پەیامی کۆنگرەی ١٥ کۆمه‌ڵه‌ بۆ: بنه‌ماڵه‌ی ئازیزی گیانبه‌ختکردوان! زیندانیانی سیاسی کۆمه‌ڵه‌! که‌مئه‌ندامانی سه‌نگه‌ر و پێشمه‌رگه‌ دێرینه‌کان!

پەیامی کۆنگرەی ١٥  کۆمه‌ڵه‌ بۆ:

بنه‌ماڵه‌ی ئازیزی گیانبه‌ختکردوان!
زیندانیانی سیاسی کۆمه‌ڵه‌!
که‌مئه‌ندامانی سه‌نگه‌ر و پێشمه‌رگه‌ دێرینه‌کان!


بنه‌ماڵه‌ی گیانبه‌ختکردوانی کۆمه‌ڵه‌!
ئێوه‌ وه‌ک بنه‌ماڵه‌ی گیانبەخکردوانی کۆمه‌ڵه‌، نه‌ک ته‌نیا نه‌وه‌ی هه‌وه‌ڵتان به‌ڵکو نه‌سلی دواییشتان که‌ له‌ ناو ئامێزی پڕ له‌ سۆز و هه‌ستی مرۆڤایه‌تی بنه‌ماڵه‌کانتان گه‌وره‌ و پێگه‌یشتون، هه‌ڵگر و درێژه‌پێده‌ری کولتور و سوننه‌تی پێشکه‌وتووی کۆمه‌ڵه‌ن و له‌و رێگایه‌ ئازیزترین که‌سانی خۆتان پێشکه‌ش به‌ کاروانی گیانبەخکردوانی کۆمه‌ڵه‌ کردوه‌ و دڵی ئه‌وینداری ئازادیتان، خه‌می گه‌وره‌ی هه‌ڵگرتووه‌.

هاوڕێیانی به‌ندکراو له‌ ئه‌شکه‌نجه‌خانه‌کانی کۆماری ئیسلامی!
 کۆنگره‌ی کۆمه‌ڵه‌ رێز له‌ خۆڕاگری و ماندوونه‌بینیتان ده‌گرێ. دیواره‌به‌رزه‌کانی به‌ندیخانه‌ی کۆماری ئیسلامی نه‌یتوانیوه‌ و هیچ کاتیش ناتوانێ بوونی به‌رده‌وامی ئێوه‌ له‌ مێشک و دڵی ئێمه‌ ونکات. رزگاریتان له‌ کۆت و به‌ندی کۆماری ئیسلامی هیوای کاڵنه‌بو و بزوێنه‌ری به‌ هێزی ئێمه‌یه‌ له‌ خه‌باتماندا بۆ ئازادی و سه‌به‌ستی.

