ڕامانێك لەسەر كۆنگرەی 15ی كۆمەڵە

ئەبووبەكر مودەڕسی

كەمتر لە دوو مانگ لە تێپەربوونی  پانزدەهەمین كۆنگرەی كۆمەڵە دەگوزەرێ و كەش و هەوا و باڵ و سێبەری كۆنگرە هێشتا بە‌سەر چالاكییەكانماندا ماوە. بەڕاستیش حەقی خۆیەتی ئەگەر وابێت. ڕاستە كۆنگرە كورت ماوەبوو و لە ٢ رۆژ و نیودا تەواوبوو بەڵام پڕناوەرۆك بوو و دەوڵەمەند بەتایبەت كە راسپاردەشی زۆربوو؛ ئەوەنده بوو كە تا ئێستاش هەموومان پێوەی سەرقاڵین تا بەرنامە و پرۆگرامیان بۆ دارێژێن و ڕاسپاردەكان جێبەجێ بكەین‌. لەهەمان كاتدا  دەتوانین بڵێین ١٥هەمین كۆنگرەی كۆمەڵە لانیكەم بۆ قوناغێك، كۆتایی سەركەوتوانەی پرۆسەیەك بوو كە چەندین ساڵ پێش و تەنانەت هەر لە رەوتی بازسازیی كۆمەڵەوە دەستی پێكردبوو، واتە دروستكردنی حیزبێكی مۆدێرن، یەكگرتوو كە بەردەوام خۆ نوێ دەكاتەوە بۆ ئەوەی بڕوات بەروە‌ پێشوازی ئەركەكانی داهاتووی. كۆنگرەی ١٥ یەكێك لەو كۆبوونەوە گەورە حیزبیانە بوو كە بەتەواوی و لە ئاستێكی بەرزدا بە شێوازێكی حیرفەیی بەرێوەچوو. ئامادەكاری بۆ كۆنگرە لە ئاستێكی بەرزدا بوو و ئەو دەرفەتەی بۆ رەخساندین تا لەهەموو كاتەكان و مەجالەكانی كۆنگرە بەشێوەیەكی رەزمەندانه سودمەندبین. هەڵبەت با ئەوەش وەبیربخەینەوە كە دەسكەوتەكانی پەوەندیدار بەم بابەتە دیاردەیەكی لەناكاو و كتووپڕ نەبوو، بەڵكو پرۆ‌سەیەك بوو كە لە چەندین كۆنگرە و چەندین ساڵ لەوە پێش دەستی پێكردبوو و لە ١٥هەمین كۆنگرە دەسكەوتەكانمان بە باشی هەڵگرتەوە. ١٥هەمین كۆنگرەی كۆمەڵە هەوەڵین كۆنگرە بوو كە هاوكات و بەشێوەیەكی ڕاستەوخۆ بە مێدیایی كرا، میوانێكی زۆر تێیدا بەشداریان كرد و خۆی خستەبەر قەزاوەت و دیدەی جەماوەر و هەوڵینەدا خۆی لە كون و قوژبنەكانی حیزبدا بشارێتەوە.

