دیداری نێوان حیزبی دێمۆكراتی كوردستان و كۆمەڵەی شۆڕشگێڕ

سەر لەبەیانی ڕۆژی دووشەممە، ٢٧ی نوامبری ٢٠١٧ی  زایینی (٦ی سەرماوەزی ١٣٩٦ی هەتاوی) هەیئەتێكی سەركردایەتی حیزبی دێمۆكراتی كوردستان بە سەرپەرشتی بەرێز مستەفا مەولوودی سكرتێری گشتیی و پێكهاتوو لە بەڕێزان كەمال كەریمی ئەندامی دەفتەری سیاسی، قادر وریا ئەندامی دەفتەری سیاسی، سۆران نووری ئەندامی كومیتەی ناوەندی، عەلی بوداغی ئەندامی ڕاوێژكاری كومیتەی ناوەندی و فەتاح ئیلخانیزادە ئەندامی ڕاوێژكاری كومیتەی ناوەندی سەردانی بارەگای ناوەندی كۆمەڵەیان كرد و لە لایەن هەیئەتێكی سەركردایەتی كۆمەڵەوە بە سەرپەرەشتی بەڕێز عەبدوڵڵا مۆهتەدی سكرتێری گشتیی و پێكهاتوو لە بەڕێزان فارووق بابامیری ئەندامی دەفتەری سیاسی، ساڵح شەریفی ئەندامی دەفتەری سیاسی، عەبدوڵڵا ئازەربار ئەندامی دەفتەری سیاسی، ئیبراهیم محەمەدی (مینەشەم) ئیدریس كۆلاهدووزی ئەندامی كومیتەی ناوەندی، موختار ئەحمەدی ئەندامی كومیتەی ناوەندی و بەختیار عەلیار ئەندامی كومیتەی ناوەندی بە گەرمی پێشوازییان لێ كرا.
كۆبوونەوەكە لە كەش و هەوایەكی دۆستانەدا بەڕێوە چوو و چەند تەوەری گرنگی كوردستان، ئێران و ناوچەكە هاتە بەر باس و لێكدانەوە. گشتپرسی مانگی سێپتامبری كوردستانی باشوور و بارودۆخی ئێستا باشووری كوردستان و كاریگەرییەكانی لەسەر حیزبە رۆژهەڵاتییەكان و چۆنییەتی ڕووبەڕوو بوونەوە لەگەڵ ئەو گۆرانكارییانە، یەكێك لە تەوەرەكانی ئەم دیدارە بوون. باسێكی تری ئەم دانیشتنە بارودۆخی ئێستای ڕۆژهەڵاتی كوردستان بوو. هەردووكلا لەو بڕوایەدابوون كە ئاخێزی جەماوەری خەڵك بۆ پشتیوانی لە گشتپرسی كوردستانی باشوور لە لایەك و خۆلقاندنی حەماسەیەكی گەورەی نەتەوەیی بۆ پشتیوانی و بەهاناچوون و هاوكاری بەربڵاو بۆ زیانبەركەوتووانی بوومەلەرزەی كرماشان دەریخست كە هەستی نەتەوەیی و ئازادیخوازانە تا چ ڕادەیەكە و دەكرێ وەك گشتپرسییەكی كورد لە كوردستانی رۆژهەڵات لێكبدرێتەوە.
لە درێژەی باسەكان دا دەستێوەردان و پیلانگێرییەكانی ئێران لە ناوچەكە و شێواندی ئەمنییەتی ڕۆژهەڵاتی ناوەراست لە لایەن ڕژیمی كۆماری ئیسلامی كەوتە بەر باس و لێكدانەوە و هەردووكلا كۆك بوون لەسەر ئەوەی كە ئەم كردەوانەی ئێران ناكرێت لە لایەن كۆمەڵگای نێونەتەوەییەوە چاوپۆشی لێ بكرێت و ئەمەش دەتوانی هەلێكی گونجاو بێت بۆ كوردی ڕۆژهەڵات و لە هەمان كات دا مەترسییەكی جیددی بە دوای خۆی دا بێنێت. لە هەردووك حاڵدا هاوكاری زیاتری نێوان هێزە كوردییەكان پێویستە و پێویستی یەكگرتوویی و یەكدەنگی هێزەكانی كوردی ڕۆژهەڵات لە هەموو كاتێك زیاتر دەردەخات.
تەوێرێكی تری باسەكان هەڵسەنگاندن و لێكدانەوەی دەستبەكاربوونی شۆرای دێمۆكراسیخوازانی ئێران  و بەشداری كۆمەڵە و حیزبی دێمۆكراتی كوردستان لەم  شۆرایە دا بوو. دوو لایەن پێداگرییان لە سەر بەشداری چڕ و پڕی خۆیان لەو شۆرایەدا كرد و جەختییان لەسەر ئەوە كردەوە كە پەیوەندی بەربڵاو لەگەڵ لایەنە ئێرانی و سەراسەرییەكان دەتوانێ یارمەتیدەرێكی باش و كاریگەر بێت بۆ دژایەتی لەگەڵ كۆماری ئیسلامی و هەنگاوێكی كاریگەر بێت بۆ دەستەبەركردنی مافی ڕەوای هەموو نەتەوەكانی ئێران لە داهاتووی ئێرانێكی ئازاد دا.
لە كۆتاییدا هەردووك لا پێداگرییان لەسەر پەرە پێدانی هاوكارییە هاوبەشەكان كرد و هاوكات بڕیار لە سەر چۆنییەتی بەرێوە بردنی كۆمەڵێك هەنگاوی كردەیی  بۆ بە ئەنجام گەیاندی ئەو هاوكارییانە درا.
 پاش چەند كاتژمێر قسە و باسی تێر و تەسەل لەسەر بابەتگەلی جۆراوجۆر كۆبوونەوەكە كۆتایی پێهات و هەیئەتی حیزبی دێمۆكراتی كوردستان لە لایەن كۆمەڵەوە بەڕێ كرانەوە.



ئه‌م بابه‌ته 481 جار خوێنراوه‌ته‌وه‌‌

PM:10:19:27/11/2017