ڕاگەیاندنی كۆمەڵە سەبارەت بە مەرگی "دایە ئامین"

دایكێكی شۆڕشگێڕی كوردستان ماڵئاوایی لە ژیان كرد

بە داخەوە سەر لە بەیانی ڕۆژی پێنجشەممە، ١١ی خەزەڵوەری ١٣٩٦ی هەتاوی "دایە ئامین" دایكی هاوڕێی گیانبەختكرووی كۆمەڵە (ڕەحیم باب)، هاوسەری پێشمەرگەی دێرینی كۆمەڵە "لالە حەمە"، دایكی هاوڕێیان شوانە و مام ڕەحمان و تێكۆشەری ماندوونەناسی ناو ڕیزەكانی كۆمەڵە، پاش تەمەنێك ڕەنج و خەبات، لە بارەگای ناوەندی كۆمەڵە لە نزیك شاری سلێمانی بە هۆی نەخۆشییەوە دڵە گەورەكەی لە لێدان كەوت و ماڵئاوایی لە ژیان كرد.

دایە ئامین، نموونەی دایكێكی خەباتكار و خۆنەویستی كوردستان بوو، بە شێوەیەك كە زیاتر لە ٣٠ ساڵی تەمەنی لە گەڵ لالە حەمەی هاوژینی لە بنكە و بارەگاكانی كۆمەڵەدا ژیا و دایكی دڵسۆزی هەموو پێشمەرگەیەكی كۆمەڵە بوو.
ماڵی دایە ئامین و لالە حەمە هەمووكات و بە تایبەتی لە پرۆسەی ساغكردنەوەی كۆمەڵەی شۆڕشگێر لە ساڵی ٢٠٠٠ی زایینی دا وەك مەقەڕی كۆمەڵە وا بوو.
پڕبەدڵ سەرەخۆشی لە لالە حەمە، مام رەحمان و شوانە و هەموو كچەكانیان و منداڵ و نەوەكانی دەكەین و خۆمان بە شەریكی خەمیان دەزانین.

سكرتارییەتی كۆمەڵەی شۆڕشگێڕی زەحمەتكێشانی كوردستانی ئێران
١١ی خەزەڵوەری ١٣٩٦ی هەتاوی
٢ی نوامبری ٢٠١٧ی زایینی


ئه‌م بابه‌ته 215 جار خوێنراوه‌ته‌وه‌‌

PM:01:07:03/11/2017