بڕیاری رێفراندۆم پێویستیەکی مێژوویی وبابەتیە

دەقی راگەیاندنی کۆمەڵەی شۆڕشگێڕ لە بابەت پرسی رێفراندۆم



سەرئەنجام پاش ساڵەها ئەزموونی خۆبەڕێوەبردن و باس و ڕا گۆڕینەوە لەسەر رێفراندۆمی کوردستان، سەرۆکایەتی هەرێم، حکوومەت و زۆربەی حیزب و لایەنە سیاسییەکانی هەرێم بڕیاریاندا رۆژی ٢٥/٩/٢٠١٧ زاینیی بە ئەنجامدانی گشتپرسی سەربەخۆیی یان مانەوە لە گەڵ عێراق، ئەو ڕۆژە بکەنە رۆژی گەڕانەوە بۆ ئیرادە و دەسەڵاتی گەلی کوردستان بۆ دیاریکردنی چارەنووسی خۆیان.
کۆمەڵەی شؤڕشگێری زەحمەتکێشانی کوردستانی ئێران بەپێی هەموو پەیماننامە نێونەتەوەیەکان، پرەنسیپەکانی مافی مرۆڤ و مافی چارەی خۆنوسین، ئەم هەنگاوە وەک هەنگاوێکی گونجاو، یاسایی و بوێرانە، بەرز دەنرخێنێت و بەمافی ڕەوا و بێ ئەم لاو ئەولای جەماوەری خەڵکی کوردستان دەزانێت کە خۆیان بە دەست و ئیرادەی خۆیان چارەنوسی خۆیان دیاری بکەن.
ئێمە وێڕای پشتیوانی لە خواست و ئیرادەی گەلی کوردستان لە باشوور، هیوادارین لە ماوەی ئەم چەند مانگەدا تا کاتی جێبەجێ کردنی بڕیارەکە کۆدەنگێکی تەواو لە سەر ئەو پرسە گرینگە دروست بێت و گەلی کوردستان یەکدەنگ بڕوات بەرەو پیری ئەو گشتپرسییەوەو ئیرادەی خۆیان بۆ ئازادی و سەربەخۆیی بەرجەستە کەنەوە.


سکرتاریەتی کومیتەی ناوەندی کۆمەڵەی شۆڕشگێڕی زەحمەتکێشانی کوردستانی ئێران
١٣ی ژوئێنی ٢٠١٧ی زایینی
٢٣ی جۆزەردانی ١٣٩٦ی هەتاوی

ئه‌م بابه‌ته 849 جار خوێنراوه‌ته‌وه‌‌

PM:06:33:13/06/2017