پەیامی کۆمیتەی ناوەندیی کۆمەڵەی شۆڕشگێڕی زەحمەتکێشانی کوردستانی ئیران بەبۆنەی: 8ی مارس رۆژی جیهانی ژن


ژنانی تێکۆشەرو ئازادیخواز
کۆمەڵانی خەڵکی کوردستان

وا ساڵێکی دیکە بەسەر مێژووی 8ی مارس رۆژی جیهانی ژن تێپەڕی، ئەمە لە کاتێکدایە کە ژنانی جیهان،ئێران و کوردستان بەتایبەتی هێشتا لە گەڵ کلتوور،یاسا و نەریتە دواکەوتووەکانی زاڵ بەسەر کۆمەڵگا لە حاڵی بەربەرەکانێدان.
8ی مارس رۆژی جیهانیی ژن، مێژوویەكی لێوانلێو لە خەباتی سیاسی و كۆمەڵایەتی ژنان، دژی هەڵاواردن و نایەكسانیەكانی ناو كۆمەڵگایە. هەشتی مارسی ئەمساڵیش وەك زۆربەی ساڵانی پێشوو لە كاتێكدایە كە هێشتا ژن وەك نیوەی كۆمەڵگای مرۆڤایەتی لە هەوڵ و تێکۆشان بۆ گەیشتن بە مافەكانی و بەدەست هێنانی یەكسانی نێوان ژن و پیاو لە هەموو بوارەكانی ژیاندایە.
خەبات و تیکۆشانیان لەپێناو لابردن و  دامەزراندنی  کلتوورێکی پێشکەوتوو و گۆڕان لە عەقڵیەتی کۆمەڵگا هاوشان لەگەڵ پیاوانی یەکسانیخواز خەباتی خۆیان بەرەو پێش دەبەن.
ئەم خەباتە بۆ ژنانی کوردستان سەنگەر، لایەن و رەهەندی جیاوازی هەبووەو تا هاتووە خەباتی شاخ و خەباتی شاری لەیەک گرێداوە. بۆئەم مەبەستەیش سەدان گیانبەختکردووی پێشکەش بە ئازادی و عەداڵەت کردووەو سەدان ژنی تێکۆشەرو خەباتکار راپێچی زیندان و ئەشکەنجەگاکان کراوون.
پاش نزیک بە چوار دەهە لە حاکمییەتی پڕ لە ئیستبداد و هەڵاواردنی کۆماری ئیسلامی بۆ هەمووان سەلمێندراوە کە رژیم و سیستەمی دەسەڵاتی زاڵ بەسەر ئێراندا، لەو پەڕی دڕەندییەوە لەگەڵ ماف و ئازادییەکانی ژنان مامەڵەی کردووە.
جوداکردنەوەی شوێنە گشتیییەکان لە نیوان ژنان و پیاوان، لابردنی چەندین رشتەی خوێندن لە زانستگاکان،یاسای فرەژنی، ئێعدام ، زیندانی کردنی ژنان و سەنگسار بەشێک لە سیاسەتەکانی کۆماری ئیسلامی بۆ سەر ژنان بووە کە تا بەئەمڕۆ لەلایەن ئەم رژیمەوە وەک ئەسل و سیاسەتێکی نەگۆڕ پێڕەو کراوە.
هاوکات لەگەڵ ئەم ناعەداڵەتییانەی کە لە دژی ژنان هاتووەتە ئاراوە خەباتێکی گەرم و گوڕ و هەمە لایەنەی ژنان و پیاوانی ئازادیخواز لەئارادا بووەو دڵنیاین تا سەرکەوتن و گەیشتن بە مافەکانی ژنان بەردەوام دەبێت.
 سەرەڕای سیاسەت و کردەوەکانی دژە ژنی كۆماری ئیسلامی، ژنان لەهەموو گۆڕەپان‌و بوارەكانی ژیانی كۆمەڵایەتی‌،سیاسی،کلتووری و ئابووری پێگەیەكی گرنگیان بەدەستهێناوەو ئەم رەوتەیش تا هاتووە گەشەی بەخۆیەوە بینیووە.
 بزووتنەوەی ژنان لە ئێرانی ئیسلامی بووەتە یەكێك لە بەهێزترین بزووتنەوە كۆمەڵایەتییەكان، بوونی دەیان كەس لە ژنانی خەباتكار، لە پارێزەر‌و رۆژنامەنوس تا خوێندكار‌و هەڵسوڕاوی كرێكاریی لە زیندانەكان، نیشانەی بەشداری بەربڵاوی ژنان لە خەباتی ئەمرۆ‌و سبەینێی كۆمەڵگای ئێران و کوردستانە.
بەشداری و چالاک بوونی ژنان لە هەموو بوارەکاندا،  ئاماژە بەو راستییە دەکەن کە ژنان و بزووتنەوەکەیان بەردی بناغەی کۆمەڵگایەکی یەکسان دادەرێژن و لە گۆڕانکارییە سیاسی و کۆمەڵایەتییەکان بۆ سەردەم و داهاتوو یەکێک لە هێزو جەمسەرە کاریگەرەکانی گۆڕانکارییەکانە.
لەكوردستانیشدا، ژنان لە چەند دەیەی رابردوو بەشدارییەكی بەرینیان لە هەموو بوارەكانی خەباتی كۆمەڵایەتی، كولتوری و سیاسی‌ کردووەو پێگەیەكی دیاریان بۆ خۆیان دەستەبەر كردوە.
بەشداری بەربڵاوی ژنان لە زیاتر لە سێ دەهەی بزووتنەوەی شۆڕشگێڕانەی كوردستان، فیداكاری‌و لەخۆبردوویی‌و  تێکۆشانی ئەوان لە سەنگەری خەبات، یارمەتیدەریان بووە تا ئەزمونگەلێكی بە نرخ بەدەست بێنن‌و بە بێ هیچ دوو دڵییەك‌و ماندووی نەناسانە دژی رژیمی ئیسلامی خەبات بكەن.
ژنی‌ کورد له‌ هه‌رسێ گۆڕەپانی خه‌باتی چینایەتی، نه‌ته‌ویی و فێمنیستی‌دا رۆڵی کاریگەری بووەو وەک هەڵسوڕاوانی بەئەزموون و کارا، پێشەنگی ژنانی وڵاتانی دراوسێی خۆی بووەو قارەمانی و بوێری و لەخۆ بردوووییان مانشێتی یەکەمی میدیا جیهانییەکان بووە.
لەم بوارەدا كۆمەڵە مێژووییەكی پرشنگداری لە خزمەت كردن بە پرسی ژنی كورد هەیە، هاتنە مەیدانی كۆمەڵە لە ساڵی 57 وەك هێزێكی چەپ و پێشكەوتنخواز ئەو دەرفەتەی بۆ ژنان رەخساند تا راستەوخۆ بێنە ناو شۆرشی كوردستان و پێشمەرگایەتی كە هەتا ئەو كات بوارێكی پیاوانە بوو، ئەم جارەیان بزووتنەوەی رزگاریخوازی كورد سیمایەكیتری بە خۆوە بینی و پێشمەرگەی ژن و ناوبانگی هەموو كوردستانی گرتەوەو بووە پێشەنگی ژنانی پارچەکانی دیکەی کوردستان.
 كۆمەڵە بە چاندنی بیری یەكسانیی ژن و پیاو و دژایەتی لە گەڵ كلتوری پیاومەزنی و نەریتی كۆن لە كۆمەڵگادا، كاریگەریەكی زۆری لە سەر گۆرینی روانین و كلتوری خەڵك بەرانبەر بە ژنان دانا. ئیتر ژن تەنیا ئەركی پاڵپشتی شۆڕش و لە ناو ماڵدا خزمەت بەپیاو، وەك هاوسەر و خۆشك و دایك نەبوو، بەڵكوو هەستی بە مافی ئینسانی خۆی كرد و بۆ گەیشتن بە مافی یەكسان لە گەڵ پیاوان دەستی دایە خەبات.

