ڕاگەیاندنی كۆمەڵە سەبارەت بە خۆپیشاندانەكانی خەڵكی كوردستانی ڕۆژهەڵات بۆ پرسی سەربەخۆیی كوردستان

ئێوارەی دوێنێ خەڵكی شارەكانی كوردستانی ڕۆژهەڵات بە جۆش و خرۆش و ڕێكخستنی كارناواڵگەلی شكۆمەندی ڕەنگ و شادی و خۆشی بۆ پشتیوانی لە پرسی ڕێفراندۆم و سەربەخۆیی كوردستانی باشوور لە ژێر زۆرترین هەڕەشە وزەبروزەنگی هێزە ئەمنییەتییەكانی ڕژیمی كۆماری ئیسلامیدا، خەڵكی كوردستانی ڕۆژهەڵات بەپانتایی هەموو وڵات ڕژانە سەر شەقامەكان و وێڕای دەربڕینی خۆشحاڵ و پیرۆزباییان بۆ پرسی سەربەخۆی كوردستانی باشوور، بەو نافەرمانییە مەدەنییە بەرین و بوێرانەیە، بەو هێز نواندنە سەربەرزانەیە، ویست و ئیرادەی خۆشیان بۆ ئازادی و ڕزگاری كوردستانی ڕۆژهەڵات دەربڕییەوە.
بە دوای وەڕێكەوتنی چەندین كەمپینی پشتیوانی خەڵكی كوردستانی ڕۆژهەڵات بۆ پرسی ڕێفراندۆم و سەربەخۆی كوردستانی باشوور و لەوانە كەمپینی كارناواڵی ڕەنگەكان و هەروەها پشتگیری و پشتیوانی حیزب و لایەن سیاسییەكانی كوردستانی ڕۆژهەڵات و لە سەرو هەموویانەوە پشتگیری گەرمی كۆمەڵەی شۆڕشگێڕی زەحمەتكیشانی كوردستانی ئێران لەم پرسە، خەڵكی كوردستانی ڕۆژهەڵات بەهاتنە سەر شەقام و بە بەخشینەوە گوڵی سوور و بڵاوكردنەوەی شیرینی، شایی و هەڵپەڕكێ و بەرزكردنەوەی ئاڵای كوردستان و بە پۆشینی جل و بەرگی ڕازاوەی كوردییەوە، خۆشحاڵی خۆیان بەرامبەر بەو دەستكەوتەی بزووتنەوەی كورد لە كوردستانی باشوور دەربڕی و هاوكاتیش بە وتنەوەی دروشمی شۆڕشگێڕانە ویست و داواكارییە سیاسییە ڕەواكانی بزووتنەوەی خەڵكی كوردستانی ڕۆژهەڵاتیان دووپات كردەوە.
بەشداری جەماوەرێكی بەرین لە شارەكانی سنە، بۆكان، مەهاباد، سەقز، بانە، جوانڕۆ، ڕوانسەر، مەریوان، كامیاران، سەردەشت، پیرانشار و... جیا لە پشتیوانی و پشتگیری لە ئیرادەی خەڵكی كوردستانی باشوور و هەنگاونانیان بۆ سەربەخۆ بوون، دەرخەری زیندوویەتی و ڕوو لە گەشە بوونی بزووتنەوەی كوردە لە كوردستانی ڕۆژهەڵات، دەنگی ناڕەزایەتی بوو بەرامبەر بە سیاسەتە سەركوتگەرییەكانی ڕژیمی كۆماری ئیسلامی ئێران بەرامبەر بە كورد و خواستە ڕەواكانیانی لە ڕۆژهەڵات. خۆپیشاندانی جەماوەری و هاتنە سەر شەقامی بەرینی خەڵك لە شارەكانی كوردستان نیشانەی هێزی لەبن نەهاتوو و توانای بەرینی بزووتنەوەی خەڵكی كوردستانی ڕۆژهەڵاتە كە لە هەموو دەرفەتێك بۆ نیشاندانی توانای گەورە و بەهێزەی خۆی كەڵك وەردەگرێت.
كۆمەڵانی خەڵكی كوردستان بە ئامادە بوونیان لە سەر شەقامەكان وگردبوونەوە و ڕێكخستنی كەڕنەواڵگەلی گەورەی شادی و خۆشی و وتنەوەی دروشمی شۆڕشگێڕانە پەیامێكی بەهێزیان بە كۆماری ئیسلامی ئێران دا كە تا چەندە تامەزرۆی سەركەوتن و سەربەستین و لەم بۆنەیە و لەم ڕێگەیەوە جارێكی دیكە بەرامبەر بە داپلۆسین و سیاسەتی سەركوتی ڕژیم و هەموو هەوڵە و پیلانە شوومەكانی بەرامبەر بە كوردی ڕۆژهەڵات وەستانەوە. بەم مانایە ٢٥ی سێپتامبر (٣ی ڕەزبەر) هەم ڕۆژی نیشاندانی ئیرادە و ویستی كوردستانی باشوور و هەم ڕۆژی سەلماندنی ڕۆژهەڵات تەوەری بوو لە كوردستانی ڕۆژهەڵات بوو.
كۆمەڵەی شۆڕشگێڕی زەحمەتكێشانی كوردستانی ئێران وێڕای پیرۆزبایی بۆ سەركەوتووانە و بە هێمنی بەڕێوەچوونی پرۆسەی ڕێفراندۆم بۆ سەربەخۆیی باشوور، پێزانی ڕێكخەران و بەشداربووانی نەترسی ئاكسیۆنە جەماوەرییەكانی كوردستانی ڕۆژهەڵات و چالاكانی مەدەنییە كە بە كرداری ئازا و بوێرانە خۆیان بەرهەڵستی ئەو گوتارە ناڕاست‌ و ئاراستەكراوەیان بوونەوە‌ كه هەوڵ دەدات بزووتنەوەی كوردی ڕۆژهەڵات لاواز نیشاندان و بێ هیوا و دەستەمۆی بكات. هەروەها سەركوتكاری و گرتن و دەستبەسەر كردنی چالاكان و بەشدار بووانی ئەو ئاكسیۆنە جەماوەرییانە خەڵكی كوردستانی ڕۆژهەڵات لە لایەن ڕژیمی كۆماری ئیسلامییەوە مەحكوم دەكات.

سەركەوێ بزووتنەوەی حەقخوازانەی خەڵكی كوردستان
كومیتەی ناوەندی كۆمەڵەی شۆڕشگێڕی زەحمەتكێشانی كوردستانی ئێران
٤ی ڕزەبەری ١٣٩٦ هەتاوی
٢٦ی سێپتامبری ٢٠١٧ی زایینی


ئه‌م بابه‌ته 977 جار خوێنراوه‌ته‌وه‌‌

AM:11:23:26/09/2017