کومیتەی کۆمەڵە لە كۆڕی ماتەمینی مام جەلال لە نۆروێژ بەشداری کرد

لە سەر بانگهێشتی لیژنەی ئامادەكاری ڕێوڕەسمی پرسە بۆ سەرۆك مام جەلال، ڕۆژی یەكشەممە ڕێكەوتی ٨ی١٠ی٢٠١٧ی زایینی، بە بەشداری سەدان كەس لە تێكۆشەرانی یەكێتی نیشتمانی كوردستان، چالاكانی سیاسی  و مەدەنی سەر بە حیزب و ڕێكخراوەكانی چوار پارچەی كوردستان، كۆمەڵێكی زۆر كەسایەتی سەربەخۆ و هەروەها سەفیری عێراق، كۆڕیادێكی بەشكۆ بە بۆنەی ماڵئاوایی كردنی بەڕێز مام جەلال تاڵەبانی لە شارۆچكەی لیلێسترۆمی وڵاتی نۆروێژ بەڕێوەچوو.
لەم ڕێوڕەسمەدا كە تێیدا سروودی نەتەوەیی و خولەكێک بێدەنگی ڕاگیردرا، بەڕێز هەندرێن باوەنووری بە ناوی كۆمیتەی یەكێتی نیشتمانی کوردستانەوە بەخێرهاتنی ئامادەبووانی كرد و كورتە پەیامێكی خوێندەوە، كۆمەڵێك  پەیامی هاوخەمی بە بۆنەی ماڵئاوایی مام جەلال لە لایەن حیزب و ڕێكخراوەكان و هەروەها دەستەی بەڕێوەبەری ڕێوڕەسمەكە خوێندرایەوە و كۆمەڵێکی زۆر برووسكە لە لایەن كەسایەتییەكان و حیزب و ڕێكخراوەكان گەیشتە دەستی بەڕێوەبەرانی ڕێوڕەسم كە لە بەر چڕی و پڕی بەرنامەكە تەنیا ئاماژە بە ناوەكانیان كرا.
لە میانەی ڕێوڕەسمەكەدا پاش خوێندنەوەی چەند بەرهەمی شێعر و پەخشان، كورتە فیلمێک لە ژێر ناوی "دڵۆپێك لە دەریای ژیانی مام جەلال" كە لە لایەن كۆمیتەی نۆروێژی یەكێتی نیشتمانی كوردستان ئامادەكرابوو پێشكەش كرا.
لە كۆتایی دا هاوڕێ ئیبراهیم كۆنەپۆشی بە ناوی دەستەی بەڕێوەبەری ڕێوڕەسمەكە كورتە بابەتێكی پێشكەش كرد و تێیدا سوپاسی بەشداربووانی كرد و وێڕای دەربڕینی سەرەخۆشی لە بنەماڵەی بەڕێز مام جەلال و هەموو تێكۆشەرانی یەكێتی و بەشداربووانی ڕێوڕەسمەكە هیوای سەبووری بۆ هەموولایەك خواست و بەم شێوەیە ڕێوڕەسمەکە کۆتایی پێهات.
شایانی باسە ئەم ڕێوڕەسمە لە لایەن لیژنەی بەڕێوەبەری ڕێوڕەسمی ڕێزگرتن لە یاد و خەباتی بەڕێز سەرۆك مام جەلال ڕێكخرابوو كە دەستەی بەڕێوەبەری پێكهاتبوون لە نوێنەرانی ئەو حیزب و  ڕێكخراوانە:
كۆمەڵەی شۆڕشگێڕی زەحمەتكێشانی كوردستانی ئێران/ نۆروێژ
پارتی دیموكراتی كوردستان/نۆروێژ

حیزبی دیموكراتی كوردستان/نۆروێژ
پارتی سەربەستی كوردستان/نۆروێژ
حیزبی دیموكراتی كوردستانی ئێران/نۆروێژ
سازمانی خەباتی كوردستانی ئێران/نۆروێژ
یەكێتی نیشتمانی كوردستان/نۆروێژ

كۆمەڵەی شۆڕشگێڕی زەحمەتكێشانی كوردستانی ئێران
كۆمیتەی نۆروێژ




ئه‌م بابه‌ته 247 جار خوێنراوه‌ته‌وه‌‌

PM:09:09:09/10/2017