ژنانی تێکۆشەری کوردستان
هاوڕێیانی خەباتکار

لێرەدا جارێکی دیکە پەیمان نوێ  دەکەینەوە کە کۆمەڵە حیزبی ئێوە ژنان و پیاوانی یەکسانیخوازە بۆ گەیشتن بە ماف و ئازادییەکانتان کە نزیک بە چوار دەهەیە لە لایەن رەژیمەوە پێشێل و پشت گوێ خراوە.
کۆمەڵە وەک رابردوو شێلگیرانە  لە دژی سوننەت و داب و نەریتە کۆنەکان کە ژنی تێدا قەتیس کراوە خەبات دەکات و ئەم ئەرکە پیرۆزەی وەئەستۆیەو بەکردووە هەنگاوی پتەوی بۆ هەڵدەگریت.
کۆمەڵە  وەك هەمیشە پاڵپشتی گەورەی ژنانەو، لە گەڵ هەموو چالاكانی بزووتنەوە کۆمەڵایەتییەکانی كوردستان هەوڵ  دەدەین  زیاتر لە جاران بزووتنەوەی یەكسانیخوازی ژنان بە هێزتر بكەین.

سەركەوێ بزوتنەوەی یەكسانیخوازی ژنان
پیرۆز بێ 8ی مارس رۆژی جیهانیی ژن
بژی خەباتی ژنان و بزووتنەوە رەواکەیان

کومیتەی ناوەندیی کۆمەڵەی شۆڕشگێڕی زەحمەتکێشانی کوردستانی ئێران
8ی مارسی 2017ی زایینی بەرامبەر لە گەڵ 18ی رەشەمەی 1395ی هەتاویی



ئه‌م بابه‌ته 1850 جار خوێنراوه‌ته‌وه‌‌

PM:10:33:07/03/2017