عەبدوڵڵا موهتەدی
درێژەكێشانی دیكتاتۆری كۆماری ئیسلامی لە ئێران و كزبوونی بڵێسەی شۆڕش لە كوردستانی رۆژهەڵات، بەڵای زۆر پێوە بووە و ئاكامی زیانباری زۆری لێكەوتۆتەوە...." />

لە ژێر چەتری پلاتفۆرمێكی هاوبەشدا



درێژەكێشانی دیكتاتۆری كۆماری ئیسلامی لە ئێران و كزبوونی بڵێسەی شۆڕش لە كوردستانی رۆژهەڵات، بەڵای زۆر پێوە بووە و ئاكامی زیانباری زۆری لێكەوتۆتەوە. جیابوونەوە و دابڕان و دانیشتن و دڵساردی و دووركەوتنەوەش بەشێك لە ئاكامەكانی ئەو بارودۆخەن. دیارە هۆكاری دیكەش بۆ جیابوونەوەكان هەن كە پێویستیان بە لێكدانەوەی وردی هەر كامیان هەیە، بەڵام دەكرێ‌ بەگشتی و لەناویاندا قەتیس مانەوەی ناچاری حیزبەكانی كوردستانی رۆژهەڵات لە چوارچێوەی تەسك و تەنگەبەر و پڕ لە مەحدوودیەتی هەرێمی كوردستان، كەوتنە بەر دەستێوەردانی ئەم و ئەو و هەروەها نەزانی و نابەرپرسایەتی كەسەكانیش ئاماژەیان پێ‌بكرێت.


لەنێو هەموو جیایی و لێكهەڵبڕانەكانی ساڵانی رابوردوودا، كە لەنێو حیزبە سیاسییەكانی رۆژهەڵاتی كوردستاندا كەمیش نەبوون، رەنگە تەنیا جیابوونەوەی كۆمەڵەی شۆڕشگێڕ لە حیزبی كۆمۆنیستی ئێران جیابوونەوەیەكی بەڕاستی خاوەنی بنەما و تەوزیحی تێۆریك و خاوەنی مەنتیقی سیاسی بووبێت. بەبێ‌ ئەوەی لێرەدا پێداگری لەسەر روانینی خۆم بۆ ئەو جیابوونەوەیە بكەم، بەبێ‌ ئەوەش كە خوێندنەوەی لایەنی بەرامبەر قبووڵ بكەم، بەڵام هەموو لایەك لە سەر خاڵێك كۆكن ئەویش هەبوونی پرەنسیپ و مەنتیقی فكری و سیاسی بۆ جیاییەكەیە.

بۆ من هیچ شتێك لە جیابوونەوە و لەت كردنی كۆمەڵە (یان هەر حیزبێكی خەباتكار و شۆڕشگێڕ) بەبێ‌ هەبوونی خەت و بەرنامە و سیاسەتی روون و جیاواز، بێ‌ماناتر و بێ‌پاساوتر و نابەرپرسانەتر نییە، هەروەكوو بینیویشمانە بێجگە لە دیاردەی مەنفی هیچ ئاكامێكی لێنەكەوتۆتەوە. بەهەمان شێوە، یەكگرتنی بێ‌بنەمای سیاسی رۆشنیش كە جاربەجار دەنگۆكەی بڵاو دەكرێتەوە بە هەوڵێكی ناسەركەوتوو و بێ‌داهاتوو دەبینم.

بەهەرحاڵ، بابەتێك كە لێرەدا دەمەوێ‌ بیهێنمە گۆڕێ‌ و پێشنیاری بكەم نەك یەكگرتنەوەیەكی حیزبی لەنێوان كۆمەڵەی شۆڕشگێڕی زەحمەتكێشانی كوردستانی ئێران و كۆمەڵەی رێكخراوی كوردستانی حیزبی كۆمۆنیستی ئێران بەڵكوو نزیكبوونەوەیانە لەژێر پلاتفۆرمێكی سیاسی هاوبەش و هاوكاری كردنیانە لە چوارچێوەی ئەو پلاتفۆرمەدا.