یەكێك لە دەسكەوتەكانی هەرە گرینگی ئەم كۆنگرەیە هاتنی كۆمەڵێك هاوڕێی گەنج بەڵام بە ئەزموون بۆناو كومیتەی ناوەندی بوو. هاتنی ژمارەیەكی بەرچاو لە هاوڕێیانی گەنج بۆناو سەركردایەتی حیزبێكی قەدیمی و بە تەمەن، كە بۆ یەكەمین جار متمانەی بەڕێوەبردنی ئەركی سەركردایەتیی كۆمەڵەیان پێدەبەخشرا، لەخوێدا گرینگیی تایبەتی هەیە، سرنجڕاكێشتر ئەوەیە كە ئەو كارە لە كەش و هەوایەكی هاوڕێیانە و لێكتێگەیشتن و بە بێ ململانێ و دووبەرەكایەتیدا ئەنجامدرا. جگە لەوە، ئەمجارە بە بەراورد لەگەڵ جارانی پێشوو، بەشداربووانی كۆنگرە بە بەرچاوڕوونێكی زۆرترەوە دەنگی خۆیان دەخستە پاڵ كاندیداكانی خۆیان. بڵاوكردنەوەی سی. ڤی. و پرۆفایلی كاندیداكان، واژۆكردنی بڵێنیی وەئەستۆگرتنی بەرپرسیارێتی و ئەنجامدانی ئەركەكانی سەركردایەتی كەش و هەوایەكی جیددی و لەهەمان كاتدا متمانەبەخشی دەدا بە كۆنگرە و پرۆسەی هەڵبژاردنەكان. سنوورداربوونی ژمارەی كومیتەی ناوەندی رێگەی نەدەدا تا هەموو ئەو كەسانەی شایستەی ئەو پۆستە بوون هەڵبژێردرێن. ئەوەی بۆ سەركردایەتی لەو بارەوە ماوەتەوە، ئەوەیە كە كار و بەرپرسایەتی شیاویان بۆ لە بەرچاو بگرێ و هەر وەك هاوكاری نیزیك تەماشایان بكات.

كۆنگرەی كۆمەڵە دەستی دایە دەستپێشخەریە‌كی كاریگەر و بەڵگەی سیاسەت و هەڵوێستەكانی كۆمەڵەی پەسەند كرد. ناوەرۆكی ئەم سیاسەتانە لە بەڵگە بنەڕەتییەكان و پەسەندكراوەكانی پێشووی كۆمەڵەدا‌ هاتووە و لەوبارەوە بابەتەكانی تازە نین. بەڵام پێویستیی دووپاتكردنەوەیان بە زمانێكی سادەتر و كۆكردنەوەیان لە بەڵگەیەكدا یارمەتێكی باشە بۆ كادرەكانی كۆمەڵە، كاتێك بەرەورروی پرسیار دەبنەوە لەلایەن خەڵك و تەنانەت پێشمەرگەی ناو ریزەكانی خوێشمان لە بابەت سیاسەت و هەڵوێستەكانی كۆمەڵە. بەڵگەی سیاسەت و هەڵوێستەكانی كۆمەڵە كاری زۆری لەسەر كراوە و كاتێكی زۆری بۆ تەرخان كراوە تا دەقی كۆتاییەكەی ئامادەكراوە و و پێشكەش كراوە بە كۆنگرە، حەق وایە كە ریزەكانی كۆمەڵە و كادرەكان لە پلەی یەكەمدا ئیهتمامی باشی پێبدەن و بیكەنە بنەمایەك بۆ كاری ڕاهێنان و فێركاری لەناو ئۆرگانەكان و بەتایبەت فێرگە و ناوەندی فێركاری.