که‌مئه‌ندامانی سه‌نگه‌ر و پێشمه‌رگه‌ دێرینه‌کان!
به‌ بێ گومان هه‌ر تاکێک له‌ کۆمه‌ڵگا به‌ ئێوه‌شه‌وه‌، کاتێک به‌ ژیانی ڕابردوویدا ده‌چێته‌وه‌، زۆر قۆناغ و ساته‌وه‌خت ده‌دۆزێته‌وه‌ که‌ به‌ شانازی ژیانی ده‌زانێ و دڵی پڕ ده‌کا له‌ غرور و هه‌ست به‌ سه‌ربه‌رزی‌، به‌رێوه‌بردنی ئه‌رکی پێشمه‌رگانه‌ و خزمه‌ت به‌ جه‌ماوه‌ری بێبه‌ش و سته‌ملێکراو بۆ هه‌ر ماوه‌یه‌ک بێ، له‌ ناو ریزه‌کانی کۆمه‌ڵه‌، به‌ تایبه‌ت به‌خشینی به‌شێک له‌ جه‌سته‌ له‌ پێناوی ئه‌و رێبازه‌دا‌ به‌ بێگومان له‌ گشت قۆناغه‌کانی ژیانماندا زۆرتر مایه‌ی شانازی و سه‌ربه‌رزی و پێزانینی جه‌ماوه‌ری خه‌ڵکی کوردستانه‌‌.
١٥هه‌مین کۆنگره‌ی کۆمه‌ڵه‌ به‌ نوێنه‌رایه‌تی هه‌مو کادر و ئه‌ندامان، به‌شداربووانی کۆنگره‌ و کومیته‌ی ناوه‌ندی هه‌ڵبژێردراوی ئه‌م کۆنگره‌یه‌‌، هه‌ڵگری په‌یامی رێز و حورمه‌ت و به‌ڵێنی به‌رده‌وامبوون و پێداگری له‌ سه‌ر رێبازی پڕ له‌ شانازی کۆمه‌ڵه‌که‌مانه‌ بۆ ئێوه‌ی خۆشه‌ویست.
١٥هه‌مین کۆنگره‌ی کۆمه‌ڵه‌ به‌ ؛کۆنگره‌ی -به‌ره‌و یه‌کگرتوویی کوردستانی رۆژهه‌ڵات- ناوزه‌دکرا. به‌لگه‌یه‌کیش له‌ ژێر ناوی `` پلاتفۆرمێکی هاوبه‌شی کوردستانی رۆژهه‌ڵات`` په‌سه‌ند کرا که‌ تێدا باس له‌ بیرۆکه‌ی پێکهێنانی ئێئتلافێک له‌ به‌ینی حیزبه‌کانی کوردستانی رۆژهه‌ڵات ده‌کات و چه‌ند خاڵێکی گرینگ له‌ ڕوانگه‌ی کۆمه‌ڵه‌وه‌ له‌و باره‌ ده‌خاته‌روو.
 به‌ زوویی ده‌قی ئه‌و پلاتفۆرمه‌ بڵاو ده‌بێته‌وه‌ و هیوادارین که‌ به‌ش به‌ حاڵی خۆمان بتوانین چه‌ند هه‌نگاوێک‌ له‌و ئاراسته‌یه‌دا به‌ره‌و پێش برۆین و ئەو یه‌کگرتوویه‌ که‌ خه‌ونی هه‌موومانه‌ و باشترین پاداشتی ئێوه‌ی خۆشه‌ویسته‌ بۆ هه‌موو ئه‌و زه‌حمه‌تانه‌ی کێشاوتانه‌ و ئه‌م گشته‌ فیداکارییه‌ که‌ ئه‌نجامتان داوه‌‌. کۆنگره‌ هه‌روه‌ها کۆمه‌ڵێک بریار و به‌ڵگه‌نامه‌ی په‌سه‌ند کرد که‌ هه‌نگاوه‌کانی ئێمه‌ له‌ باری خۆته‌یار کردن و تۆکمه‌کردنی کۆمه‌ڵه‌ بۆ ده‌وری داهاتوو دیاری ده‌کا. جگه‌ له‌وه‌ هه‌ڵوێسته‌کانی کۆمه‌ڵه‌ش به‌رامبه‌ر رووداوه‌کان و ئه‌گه‌ره‌کانی که‌ ده‌توانێ به‌ره‌ورومان بێته‌وه‌ که‌وته‌ به‌رباس و به‌ڵگه‌ی پێویست له‌وباره‌ په‌سه‌ند کرا.

به‌ڵام موژده‌ی ئومێدبه‌خش بۆ ئێوه‌ و هه‌موومان ئه‌وه‌یه‌ که‌ ١٥هه‌مین کۆنگره‌ ته‌نیا هه‌ڵگری په‌یامی یه‌کگرتوویی بو کوردستانی رۆژهه‌ڵات نه‌بوو، به‌ڵکو گۆڕه‌پانێک بوو بۆ نیشاندانی یه‌کریزی ناو کۆمه‌ڵه‌ و ئاماده‌بوونی نه‌سلی نوێ و گه‌نجی کۆمه‌ڵه‌ بۆ به‌ ده‌سته‌وه‌ گرتنی به‌رپرسیاره‌تی گه‌وره‌تر له‌ ناو رێبه‌ری کۆمه‌ڵه‌دا.   
جارێکی دیکه‌ش سه‌ری رێز بۆ ئێوه‌ داده‌نه‌وێنین و ده‌ستتان ده‌گوشین و به‌ هیوان سه‌رکه‌وتنی گشت ئێوه‌ی به‌رێزین له‌ ژیان و خه‌باتاندا.

١٥هه‌مین کۆنگره‌ کۆمه‌ڵه‌ی شۆڕشگێڕی زه‌حمه‌تکێشانی کوردستانی ئێران
٢٠ی مای ٢٠١٧
٣٠ن گوڵانی ١٣٩٦


ئه‌م بابه‌ته 1099 جار خوێنراوه‌ته‌وه‌‌

PM:04:52:31/05/2017