بەڵام ئایا ئەمە پرۆژەیەكی خەیاڵی نییە؟ ئایا نموونەی مێژوویی بۆ ئەو چەشنە هاوكارییە هەیە؟ خاڵە هاوبەشەكان كامانەن و ئەسڵەن پێویستی و قازانجەكەی چییە؟


سەرتاپای مێژووی چەپ و شۆڕشگێڕی دنیا پڕە لەو چەشنە رێككەوتنانە و تەنانەت دروست كردنی بەرەی هاوبەش لەنێوان هێزە چەپەكان لەنێو خۆیاندا و هەروەها زۆر جار لەگەڵ لایەنە ناچەپەكانیش. بەرەی رزگاریخوازی ڤیەتنام، كە لە دنیای رۆژئاوا بەناوی ڤیەت كۆنگ دەناسرا، نموونەیەكی بەرچاوی ئەو رێككەوتنەیە كە لە نێوان كۆمۆنیستەكان و لایەنە سیاسی و كۆمەڵایەتی و چینایەتییە جیاكان بۆ بەرەنگاری و وەستانەوە بەرامبەر بە هێرشی ئەمریكا و رژیمە داردەستەكەی لەو وڵاتە پێكهات و كۆمۆنیستەكانیش دەستپێشخەری بوون. پێویستی وەستانەوە بەرامبەر بە دوژمنێكی هاوبەشی داپڵۆسێنەر، لەئارادا بوونی بزووتنەوەیەكی موقاوەمەتی رزگاریخوازانە و پێویستی بەهێزكردن و فراوان كردنی ئەو بزووتنەوەیە وای كردبوو كە هەمووان لە بن چەتری ئەو بەرەیە و پلاتفۆرمە سیاسییەكەیدا كۆببنەوە. بەرەیەك كە لەپاڵ كۆمۆنیستەكان و لایەنەكانی دیكە، تەنانەت راهیبە بووداییەكانیشی تێدا بوون كە نەك تەنیا بەبیروباوەڕ جیا بوون بەڵكوو شێوازی خەباتیشیان جیاواز بوو. لە حاڵێكدا پارتیزانە ڤیەت كۆنگەكان لەخەباتێكی چەكداری بێ‌وچاندا خەریكی زەبر وەشاندن بوون، پیاوە ئایینییە بووداییەكان لە رێگای خۆسووتاندنی ئاشكرا لە سەر شەقامەكانی سایگۆن ویژدانی دنیایان دەهەژاند.

نموونەیەكی دیكە لەو چەشنە هاوكارییە بەرەی موقاوەمەتی دژی فاشیستی فەرانسە و زۆر لە وڵاتانی دیكەیە كە لە كاتی داگیركرانی وڵاتەكەیان لەلایەن سوپای هیتلەرەوە پێكهات كە تێیدا هەم كۆمۆنیستەكان، هەم سۆسیالیستەكان و هەروەها هەم هێزە ناچەپەكان و گۆلیستەكان (لایەنگرانی ژەنەڕاڵ دۆگۆل) بەشدار بوون و گەورەترین حەماسەیان بەدژی فاشیستەكان خوڵقاند و دوای سەركەوتنیش هەركام لەو هێزانە رێبازی تایبەتی خۆی لە سیاسەتدا گرتەبەر. ئەم بەرەی دژی فاشیستیە لە وڵاتانی دیكەی ئوروپاییش، لەوانە یۆنان، دەورێكی باشیان بۆ رزگار كردنی وڵاتەكانیان لە بن دەستی هێزەكانی ئاڵمانی فاشیست گێڕا.


