بەڕێوە چوونی رێوڕەسمی ٢٦ی رێبەندان لە بارەگای ناوەندی کۆمەڵە


رۆژی شەممە، ٣٠ی رێبەندان، بە بۆنەی ٢٦ی رێبەندان ساڵڕۆژی ئاشکرابوونی خەباتی نهێنی کۆمەڵە رێوڕەسمێکی شکۆدار بە بەشداری ژمارەیەکی بەرچاو لە کادر و پێشمەرگە و ئەندامانی سەرکردایەتی  و دۆستان و لاینگرانی کۆمەڵەی شۆڕشگێڕ لە بارەگای ناوەندی کۆمەڵە بەڕێوەچوو.

سەرەتای رێوڕەسمەکە بە سروودی بانگەواز سروودی رەسمی کۆمەڵە دەستی پێکرد، پاشان بۆ رێزگرتن لە یادی سەرجەم گیانبەختکردووانی کۆمەڵە و بزووتنەوەی رزگاریخوازانەی گەلی کورد چەند ساتێک بێ دەنگی راگیرا .
پاشان هاوڕێ ئەنوەر محەممەدی ئەندامی کومیتەی ناوەندیی بەم بۆنەوە راپەیامێکی ئاراستەی بەشدار بووان کرد. "لە کۆتایی راپۆرتەکەدا دەقی پەیامەکە بخوێننەوە".
بە شوێن ئەودا، ژیاننامەی هاوڕێ حەمە حسێن کەریمی لە لایەن پێشکەشکار هاوڕێ فەرانەک ئەڵماسی خوێندرایەوە .
دواتر هونەرمەند تاهیر خەلیلی بە هاوکاری کۆڕی سروودی بانگەوازی کۆمەڵەی لاوانی رۆژهەڵات، سروودێکی شۆڕشگێڕانەی پێشکەش بە ئامادەبووان کرد.
پاشان پەیامی کومیتەی زاگرۆسی کۆمەڵە بە بۆنەی ٢٦ی رێبەندان، لە لایەن هاوڕێ موختار ئەحمەدی خوێندرایەوە.
لە درێژەی رێوڕەسمەکەدا پەیامی هەر سێ رێکخراوی کۆمەڵەی لاوان، ژنان و خوێندکارانی رۆژهەڵات لە لایەن هاوڕێ شەیدا مستەفا خوێندرایەوە .
بە شوین ئەودا کۆڕی سروودی بانگەوازی کۆمەڵە بە سەرەپەرەشتی کۆمەڵەی لاوانی رۆژهەڵات سروودێکی شۆڕشگێڕانەیان پێشکەش بە ئامادەبووان کرد.
لە بەشێکی‌تری ڕێوڕەسمەکەدا پۆلێکی‌تر لە کچان و کوڕانی تێکۆشەر و خەباتکاری کوردستان لە ژێر ناوی پەلی شەهید "خەسرەو رەشیدییان" پاش تێپەڕاندنی سەرکەوتووانەی خولی سیاسی، نزامی رەسمەن پەیوەست بوون بە ریزەکانی پڕ لە شانازی هێزی پێشمەرگەی کۆمەڵەوە، دوای وەرگرتنی چەک و کارتەکانیان هاوڕێیانی تازە چەکداربوو سروودێکی شۆڕشگێڕانەیان پێشکەش کرد.
پاشان گروپی هەڵپەڕکێی رۆژهەڵات، بە سەرپەرەستی کۆمەڵەی لاوانی رۆژهەڵات تابلۆیەکی هونەرییان پێشکەش بە بەشداربووان کرد.
دواتر هونەرمەند تاهیر خەلیلی سروودێکی تری پێشکەش کرد. لە درێژەی رێوڕەسمەکەدا، لە ماوەی هەفتەکانی رابردوودا خولێکی کێبڕکێی فوتساڵ لە ژێر ناوی "رێبەندانی پێشەنگ" لە نێوان چەند یانەی ئۆرگانە جیاوازەکانی کۆمەڵەدا بەڕێوەچوو کە یانەی لاوانی رۆژهەڵات بوو بە قارەمانی کێبڕکێکە و ئەندامانی یانەکە لە لایەن کاک ئیسماعیل سوڵتانی پێشمەرگەی دێرینی کۆمەڵە خەڵات کران.
