا ناتوانی ئەو ئاواتەی وەدی بێنێ.
نەتەوەی كورد لە ئێران وێڕای نەتەوەبندەستەكانی دیكەی ئێران دەبێ چالاكانە لەو حەرەكەتە ئێعترازییانەدا بەشداری بكات و دروشم و خواستەكانی خۆی بباتە ناو بزووتنەوەكەوە. ئاشكرایە كە بە  لەبەرچاو گرتنی ئەزموونی گەلی كورد كه بەرهەمی چوار دەیە خەبات لە دژی ئەم ڕژیمە و پێشكەشكردنی قوربانێكی زۆر لە پێناو ئەم خەباتەیه، رێزێكی تایبەت و سەنگێكی قورسی هەیە لە نێو خەڵكی خوازیاری دێمۆكراسی و به خاتەرجەمیەوە دەتوانین چاوەڕوان بین كە بەشداری گەلی كورد چ به شێوەی بەربەرەكانێ لەگەڵ هێزە سەركووتگەرەكان و چ لە بواری ناوەرۆك و زوڵاڵی دروشمەكان و داخوازییەكان ئاستی بزووتنەوەكە بەرزتر دەكاتەوە.
ڕوانینی كورد و قوتبنماكەی وەك نەتەوە و هێزە سیاسییەكان و حیزبەكانی، دەبێ لەو ڕاستییەوە سەرچاوە بگرێ كە لە ئێران هیچ كەس بە ئەندازەی كورد لە ڕووخانی كۆماری ئیسلامی قازانج ناكات و كورد سوودمەندی پلەی یەكە لە پێشچوونی دێمۆكراسی.
لە هەمان كاتدا دەبێ بزانین كە ئێستا و بەو بارودۆخەی هاتۆتە پێش، یەكگرتوویی ناو كورد و هێزە سیاسییەكان لە هەمیشە زۆرتر بۆتە پێویستییەكی هەنووكەی و بێ ئەملاو و ئەولا. دەبێ بە خێرایی وردە كێشەكەكان و ئاستەنگە خۆدروستكراوەكان بخرێنە لاوە و بڕۆین بەرەو بەرەیەكی بەرفراوانی نەتەوەیی كە هێزە ڕەسەنەكان و هەموو كەسایەتییە نیشتمان پەروەر و پێشكەوتووخوازەكان بگرێتە خۆ.
كوردی ئێران دەمێكە لەنێو ڕای گشتی و كۆڕ و كۆمەڵە نێوە نەتەوەییەكان پشت گوێ خراوە و جێگە و پێگەی خۆی بۆ نەسەلمێندراوە. كوردی ڕۆژهەڵات پێویستی بە خۆرێكخستنێكی هەمەگیری نەتەوەییە لە شێوازی كۆنگرەی كوردی ئێران و یان ڕۆژهەڵات كە حزووری كورد لە هەموو هاوكێشەیەك هەم لە ئاستی ناوخۆیی ئێران، ناوچەیی و یان نێو نەتەوەیی زەمانەت و گارانتی بكات.

خەڵكی خەباتكار!
دۆستان و دڵسۆزانی بزووتنەوەی ڕەوای كورد لە ئێران!
بە خاترجەمیەوە، لە حاڵەتی پەرەسەندنی بزووتنەوەی سەرتاسەری ئێران، چاوەكان و سرنجەكان بەرەو ئێمە ڕادەكێشرێ، ئێمە دەزانین كە ئەو چاوانەی دەبڕدرێتە كورد و هەڵویستەكانی هەم هی نەیارانە و هەم دەتوانێ هی هاوپەیمان و دۆستانی كوردیش بێ. كورد نابێ وەك نەتەوەیەكی پەرەم پەرەم و لێك بڵاو و تەنیا وەك حیزب بەشداری ئەم بزووتنەوە بێت. دەبێ تێگەیشتووی و پێگەیشتووی خۆمان نیشان بدەین و هاوتەریب لە گەڵ ئیدیعای بەرحەق و ڕەوامان وەك نەتەوە بێینە ناو ئەو گۆڕەپانە.

ئەندامان، پێشمەرگەكان و لاینگرانی كۆمەڵە!
قۆناغی نوێی سیاسی لە ئێران، تین و تەوژمێكی زۆرتر لە هەموومان دەخوازێ، لە چالاكی و هەڵسووڕان لە پێناو ئەركە حیزبییەكانمان، دەبێ بە تەواوی مانا، قۆڵی لێهەڵماڵین و وزە و توانامان بخەینە سەر یەك. یەكگرتوویی و پتەوی ڕیزەكانمان شەرتی هەرە سەرەكی یەكگرتووی لە نێو بزووتنەوەكە و پێشچوونی ئامانجەكانمانە. ڕێباز و سیاسەتەكانی كۆمەڵە چ لە پێوەند لە گەڵ بزووتنەوە كۆمەڵایەتییەكان و لە سەروی هەمووان بزووتنەوەی كرێكاران و چینە بندەست و هەژارەكانی كۆمەڵگای كوردەواری و چ لە پێناو وەسەرخستنی بزووتنەوەی حەقخوازانە كورد وەك نەتەوەیەك و مافی دیاریكردنی چارەنووس هەمیشە شەفاف و بێگرێ و گۆڵ بووە.

خۆمان بۆ ئەركە گەورەكان و بەرپرسایەتییە مێژوییەكان ئامادە كەین، ئەم جارەش وەك هەمیشە كۆمەڵە لەو تاقیكردنەوە مێژوییەیانەدا سەركەوتوو بێنینه دەر.

پیرۆز بێت ٢٦ی ڕێبەندان
بڕوخێ ڕژیمی كۆماری ئیسلامی
سەركەوێ بێ بزووتنەوەی ڕزگاریخوازی گەلی كورد
14‏/02‏/2018
٢٥ی ڕێبەندان ١٣٩٦

ئه‌م بابه‌ته 684 جار خوێنراوه‌ته‌وه‌‌

PM:12:34:15/02/2018