نموونەی نزیكتریشمان هەیە. كۆنگرەی نیشتمانی ئەفریقا، ئەو بەرەیەی كە دواتر نێلسۆن ماندێلا بوو بە سیمای ناسراو و بە سەرۆكی، لەسەر بنەمای خەبات بۆ هەڵوەشاندنەوەی سیستەمی ئاپارتاید زۆر هێز و رێكخراوی لە چوارچێوەی خۆیدا كۆكردبووەوە كە زوربەشیان مەیلی چەپیان هەبوو و حیزبی كۆمۆنیستی ئەفریقای باشوور یەك لەوان بوو. دواتر كۆنگرەی نیشتمانی ئەفریقا بۆ پەرەسەندنی زۆرتری خەباتەكەیان و بەرینتر كردنەوەی بەرەی دژی ئاپارتاید لەگەڵ كۆمەڵێك رێكخراوی دیكەش لەوانە رێكخراوە ئایینییەكان و كلیساكان هاوكاری نزیكیان كرد و توانیان سەرنجی رای گشتی و دەوڵەتانی جیهانی و هەموو كۆمەڵگەی نێونەتەوەیی بۆ پشتیوانی لە ئامانجەكەیان كە هەڵوەشاندنەوەی ئاپارتاید بوو رابكێشن.

هاوكاری هێزە چەپ و پێشكەوتنخوازەكانی ئوروپا چ لە كەمپەینە كۆمەڵایەتییەكان و چ لە كاتی هەڵبژاردنەكانیشدا شتێكی زۆر باوە و نمونەی زۆری هەیە. ئاخرینیان هاوكاری هێزە چەپەكان و لەوانە حیزبی كۆمۆنیست لە هەڵبژاردنی یۆنانە كە بوو بە هۆی سەركەوتنیشیان لەو هەڵبژاردنەدا.


هەڵبەت هاوكاری نێوان هەموو هێزە سیاسییەكانی كوردستانی ئێران و دروستكردنی بەرەیەكیش لە نێوانیاندا، پێویستییەكی سەردەم و ئامانجێكی كۆمەڵەی شۆڕشگێڕە كە ساڵەهایە هەوڵی بۆ دەدا. بەڵام با روونی بكەینەوە كە ئەوەی لێرەدا مەبەستمانە نەك ئەو بەرە گشتگیرە كوردستانییە بەڵكوو هاوكاری نێوان كۆمەڵەی شۆڕشگێڕ و كۆمەڵەی حیزبی كۆمۆنیست و بەگشتی لەنێوان هەموو ئەو تێكۆشەرانەیە كە دوای ساڵەها لێكدابڕان ئێستاش خۆیان بە كۆمەڵە پێناسە دەكەن و ئەوەندەشیان خاڵی هاوبەشی سیاسی و خەباتكارانە هەیە كە بتوانن لەژێر پلاتفۆرمێكی هاوبەشدا هاوكاری بكەن. ئاشكرایە كە پێكهاتنی وەها پلاتفۆرمێك زەمینە بۆ بەرەیەكی گشتگیری كوردستانیش خۆشتر دەكات.