كۆنگرەكەمان بە سەركەوتنەكان و دەسكەوتەكان لە خۆبایی نەبوو و بە وردی كەم و كۆڕییەكانی خستەڕوو و دەستنیشانی كردن. ئەگەر لە گرینگترینی ئەو كەموكۆڕییانەوە‌ دەستپێبكەین، دەبێ بڕۆینە سەر پرسی ژنان لەناو حیزبی كۆمەڵەدا. تەنیا دوو هاوڕێی ژن لە كومیتەی ناوەندیی كۆمەڵە خۆی ئاماژەیەكی ئاشكرا و حاشاهەڵنەگرە لە كێشەیەكی مەزن لە ناو كۆمەڵە (بۆ ئەوەی وەك پاساوێك وەبەرچاو نەكەوێ باسی هەموو حیزبە رۆژهەڵاتییەكان ناكەین كە هەر بە هەمان دەرد گرفتارن).  كۆمەڵە خاوەن نەریتێكی قوڵ و پڕشنگدارە لە كردنەوەی دەرگای خەبات و بەرخۆدان بۆ ژنانی تێكۆشەری كۆمەڵگای كوردستان و كردنەوەی دەرگای حیزب بۆ تێكۆشانیان و رەخساندنی هەڵی باش بۆ چوونە سەری ئاست و پلەی حیزبی ژنان لەناو ریزەكانی خۆیاندا. لە هەمان كاتدا كۆمەڵە دەور و ڕۆڵێكی گرینگی گێڕاوە لە‌ هێنانەگۆڕێی پرسی ژنان و یەكسانی لە كۆمەڵگا و پارێزەری گەورەی مافی ئەوان بۆوە. كاریگەریی ئەو هەڵوێستە و ‌دەسكەوتەكانی بۆ كۆمەڵگای كوردستان و بزووتنەوەی رزگاریخوازی كوردستانی رۆژهەڵات لە هیچ كەس و لە هیچ مێژوونووسێكی بە ویژدان شاراوە نیە. كۆمەڵگای ئێستای و بەتایبەتی بزووتنەوەی كوردستان ژینگەیەكی زۆر كراوەترە بە نیسبەت وەرگرتنی داخوازییەكانی ژنان لە بەراورد لەگەڵ سی ساڵ لەوەپێش. دەوری كۆمەڵە لەو بارەوە هەر ئەو جۆرەی باسمان كرد حاشاهەڵنەگرە.
بەڵام ئەوەش حاشاهەڵنەگرە كە تەنیا بە شانازییەكانی ڕابردوو ناتوانی بەرەوڕووی هەل و مەرجی تازە و ئیمرۆیی ببیەوە؛ بوونی سەركردایەتی حیزبەكان لە باشوور، كەمبوونەوەی چالاكی پێشمەرگانە لەناوخۆ و تەنگەبەربوونی دەرفەتەكانی كار و بەرپرسایەتی جۆراوجۆر حیزبی لە ناو هێزی پێشمەرگە و ئۆرگانەكانی نیشتەجێ لە باشوور، بەتایبەتی لە وەگەڕخستنی وزە و بەهرە و توانای ژنان دەورێكی نێگاتیڤی هەیە. لە بەرامبەردا ژنانی تێكۆشەری كوردستان لە كۆمەڵگای كوردەواریی رۆژهەڵاتدا دەبینین كە  چەندە بە وزە و متمانە بەخۆ لە پێشەوەی چالاكییە مەدەنییەكان بوونیان هەیە. ژمارەیەكی زۆری ژنانی شۆڕشگێڕ هەن كە لە كار و چالاكی حیزبیش لە ریزی پێشەوەدان. لەو ساڵانەدا كۆمەڵگای ژنانی كوردستان لە ئاستی رۆشنبیری و خوێندەواری هەنگاوی مەزنیان بەرەو پێشەوە هەڵهێناوەتەوە. كۆمەڵە دەبێ رێكاری تازە بدۆزێتەوە تا هاتنی ژنان بۆ ناو كۆمەڵە و چالاكیان هاسانتر بكاتەوە و تا ئەو جێگایەی دەگەڕیتەوە بۆ‌ هاوڕێیانی ژن كە لەناو ریزەكانی كۆمەڵەدا چالاكن،  كۆنگرە و پێش ئەوەش لە سمینارەكانی ئامادەكاریدا،‌ بیرۆكەی تواناسازیی ژنان لەناو تەشكیلات و رێكخستنە حیزبییەكاندا هاتە بەرباس و لێكۆڵینەوە. به ‌خۆشییەوە تواناسازیی ژنان وەك یەكێك لە ڕاسپاردەكانی كۆنگرە دەنگی پێدرا و هەر ئێستا خەریكە دەڕواتە بواری جێبەجێكردنەوە.