بە شوێن ئەودا، چەندین پەیام و بروسکەی پیرۆزبایی حیزب و رێکخراوە سیاسییەکان لە لایەن پێشکەشکار هاورێ سمکۆ بەنەفشی خوێندرایەوە و پاشان بە خویندەوەی هۆنراوەیەکی لە لایەن هاورێ کەوسەر فەتاحی بەشی یەکەمی رێوڕەسمەکە کۆتایی پێهات.
بەشی دووهەمی رێوڕەسمەکەش تەرخان کرا بۆ شایی و خۆشی ئامادەبووان و بەم شێوەیە ڕێوڕەسمەکە کۆتایی هات.



دەقی پەیامەکە:

خەڵکی خەباتکاری کوردستان!
دۆستانی بەڕێز!
پێشمەرگەکان و ئەندامانی کۆمەڵە!
26ی رێبەندان رۆژی کۆمەڵە، رۆژی خەبات و پەیمان نوێکردنەوەتان بۆ درێژەدانی خەبات لێ پیرۆز بێ.
      وەک نەریتی ساڵانە، هاوشێوەی  ساڵانی رابردوو تێکۆشەرانی کۆمەڵە لە ناوخۆو دەرەوەی کوردستان بەتایبەتی لە رۆژانی رابردوودا رێزیان گرت لەخەبات و فیداکاریەکانی کۆمەڵە و گیانبەخت کردووانی  کە بە خوێنی خۆیان و پێشکەشکردنی گیانی ئازیزیان رێگای پڕ لە شانازیی کۆمەڵەیان بە بەردەوامی هێشتووەتەوە. گەڕەک و کۆلان وشەقامی شارەکان، دیواری لادێکانیان بە تراکت و درووشمی ٢٦ رێبەندان رازاندەوە و بۆ جارێکی دیکەش نیشانیان دا کۆمەڵە لە قوولایی و هەناوی کۆمەڵگای کوردستاندایە.  
     بۆیە لێرەوە لەلایەن کۆمیتەی ناوەندی و سەرجەم ریزەکانی کۆمەڵەوە سڵاو دەنێرین بۆ بنەماڵەی سەربەرزی گیانبەختکردووانمان و رێز لە قوربانیدان و فیداکاریەکانیان دەگرین، سڵاو و رێزی خۆمان ئاراستەی هاوڕێیانی بەندکراو دەکەین کە لە ژێر زەبر و گوشاری دیکتاتۆری ئایینی کۆماری ئیسلامی بە خۆڕاگرییەکی کەم وێنەوە مەشغەڵی بزووتنەوەکەیان زیندوو و بەرز راگرتووە و کۆمەڵەیان رووسوور کردوە.
    سڵاوی خوڕاگری دەنێرین بۆ تێکۆشەرانی رواڵەت داپۆشراوی خەباتی نهێنی شار و دێهاتەکانی کوردستان کە  لە ژێر چەکمەی دڕندەترین دیکتاتۆری ئەم سەردەمە، بەوپەڕی دڵسۆزی و وشیاریەوە ئەرکە حیزبیەکانی خۆیان بەرێوە بردوەو دام ودەزگا ئەمنییەتیەکانی کۆماری ئیسلامی لە ئاست بەرنامە و کارەکانیان دەستەوەستان بوون. سڵاو بۆ پێشمەرگەکانی کۆمەڵە کە لە ئامادەکاری بەردەوامدان تا هەر کات پێویست بوو وەک باڵی چەکداری بزووتنەوەی رزگاریخوازی کوردستان بە ئەرکی خۆیان کە پشتیوانی لە خەباتی سیاسی و مەدەنی خەڵک و بەرگری لە خاکی کوردستانە جێبەجی بکەن و لە ساڵانی رابوردودا بە پێ دەرفەتی گونجاو ئەرکەکانیان بەڕێوەبردووەو لە داهاتووشدا بە پێی بەرنامەی دیاریکراو بەڕێوەی دەبەن.
