راگەیاندنی كومیتەی دەرەوەی وڵات به بۆنەی مەرگی ناوەختی هاوڕێ فەریبا مستەوفی

زۆر بەداخەوه ئاگادار كراینەوه كه هاوڕێ فەریبا مستەوفی خوشكی هاوڕێی تێكۆشەرمان كاك فەرشاد مستەوفی دوای چەند ساڵ بەربەرەكانێ لەگەڵ نەخۆشی (MS) رێكەوتی ١٣ی دیسەمبری ٢٠١٧ له وڵاتی هولەند ماڵئاوایی له ژیان كردووە.

فەریبا خانم ساڵی ١٣٣٦ له كرماشان چاوی بە ژین پشكوت و هەر لەم شاره خوێندنی دەست پێ كرد. لەگەڵ راپەرینی گەلانی ئێران دژی رژیمی دیكتاتۆری شای ئێران، هاوڕێ فەریبا به هۆی بنەماڵەی تێكۆشەریان و دۆخی سیاسی ئەوكات تێكەڵ به كاروباری سیاسی بوو و له رێكخستنەكانی كۆمەڵه درێژەی با كار و هەڵسووڕانی سیاسی خۆیدا. ساڵی ١٣٦٠ كۆمەڵێك له هاوڕێیانی رێكخستنی نهێنی له لایەن ئیتلاعاتی رژیمەوه دەسبەسەر كران و هاوڕێ فەریباش لەگەڵ ئەو هاوڕێیانه گیرا و كەوته بەندیخانەی رژیمەوه. هاوڕێ فەریبا زیاتر له ٤ ساڵ له زیندانەكانی رژیمی دژی ئازادی ئێران دەسبەر كرا و قارەمانانه له بەرامبەر ئەشكەنجه و ئازاری جەللاد و زیندانەوانەكان خۆڕاگری كرد و كۆڵی نەدا تا ئەوەی كه ساڵی ١٣٦٥ ئازاد بوو.
ساڵی ١٩٩٥  ئەم هاوڕێیەمان هاته دەرەوەی وڵات و له وڵاتی هولەند نیشتەجێ بوو. بەداخەوه فەریبا خانمی خۆشەویست تووشی نەخۆشی (MS) بوو و هەر ئەم نەخۆشینەش بەرە بەره هێز و وزەی لەم ژنه تێكۆشەره بڕی و تا سەرئەنجام مەرگی ناوەخت دڵی پڕ ئاواتی له لێدان خست و نەیهێشت روخانی رژیمی دیكتاتۆری ئیسلامی و شكانی زیندانەكان و ئازادی وڵات به چاوانی پڕشنگدار و چاوەڕوانی خۆی ببینێ.
كومیتەی دەرەوەی وڵات بە بۆنەوەی مەرگی هاوڕێ فەریباوه سەرەخۆشی گەرمی خۆی ئاراستەی هاوڕێی خۆشەیستمان كاك فەرشاد مستەوفی و گشت بنەماڵەی بەڕێزیان دەكا و خۆمان بە شەریكی خەم و پەژارەیان دەزانین. دڵنیاین یادی هاوڕێ فەریبا له دڵ و بیری نەوەكانی داهاتووی كوردستاندا بۆ هەمیشه زیندوو دەمێنێ و خۆڕاگری و قارەمانێتی ئەم هاوڕێ تێكۆشەرەمان رێزی لێ دەگیرێ.
یادی ئازیزی بەرز و بەڕێز بێ.  
   

كۆمەڵەی شۆڕشگێڕی زەحمەتكێشانی كوردستانی ئێران
كومیتەی دەرەوەی وڵات


ئه‌م بابه‌ته 1139 جار خوێنراوه‌ته‌وه‌‌

AM:12:28:20/12/2017