كۆمیتەی هاوكاری هێزە سیاسییە کوردستانییەکان لە نۆروێژ کۆبوونەوە

ڕۆژی یەكشەممە ڕێكەوتی ١ی١٠ی٢٠١٧ كۆمیتەی هاوكاری هێزە سیاسییە كوردستانییەكان لە نۆروێژ بە ئامادەبوونی زۆرینەی نوێنەرانی ئەندام لەو كۆمیتەیە كۆبوونەوەیەكی بەڕێوەبرد.
سەرەتا لە لایەن كاك ڕێبوار ئەحمەدزادە بەخێرهاتنی ئامادەبووان كرا و تەوەری كۆبوونەوەكانی باس كرا.
دەستووری كۆبوونەوە بریتی بوو لە باس گەلێك لە سەر پرسی ڕیفڕاندۆم و بابەتی سەربەخۆیی كوردستانی باشوور.
پشتیوانی كوردانی پارچەكانی دیكە لە ڕێفراندۆمی كوردستان و گیراوەكانی ئەم دواییانەی كوردستانی ڕۆژهەڵات كە لە لایەن هێزەكانی كۆماری ئیسلامیەوە  دەستبەسەر كراون تەوەرێکی دیکەی کۆبوونەوەکە بوو.
خاڵی سێهەم پلانی كاری داهاتووی كۆمیتەی هاوكاری بوو لەمەڕ ئەو دوو پرسەی سەرەوە.
نوێنەرانی ئامادە بوو پاش هەڵسەنگاندنی چالاكییەكانی كۆمیتەی هاوكاری لەو پێوەندییەدا پێشنیار و تێبینییەكان و گەڵاڵەی خۆیان لە مەڕ ئەو پرسانە و هەوڵەكانی كۆمیتەی هاوكاری باس كرد.
لە ئاكامدا كۆمیتەی هاوكاری بڕیاریدا، نامەیەك ئاراستەی پاڕلمان، وەزارەتی دەرەوەی نۆروێژ، ناوەندەكانی مافی مرۆڤ، سەفارەتی وڵاتە بیانییەكان لە نۆروێژ، حیزبەكانی نۆروێژ بكات و هەوڵی چاوپێكەوتن لە گەڵ پاڕلمانتارە نۆروێژییەكان بدرێت بۆ گەیاندنی بابەتی سەربەخۆیی و دەنگی گیراوەكانی كوردستانی ڕۆژهەڵات بە ناوەندەكانی دەسەڵات.
هەروەها كۆمیتەی هاوكاری بڕیاری داوە ڕۆژی هەینی ڕێكەوتی ٦ی ١٠ی ٢٠١٧ خۆپیشاندانێك لەبەر دەركی وەزارەتی دەرەوەی نۆروێژ بەڕێوە ببات بۆ پشتیوانی لە گیراوەكانی كوردستانی ڕۆژهەڵات و داوا لە وەزارەتی دەرەوەی نۆروێژ بكات كە لە ڕێگای سەفارەتی كۆماری ئیسلامی لە نۆروێژ گوشار بهێنێت بۆ كۆماری ئیسلامی بە مەبەستی ئازاد كردنی گیراوەكانی كوردستانی ڕۆژهەڵات.
كۆمیتەی هاوكاری هێزە سیاسییە كوردستانییەكان لە نۆروێژ پێكهاتووە لە ١٠ حیزبی كوردستانی سەر بە هەر چوار پارچەی كوردستان. بۆ ئەو كۆبوونەوەیە لە لایەن كۆمەڵەوە كە یەكێك لە ئەندامانی كۆمیتەی هاوكارییە هاوڕێیان "ئیبراهیم كۆنەپۆشی" و "ئاسۆ قادری" بەشدارییان كرد.

كۆمەڵەی شۆڕشگێڕی زەحمەتكێشانی كوردستانی ئێران
كۆمیتەی نۆروێژ

ئه‌م بابه‌ته 492 جار خوێنراوه‌ته‌وه‌‌

PM:03:53:02/10/2017