    لەم رۆژەدا بە تایبەت جێگای خۆیەتی یادی هاوڕێی رابەر و دامەزرێنەر، کاک حەمە حوسێنی کەریمی بکەین کە بە فیداکردنی گیانی خۆی لە پێشەوەی خەڵکی راپەڕیوی شاری سەقز لە دژی رژیمی پاشایەتی، زەنگی دەستپێکی چالاکی ئاشکرای کۆمەڵەی بۆ یەکەمین جار پڕ بە خاکی کوردستان لێدا. بێگومان یاد و بیروەری کاک حەمەحسێن ئەو رێبەرە خۆشەویستەی کۆمەڵە و کۆمەڵانی خەڵکی کوردستان بۆ هەمیشە لە دڵماندا زیندووە.
بەشدارانی بەڕێز!
   ئاشکرا بوونی خەباتی کۆمەڵە  دەستپێکی قۆناغێکی تازەیە لە رەوتی ئەو خەباتە دوورودرێژەی گەلی کورد کە تیدا خۆی تازە دەکاتەوە و شان بە شانی بزووتنەوە پێشکەوتووەکانی هاوچەرخ تین و تەوژمێکی تازە دەخاتە ناو دەمارەکانی ئەم خەباتە. لێبڕاوی لە خەبات بە دژی ستەمی نەتەوایەتی، خەبات بۆ دادپەروەری کۆمەڵایەتی، ڕێگە خۆش کردن بۆ بەرفراوانترین بەشداری ڕووناکبیرانی پێشکەوتنخواز ، کرێکاران ، خەڵکی چەوساوە و زەحمەتکێش کە نەک تەنیا وەک سیاهی لەشکر، بەڵکو وەک خاوەن بزووتنەوەکە ببن و دەور و ڕۆلێکی کاریگەر لە رووداووەکاندا بگێڕن. بە هەڵکردنی ئاڵای یەکسانی ژن و پیاو لە هەموو بوارەکانی ژیانی سیاسی و کۆمەڵایەتی، دیواری ئەستووری دواکەوتوویی و موحافزەکاری قەڵشتێکی گەورەی تێدەکەوێ و ژنان دێنە ناو خەباتی چەکداری و  ریزی پێشمەرگایەتی کۆمەڵە و وزە و هێز و توانای بزووتنەوەکە بە چەند قات دەبەنە سەرێ.
      ئەم مێژوویە بەردەوام بە ڕێگایەکی راست و هەمواردا کە تەنیا سەرکەوتنەکان تێدا ئەژمار دەکرێن، تێپەر نەبووە. بە پێچەوانە ئەم رێگایە جادەیەکی پڕ پێچ و تەنگ و چەڵەمە بووە و وێڕای بزووتنەوەی حەقخوازانەی گەلی کورد، کۆمەڵەش هەوراز و نشیوی زۆری هاتۆتە سەر ڕێگا. بە هەموو ئەوانەشەوە و بە هۆی فیداکاری و لێبوردوویی کادر و ئەندام و پێشمەرگە، ئێمە بۆ یەکەمین جار شاهیدی بەردەوامی نیزیک بە چوار دەیەی ئەو بزووتنەوەین کە هەم لە شکل و شێوازی پێشمەرگایەتی و بەرگری چەکدارانە و هەم بە شێوازی سیاسی و لە ناو دڵی کۆمەڵگا و لە هەناوی بزووتنەوە کۆمەڵایەتییەکاندا، نەیهێشتووە مەشخەڵی خەباتی گەلی کورد بکوژێتەوە.
بەشدارانی بەڕێز!
