بەشداری کۆمەڵەی شۆڕشگێڕ لە ۷۱ هەمین ساڵیادی دامەزراندنی پارتی دیموکراتی کوردستان




رۆژی چووارشەممە رێککەوتی ۱۶ی ئاگۆستی۲۰۱۷ی زایینی وەفدێکی کۆمەڵەی شۆڕشگێڕی زەحمەتکێشانی کوردستانی ئێران، بە بۆنەی ۷۱ هەمین ساڵیادی دامەزراندنی پارتی دیمۆکراتی کوردستان سەردانی دەفتەری پێوەندییە کوردستانییەکانی پارتی دیمۆکراتیان کرد لە شاری هەولێر و لە لایەن بەڕێز  کاک دوکتور کەماڵ کەرکوکی ئەندامی مەکتەبی سیاسی و
کاک عەلی حسێن بەرپرسی پێوەندییە کوردستانیەکانی پارتی دێمۆکراتی کوردستان بە گەرمی پێشوازییان لێکرا.


وەفدی کۆمەڵەی شۆڕشگێڕ کە پێکهاتبون لە هاوڕێیان، ساڵح شەریفی بەرپرسی کۆمیسیۆنی پەیوەندییەکان و سامان ریشەساحێب جێگری نوێنەرایەتی کۆمەڵە لە هەولێر، بروسکەی پیرۆزبایی سەرکردایەتی کۆمەڵەی شۆڕشگێڕیان ئاراستەی مەکتەبی سیاسی پارتی دیمۆکرات کرد کە لە خوارەوە دەقی پەیامەکە هاتووە.


............................................

بۆ/ بەڕێز مەکتەبی سیاسی پارتی دیموکراتی کوردستان
ب/ بروسکەی پیرۆزبایی
لە گەڵ سڵاو رێز

بە بۆنەی 71 یەکەمین ساڵیادی دامەزراندنی پارتی دیموکراتی کوردستان گەرمترین پیرۆزبایی خۆمان ئاراستەی سەرکردایەتی، کادر و ئەندامان و پێشمەرگەکانی پارتی دیموکراتی کوردستان وجەماوەرە تێکۆشەرەکەتان دەکەین.
71ساڵ تێکۆشانی بێ وچانتان ناسنامەی خەباتی پڕ لە هەوراز و نشێوی پارتی دیموکراتی کوردستان و خەڵکی تێکۆشەر وئازادیخوازی کوردە کە لە مێژووی خەباتی گەلانی زۆڵم لێکراودا بوەتە هێما و پێناسەیەکی نەتەوایەتی.
بێگومان پارتی دیموکراتی کوردستان بە درێژایی ئەم خەباتە فیداکاری کردووە و قوربانی داوە و دەور رۆڵێکی حاشاهەڵنەگری گێڕاوە. ئەمڕۆ پرسی کورد لە کوردستانی باشوور بە خۆشیەوە قۆناغە سەخت و دژوارەکانی تێپەڕاندووە و دەیهەوەێ بە ئەنجامدانی رێفراندۆم بەرەو ئاسۆیەکی گەشتر هەنگاو بنێت. بیگومان لەم بارودۆخەدا ئەرکی سەرجەم حیزب و لایەنە سیاسیەکانی بە گشتی و هەروەها ئەرک و بەرپرسیاریەتی پارتی دیموکراتی کوردستان لە هەموو کات زیاتر و بەرچاوترە. ئێمە وەک کۆمەڵەی شۆڕشگێڕ وێڕای رێز گرتن لە ئیرادەی خەڵکی ئازادیخوازی کورد و سەرجەم پارتە تێکۆشەرەکانی لە سەر هاودەنگی و یەکگرتوویی هەرچی زیاتری جەماوەر و لایەنە سیاسیەکان جەخت دەکەینەوە و دامەرزاندن و بونیاتنانی دەوڵەت و کیانێکی کوردی بە مافی رەوای گەلی کورد دەزانین.
لەم دۆخەدا  لە سەر ئەو باوەڕەین پارتی دیموکراتی کوردستان وەک حیزبێکی خاوەن جەماوەر رۆڵ و کاریگەری خۆی لە سەر ئەم پرۆسەیەدا دەبێت.
لەم رۆژە و لەم بۆنە پیرۆزەدا پڕ بە دڵ هیوای سەرکەوتن و سەرفەرازیتان بۆ بە ئاوات دەخوازین و هەروەها لە سەر پتەوترکردنی پەیوەندییەکانی نێوان کۆمەڵەی شۆڕشگێڕ و پارتی دیموکراتی کوردستان پێداگری دەکەینەوە.
پیرۆز بێت 71یەکەمین ساڵیادی دامەزراندنی پارتی دیموکراتی کوردستان


کۆمەڵەی شۆڕشگێڕی زەحمەتکێشانی کوردستانی ئێران
16ی ئاگۆستی 2017ی زاینیی









ئه‌م بابه‌ته 557 جار خوێنراوه‌ته‌وه‌‌

PM:02:43:16/08/2017