بەڵام پرسی ژنان تەنیا خاڵی لاوازی چالاكیی كۆمەڵە نەبوو، ڕاگەیاندنی كۆمەڵە هەرچەند لە بەراورد لەگەڵ ساڵەكانی پێش ١٤ هەمین كۆنگرە، واتە كۆنگرەكەی پێشوو، پێشكەوتنی باشی بە خۆیەوە دیتووە، بەڵام هێشتا ناكارامەیی پێوە دیارە. لەكاتێكدا سەركردایەتیی كۆمەڵە بەگشتی و ریبەریی سیاسی چ راستەوخۆ و چ لە رێگای كۆنگرە و كۆنفرانسەكانەوە، بە تایبەت، لە هێنانەگۆڕێی گوتاری پێشكەوتوو و گونجاودا دەوری باشی گێراوە، بەڵام دەزگای ڕاگەیاندنی كۆمەڵە لە بڵاوكردنەوە و پەرەپێدانی گوتاری حیزبدا هێشتا ناكارامەیە و لەئاستی چاوەروانییەكاندا نیە. كۆمەڵە لەبابەت كادری قەڵەم بەدەست و نووسەرەوە زۆر دەوڵەمەندە و هیچ كەموكۆڕییەكی تایبەتی نیە. كاری رێكخستنی ڕاگەیاندنی كۆمەڵە دەبێ رێكاری باش بدۆزێتەوە بۆ ئەوەی نووسەران و رووناكبیرانی كۆمەڵە دەوری خۆیان هەبێ لە بڵاوكردنەوەی گوتاری كۆمەڵە و بردنە سەری ئاستی ووشیاریی سیاسیی جەماوەر و ریزەكانی كۆمەڵه.

لە ڕاپۆڕتی سیاسیی كۆنگرە كە سكرتێری كۆمەڵە پێشكەشی كرد، لە ئاستی لاوازیی كاری ڕاهێنان و فێركاری لەناو كۆمەڵە رەخنە دەگرێ و هەر بەو پێیەش ڕاسپاردەی كۆنگرە تەئكید دەكاتەوە لەسەر دامەزراندنی ناوەندێكی ڕاهێنان و فێركاری. پەروەردە لە كۆمەڵە نابێ بسپێردرێتە دەست رەوتە خۆڕسك و خۆبەخۆكان‌. ئەو كارە دەبێ هەرچی زۆرتر بە دامەزراوە ببێت و ئامانجەكانی بە نەخشە و‌ پلان و بەرنامەڕێژی بباتە پێش. لێرەشدا هەر وەك لە پرسی ژناندا ئاماژەمان پێدا، كۆمەڵە مێژوویەكی پڕ لە شانازی و دەسكەوتی بووە لەم بوارەدا. مەسئولینی سیاسی دەور و نەقشێكی بەرجەستەیان بینیەوە لە تەیاركردن و كارامەكردنی هێزی پێشمەرگە و ڕاگرتنی كەش و هەوای سیاسی و پێشكەونخوازانە لەناو ریزەكانی كۆمەڵە. دەبێ ئەو نەریتە پڕ لە شانازییە زیندوو كەینەوە.

دەكرێ قسەی زۆرتر بكەین لە سەر كۆنگرەی ١٥ ی كۆمەڵە و ڕاسپاردەكانی. بەڵام لە دورودرێژ كردنی باسەكە لە چوارچێوەی سەروتار خۆ دەبوێرین و بەشی ئەوەندە دەڵێین كە ١٥هەمین كۆنگرەی كۆمەڵە و سێبەرەكەی تا كۆنگرە دوایی هەر بە دوامانەوەیە و بە ڕاسپاردەكانی و بەڵگەنامەكانی و بە بەڵێنییەكانی بۆ ئێمەی ناوەندی چاوی لێمانە و كارەكانمان هەڵدەسەنگێنێ.
بە دڵنیایەوە ناهومێدی ناكەین.


ئه‌م بابه‌ته 662 جار خوێنراوه‌ته‌وه‌‌

PM:03:57:03/08/2017