   کۆماری ئیسلامی دو‌ای ڕێککەوتنی ناوکی و سەرەڕای نەرم و نیانی و چاوقوچاندنەکانی ئۆباما لە سەرەڕۆیەکانی کۆماری ئیسلامی دەستی دەستوەردانی لە کاروباری دەوڵەتانی ناوچەکە درێژتر ببوەوەو درێژەی هەیە. هیوا و هۆمیدێک کە ئیسلاحخوازان درستیان کردبوو، کە گوایە دوای رێککەوتنی ناوکی کۆمەڵگای ئێران کراوەتر دەبێ و پێچ و مۆرەکانی دیکتاتۆری و سەرەڕۆیی نیزامی سیاسی تا ڕادەیەک کەمتر دەبێتەوە، بە پێچەوانە دەرکەوت دوای بەرجام رژیم هەوڵ دەدا تووندتر لە هەمیشە کۆمەڵگای لە ژێر گوشاری یاسا و رێسا دواکەوتوانەکان بێدەنگ و کپ بکا.‌ سەختگیری زۆرتر   لە بواری کولتوری وەک رێگە پێنەدان بە کۆنسێرتەکان، تووندوتیژتر بوونی حوکمە ناداپەروەرانەکان و زیادبوونی رێژە ئێعدام دیارییەکانی رژیم بوون دوای واژۆ کردنی بەرجام.  چاوەڕوانییەکان و هیوابەخشییەکانی پێوەندیدار بە باشتر بوونی وەزعی ژیان و دەرامەدی خەڵک دوای بەرجامیش بە ڕاست دەرنەچوو. ئەو بارودۆخە بە تایبەت پێگەی روحانی کە خۆی بۆ دەوری دووهەمی سەرۆک کۆماری ئامادە دەکا، لە ناو جەماەری خەڵکی ئێران لاواز کردووە و بۆتە هۆی نیگەرانی ناوبراو و ئیسلاحخوازان و میانڕەوەکان. بۆیەش رووحانی ئاڵای درۆیینەی مافی شارۆمەندی و بەرگری لە یاسای بنەڕەتی، واتە قانونی ئەساسی، وەک پرۆپاگەندە بو کەمپەینی هەڵبژاردنەکانی چەند مانگی داهاتووٍ، بەرز کردەوە.
   بەراستی رواڵەتی ئێستای کۆمەڵگای ئێرانی ژێر دەسەڵاتی کۆماری ئیسلامی، جێگایەک بۆ گەشبینی سەبارەت بە داهاتووی نەوەی گەنج و تازە پێگەیشتووی ئێران ناهێڵێتەوە. لە گەڵ دۆخی خەراپی ئابووری، قەیرانی قووڵی تێکچوونی ژینگەی ئێران، نەخۆشییە کۆمەڵایەتییەکان وەک ئیعتیاد بە مادە هۆشبەرەکان، لەشفرۆشی مێرمناڵان، کردنی رێوڕەسمی لە سێدارەدان بە بەشێک لە کولتووری کۆمەڵگا، هەموو ئەو دیاردانە و زۆر دیاردەی قێزەونی دیکە کاریگەرێکی قووڵ و تێکدەرانەی لە وەزعی رووحی تاکەکان داناوە بە جۆرێک کە بە بڕوای زۆر لە کارناسانی بواری سلامەتی، کۆمەڵگای ئێران بە کۆمەڵگایەکی خەمووک و ناتەندروست ناوزەد دەکرێ.
    ئێمە ساڵێکی پڕ‌ رووداومان لە خۆش و ناخۆش تێپەڕ کردووە. لە باشور هەرچەند مەترسی  تاوانبارانی داعش بۆ سەر خاکی کوردستان هەر  بەردەوامە بەڵام هێزی پێشمەرگە شانۆی گەورەی لە سەرکەوتن و بەرگری بەرامبەر بەو هەڕەشەیە تۆمار کردووە.. گووشارە ئابوورییەکان بۆ سەر خەڵکی کوردستانی باشوور، هەر بەردەوامە و رێگا چارەیەک بۆ ئەو گرفتە نەدۆزراوەتەوە. کێشە و ململانێ ناوخۆییەکانی هەرێمیش کاریگەری نەگەتیڤی لە سەر خەبات وخەڵک لە بەشەکانی دیکەی کوردستان هەیە و بە تایبەتی دام و دەزگاکانی کۆماری ئیسلامی تەبلیغاتی ژهراوی لە ناوخۆی کوردستانی رۆژهەڵات پێوە دەکەن. حکوومەتی ناوەندی لە بەغدا لە بڕینی بوودجەی کوردستان بەردەوامە و قەیرانی ئابووری بەرۆکی خەڵکی هەژاری گرتووە و ژیانی رۆژانەی لێ تاڵ کردوون. بۆیە ئێمە هیواخوازین کۆی کێشەکانی هەرێم لە قازانج و بەرژەوەندی خەڵک کۆتایی بێ.
