لە شاری ڤانکۆڤەری کانەدا سیمینارێک بۆ ڕۆژی کۆمەڵە بەڕێوەچوو




رۆژی شەممە ۱٨ فیبریەی ٢٠١٧ لە سیمینار و ڕێوڕەسمێکدا لە شاری ڤانکۆڤەر،  لە وڵاتی کانەدا، ڕێز لە سی و هەشتەمین ساڵڕۆژی ئاشکرابوونی خەباتی کۆمەڵە گیرا.

سەرەتای بەرنامەکە بە پارچە موزیکی سروودی" فوئاد ڕۆڵەی ئاگرو خوێن" لە لایەن هونەرمەند حوسێن زوڵەیخاپوور دەستی پێکرد.
دواتر بەڕێوەبەری بەرنامە هاوڕێ حەمید بەهرامی بەخێرهاتنی میوانانی بەشدار، نوێنەرانی حیزب و لایەنەکانی کرد، و بە سروودی بانگەواز سروودی رەسمی کۆمەڵەو دەقیقەیەک بێدەنگی بۆ ڕێزگرتن لە گیانی سەرجەم گیانبەختکردووانی کۆمەڵەو بزووتنەوەی کوردستان، بەرنامەکە دەستی پێکرد.
پاشان، دیکۆمێنتاریەک لە چالاکی پێشمەرگەکانی کۆمەڵە، لە ناوخۆی کوردستانی ڕۆژهەڵات، کە لە لایەن هاوڕێیانی کۆمیسیۆنی راگەیاندنەوە، ئامادەکرابوو، پێشکەش بە بەشداربووان کرا.
لە بەشی یەکەمی سیمینارەکەدا، هاورێ سۆران پاڵانی کادری کۆمەڵە و مامۆستای زانکۆ باسێکی لە ژێر ناوی" کۆمەڵە ئەولەویاتەکانی ئێستاو داهاتووی"پێشکەش کرد.

لە بەشی دووهەمی سیمینارەکەدا، بەرێز کاک هێرش پاڵانی، خوێندکاری  زانستە سیاسییەکان، باسێکی لە ژێر ناوی" ڕێکەوتننامەی کۆمەڵەو حیزبی دیمۆکرات، دەرسێک لە ڕابردوو، هەنگاوێک لە پێناوی داهاتوو" پێشکەش کرد.
هەر لە بەشی سێهەمی سیمینارەکەدا بەرێز کاک ناسر جەهانی، پاڵێوراوی دکتۆرای کۆمەڵناسی، باسێکی لێکۆڵینەوەی ئەکادیمیانەی لە ژێر ناوی" باروودۆخی سیاسی ژنی کورد، لە کۆمەڵەی ژ. ک تا کۆمەڵەی شۆڕشگێر" پێشکەش کرد ، ناوبراو لە باسەکەیدا، بەراوردێکی کردبوو لە مەسەلەی بەشداری و گرنگی پێدانی ژنان لەو مێژووەی کە  کۆمەڵەی ژ. ک لە بزوووتنەی سیاسی کورد دەستی بە خەبات کردووە و دواتر حیزبی دیمۆکرات،  تادەگاتە کۆمەڵەی شۆرشگێڕو ئاماری بوونی ژنانی  لە ئاستی سەرکردایەتیدا، خستەڕوو.

دوای تەوابوونی باسەکان،  دەرگای پرسیار بۆ بەشداربووان کرایەوەو پێشکەشکارانیش وەڵامی پرسیارو تێبینیەکانیان دایەوە.
هەر لەو ڕێوڕەسمەدا، هونەرمەند حسێن زوڵەیخاپوور، چەند پارچە موزیک و  سروودی"ئاخرین ماڵی ژیانم کونجی بەندیخانەیە" ی پێشکەش کرد.
کاک خەلیل غەفاری،  پێشمەرگەی دێرینی کۆمەڵە، کۆمەڵێک بەسەرهات و بیرەوەری و نوکتەی دەورانی پێشمەرگایەتی گێرایەوەو لە لایەن بەشداربووانەوە پێشوازی گەرمی لێکرا.
 هەروەها هەر لەو ڕێورەسمەدا، بەڕێزان، کاک خەلیل غەفاری، هێرش پاڵانی، ناسر جەهانی، سۆران پاڵانی، هونەرمەند، حسێن زوڵەیخاپوور، خاتوو میهری کازمی و تازەلاو دانیال بەهرامی، چەپکە گوڵی ڕێزلێنانیان لە لایە بەڕێوەبەرانی رێوڕەسمەکەوە پێشکەش کرا.
هەروەها لەو ڕێوڕەسمەدا هەر یەک لە یەک لە پارتی دیمۆکراتی کوردستان، حیزبی دیمۆکراتی کوردستانی ئیران کۆمیتەی رۆژئاوای کانەدا حیزبی دیمۆکراتی کوردستان رۆژئاوای کانەدا مالی کورد لە ڤانکۆڤەر پەیامی پیرۆزباییان ئاراستەی ڕێوڕەسمەکە کرد.

تێبینی: لە رۆژانی داهاتوودا دەقی ڤیدیۆی باسەکان و ڕێوڕەسمەکە لە ڕاگەیاندنەکانی کۆمەڵەی شۆڕشگێڕ بڵاو دەبێتەوە.


                    کۆمیتەی ڕۆژئاوای کانەدای
 کۆمەڵەی شۆڕشگێڕی زەحمەتکێشانی کوردستانی ئێران.
۲۰۱۷/۲/۲۰























ئه‌م بابه‌ته 1248 جار خوێنراوه‌ته‌وه‌‌

AM:12:47:21/02/2017