  لە باکووری کوردستان  پرۆسەی ئاشتی، کە بە هەموو کەم و کۆڕییەکانی دەرفەتێکی زێڕینی بۆ خەبات کورد لەو پارچەیە خوڵقاندبوو بە داخەوە لە بار چووەو شەڕوماڵ وێرانی دەستیپێکردۆتەوە، خەساری ماڵی و گیانی کە بەرەوڕوی دانیشتووانی ئەو پارچەیە بۆتەوە لە ئەژمار نایە و رەوتی بەشداری  کورد لە پرۆسەی سیاسی لە وڵاتی تورکیا وەک دەسکەوتێکی گەورەی گەلی کورد و خەباتەکەی لە باکوور تووشی مەترسی مەزن هاتووە و لە ژێر هەرەشەی فەشەل هێنانە.ئێمە وەک هەمیشە خۆمان بە پاڵپشتی بزوتنەوەی کورد لە باکور دەزانین و هیوادارین پرۆسەی ئاشتی کە تاکە رێگای گونجاوە جارێکیتر رێچکەی خۆی بگرێتەوە.
لە کوردستانی سورییە واتە کوردستانی رۆژئاوا، سەرەڕای  فیداکاری و زەحمەت و قوربانی زۆری گەلی کورد لە بەرامبەر هێرشی داعش و بەرگری لە خاکی کوردستان لەو ناوچەیە هێشتا کورد نەیتوانیوە هەموو وزە و تواناکان بە تەواوی بخاتە گەڕ جێگای داخە کە بە هەموو قوربانی و فیداکارییەکانەوە کورد لە سەر مێزی دانووستانەکاندا ئەو جۆرەی کە دەبینڕێ نوێنەرایەتی ناکرێ و کێشە ناوخۆییەکانیش درێژەی هەیە.
    لێرە پێویستە ئەو ڕاستییە وەبیر خەینەوە کە سەرەڕای هەموو گرفتەکانیش کە بە کورتی لە سەرەوە ئاماژەمان پێدا، دۆزی کورد گەیشتۆتە جێگایەک کە دەوڵەتە سەرکووتگەرەکانی کورد هەرچەند هەوڵیش بدەن و خەساری ماڵی و گیانی لەو نەتەوەیە بدەن، لە توانایان دا نیە کورد بگەڕێننەوە دەیەکانی لەوەپێش و بە کەڵک وەرگرتن لە بێدەنگی و بێتەفاوەتی ڕای گشتی، دەوڵەتان و بە کەڵک وەرگرتن لە سیاسەتی تۆقاندن، بزووتنەوە کوردییەکان خەفە کەن و نەیانهێڵن. بە خاترجەمیەوە دەتوانین بڵێین لە ئاکامی رووداوەکانی ئەم ساڵانەی دوایی بۆ هەموو کایەکەرانی گەورە و ناوچەییش دەرکەوتووە بە بێ دۆزینەوەی چارەسەرێک بۆ کێشەی کورد و رازی کردنیان، رۆژهەڵاتی ناوەڕاست رووی ئارامی و ئاشتی بەردەوام و سەقامگیر بە خۆیەوە نابینێ. سیاسەتی نەگۆری کۆمەڵە کە لە هەموو بۆنەکان دووپاتمان کردۆتەوە و ئێستاش لە سەری بەردەوامین، پشتیوانی لە خەباتی ئەو پارچانەیە و دەستیوەرنەدانە لە کارو باریان.
خەڵکی شۆڕشگێڕ و تێکۆشەری کوردستان!
    کوردستانی رۆژهەڵات هێشتا لە ژێڕ سەر نێزە و سەرکووتی کۆماری ئیسلامی دەناڵێنێ. کۆماری ئیسلامی نەک تەنیا و بە هۆی سەرکووتی بزووتنەوە لە کوردستانی رۆژهەڵات، بەڵکو بە هۆی هەڵویستی لە هەمبەر مافی  نەتەوەیی کورد لە هەموو پارچەکان رۆڵی دوژمن و نەیاری سەرەکی کورد لە هەموو رۆژهەڵاتی ناوەڕاست دەگێڕێ. هەرچەند لێڕە و لەوێ هەوڵ دەدا رواڵەتێکی دڵسۆزانە بەرامبەر بە مەسەلەی کورد لە پارچەکانی دیکە پیشان بدات بەڵام هەر زۆر زوو دەردەکەوێ هەڵسوکەوتی کۆماری ئیسلامی، دەستوەردان لە پێناو بەرژەوەندی خۆ لە رۆژەلاتی ناوەڕاست، چەواشە کردنی بزووتنەوەی کوردی، بڵاوکردنەوەی تۆی دووبەرەکایەتی و چەند بەرەکایەتی لە ناو ئەو بزووتنەوانە چەندە دووژمنکارانەیە. کۆمەڵە بە ئەرکی خۆی زانیووە و بەردەوام دەورو ڕۆڵی چەواشەکارانە و دووژمنکارانەی کۆماری ئیسلامی لە هەمبەر پرسی کورد لە هەموو رۆژهەڵاتی ناوەڕاست لە قاو بدا.
   سیاسەتی هەڵاواردن و داسەپاندنی هەژاری لە کوردستان هەر لە ئیلامەوە بگرە تا ورمێ تووندتر لە جاران بەردەوامە، ئوستانەکانی کوردستانی رۆژهەڵات هەژارترین و کەم دەرفەت ترین ئوستانەکانی ئێران لە باری ئابووری و  دەرفەتی شوغلی پێکدێنن، هەر لە ئاماری رێژەی بێکاری وە بگرە تا نەزمترین ئاستی داهات لە   بەراورد لە گەڵ باقی شوێنەکانی دیکەی ئێراندا. جگە لەوانە دۆخی خەراپی ئابووری لە هەموو ئێران سەرچاوە کۆنەکانی دەرفەتی کاری فەسڵی لە باقی شوێنەکانی ئێران تا ڕادەیەک وشک کردوە و کۆڵبەری وەک مەرسیدارترین شێوازی پەیدا کردنی داهات، بۆتە سەرچاوەی داهاتی ‌ ژمارەیەکی زۆری بنەماڵەکانی خەڵکی هەژار. ڕووداوەکانی ئەم دواییانە و گیان لە دەستدانی کۆڵبەران بە هۆی نووقم بوون لە بەفر و کەوتنە ژێر ڕنوو شەپۆلێکی گەورەی لە هاوخەمی لە ناو خەڵکی کوردستان و دەرەوە وەڕێ خست. بەڵام نابێ لە بیرمان بچێ کە سروشت و زستان و سەرمای سەخت و بەفری زۆر، تەنیا دوژمنانی کۆڵبەرانی کوردستان و بگرە تەنانەت دووژمنی سەرەکیشی نین، خەساری گیانی لە کۆڵبەران لە پلەی هەوەڵ لە لایەن هێزە نیزامییەکانی رژیمەوە بووە کە تەنیا لەم ساڵەدا رێژەی ئەو کۆڵبەرانەی بە تەقەی راستەوخۆی هێزە ئینتزامییەکان گیانیان لە دەست داوە بە زۆرتر لە سەد کەس بەراورد دەکرێ.
    داواکاری وەڕێخستنی پرۆژەی راستەقینە بۆ خوڵقاندنی دەرفەتی کار و کەم کردنەوەی هەڵاواردنی ئابووری خواستێکی ڕەواو بەرحەقە و شیاوی هەموو پشتیوانییەکە. دەسەڵاتی ناوەندی لە ئێران هیچ هەنگاوێکی جیددی لەو بارەوە جگە لە پرۆپاگەندە و بەڵێنی بێناوەرۆک کە هەموو ساڵێ لە بۆنەکان بانگەوازی بۆ دەکا، هەڵنەهێناوەتەوە. بە پێچەوانە زۆر بەڵگە هەیە کە نیشاندەدا کوردستانی رۆژهەڵات ئاگاهانە و بە ئەنقەست بە فەقیری و هەژاری دەهێڵدرێتەوە.
هاوڕێیان!
    بەرهەمی سیاسەتی رۆژهەڵات تەوەری لە ساڵی ڕابردوودا زۆر بە ئاشکرا دەبیندرێ و جێگای دڵخۆشیە. حیزبە سیاسییەکان و رۆشنبیرانی کوردستانی رۆژهەڵات زۆرتر لە جاران هەست بە رەساڵەتی مێژووی خۆیان بەرامبەر بە پێشوەچوونی بزووتنەوە لە رۆژهەڵات دەکەن. هەست بە وەی کە دۆخەکە لە ئێران وەک خۆی نامێنێ و دەرفەتی گەورە بۆ بزووتنەوەی کورد لە کوردستانی رۆژهەڵات دەخوڵقێ تین و تەوژمێکی زۆرتر بە خەباتکارانی ئەو پارچەیە دەدا. تەراتێن و ڕمبازێنی کۆماری ئیسلامی لە مەنتەقەی رۆژهەڵاتی ناوەڕاست کە کۆماری ئیسلامی تێیدا هەوڵی داوە تا وەک زڵهێزێکی ناوچەیی بێتە پێشێ   وەک خۆی نامێنێ، رەوتی رووداوەکان بە ئێمە نیشاندەدەن کە کۆماری ئیسلامی لە زێدەخوازییەکانی لە دەرەوەی وڵات شکست دێنێ و دەبێ دەست لە خەونەکانی بۆ دروست کردنی هێلالی شیعە کە کۆماری ئیسلامی لە رێگای کوردستان و سورییە بە دەریای ناوەڕاست وەسڵ دەکا، دەست هەڵگرێ.
    هەڵسوکەوتی زڵهێزانەی کۆماری ئیسلامی لە ناوچەکە و چاوپۆشی و کاردانەوەی لاوازی رۆژئاوا   لە بەرامبەر کۆماری ئیسلامی، ئەو بوارە وەک تەنیا خاڵی بە هێزی رژیم لەم چەند ساڵانەدا  کۆماری سێدارەی یارمەتی داوە تا هاسانتر دەست  بداتە سەرکووتی خەڵک لە ناوەوە، هەر بەو پێیەش شکستهێنانە لەو بوارەشدا دەورێکی پۆزێتیو‌ی دەبێ لە کول بوونی سەرنێزەی سەرکووت لە ناوەوە. بۆیەش چاوەڕوان کردنی دەرفەت و کرانەوەی     دەرگا بۆ چالاکی تەنیا خەون و خەیاڵ نیە و جێی خۆیەتی خۆی  بۆ ئامادە بکرێ. بەڵام لە هەمان کاتدا لە قۆناغی ئێستادا باشترین رێگای یارمەتی دان بە دۆزی کورد لە هەموو ناوچەکە وەگەڕ خستنی سەر لە نوێی بڵێسەی خەباتی کوردە لە رۆژهەڵات. هەستان بەو ئەرکە تەنیا بە دڵخواز نیە و ئامادەکاری پڕ بە پڕی لە هەموو بوارەکانی سیاسی، پێشمەرگانە و هەتا دوایی دەوێ.
    کۆمەڵە جارێکیتر لە سەر دروشمی رۆژهەڵات تەوەری، پێویستی گرتنی کۆنگرەی رۆژهەڵات، پێکهینانی بەرەی کوردستانی پێدادەگرێ دەکاتەوەو لە هەمان کاتدا پێی وایە بەشێکی هەرە گرینگی ئەو ئامادەکارییە بریتییە لە خستنە سەریەکی هەموو وزە و توانی بزووتنەوەکە بە زۆری لە رێگای هاوکاری و ئێئتلافی حیزبە سیاسییەکان فەراهەم دەکرێ. ئێمە نە لە دووپاتکردنەوەی ئەو ڕاستییە و نە لە هەوڵدان بۆ وەدی هێنانی ماندوو نابین. دڵنیاین تەنیا بە یەکگرتووی دەتوانین هەل و دەفەتەکان بە قازانجی بزوتنەوەی کورد لە کوردستان بقۆزینەوەو کات بە فیڕۆ دانیش زیان بەخۆمان دەگەیەنێ و لە قازانجی داگیرکەرانە.






































ئه‌م بابه‌ته 1719 جار خوێنراوه‌ته‌وه‌‌

AM:10:43:20/02/2017