لەراستیدا هەبوونی پلاتفۆرمێكی ئاوا دەبێتە هۆی ئەوەی كە هەموو تێكۆشەرێكی رێبازی كۆمەڵە، لەوانەوە بگرە كە خۆیان بە كۆمۆنیست دەزانن تا ئەوانەی خۆیان بە سۆسیالیست و سۆسیال دێمۆكرات یان بەگشتی بە پێشكەوتنخواز دادەنێن، هەموو ئەوانەی خوازیاری گەشە و پێشكەوتنی كۆمەڵەن و بەهێزتر كردنی ئەم رەوتە بە فاكتەرێكی گرینگ لە رەوتی پێشكەوتنخوازی و دێمۆكراسیخوازی و دادپەروەری كۆمەڵایەتی لە كوردستاندا دەزانن، بتوانن بۆی بكەونە كار و هەر بۆیەش دەتوانێ‌ ببێتە هۆی بووژانەوەیەكی گەورە، بەتایبەت لە دەرەوەی وڵات، لەنێوان ئەو جەماوەرە زۆرەی كە رێكخراو نین، حیزبی نین، بەڵام ساڵەهایەكی زۆر لە تەمەنی خۆیان لەژێر ئاڵای كۆمەڵەدا خەباتیان كردوە و رەنجیان داوە و ئێستاش شانازی بەو مێژووە و بەو خەباتە دەكەن. دڵنیام زۆربەی هەرە زۆری ئەو كەسانە، كە رەنگە بە هەمان شێوەی پێشوو و لە چوارچێوە ئیدیۆلۆژییەكەی جارانیشدا بیر نەكەنەوە، پێیان خۆشە فرسەتێك هەڵكەوێ‌ تا جارێكی دیكە خزمەتێك بەو رێبازە گشتییە بكەن و رێبازی كۆمەڵە بەگشتیش خێرێكی گەورە دەكا لەوەی كە ئەو گشتە تێكۆشەرە بەئەزموونە جارێكی دیكە لە دەوری كۆبنەوە و خۆی تێدا بدۆزنەوە و هەوڵی بۆ بدەن. كێ‌ دەڵێ‌ لە ئەنجامی پرۆسەی هاوكاری و سەرلەنوێ‌ نزیكبوونەوە لە چوارچێوەی پلاتفۆرمێك لە خاڵە هاوبەشەكاندا، زەمینە بۆ تێگەیشتنی تازەتر لەسەر كێشە فكرییەكانیش خۆش نابێت؟ بەڵام با ئەوە دانێین بۆ داهاتوو و بچینەوە سەر باسەكەی ئێستامان.


بەبڕوای من جێی ئەوەیە كە هاوڕێیانی رێكخراوی كوردستانی حیزبی كۆمۆنیستی ئێران لە خۆیان بپرسن: بەڕاستی بۆ ناكرێ‌ ئەوان لەگەڵ ئێمە سەرەتایەكی دیالۆگ بۆ تاوتوێ‌ كردنی بابەتی هاوكاری دەست پێبكەن؟ سنوورە نەزەری و بەرنامەییەكانمان دیار و بەرچاون و كەس داوای ئەوە ناكات كە هیچ لایەكمان دەستی لێهەڵگرین. بەڵام با لە نزیكەوە گوێ‌ لە ڕا و بۆچوونی یەكتری بگرین، با دەست بە گفتوگۆیەكی راشكاو لە نێوان خۆماندا بكەین و زەمینەكانی هاوكاری لەنێوانماندا تاوتوێ‌ بكەین. ئەگەریش دەپرسن: هاوكاری لەسەر چی، دەڵێم: لەسەر تێكۆشان بەدژی نیزامی كۆنەپەرست وسەركوتكاری كۆماری ئیسلامی و هەڵپێچانی ئەو رژیمە لە كوردستان، لەسەر مافی دیاری كردنی چارەنووس بۆ گەلی كورد و لەسەر پتەو كردن و بەهێز كردن و بەسەركەوتن گەیاندنی بزووتنەوەی رزگاریخوازانەی گەلی كورد لە كوردستان، لەسەر سێكولاریزم و جیایی دین و دەوڵەت، لەسەر دێمۆكراسی لەناوخۆی كوردستان و مافە سیاسی و فەرهەنگی و كۆمەڵایەتییەكان، لەسەر ئازادی بێ‌لەمپەری دەربڕین و بەیان، لەسەر ئازادی یەكیەتی و سەندیكا كرێكارییەكان و رێكخراوە مەدەنی و پیشەییەكان، لەسەر ئازادی رێكخستن و ئازادی خۆپیشاندان و ئازادی مانگرتن، لەسەر یاسای كارێكی پێشكەوتنخوازانە، لەسەر یەكسانی مافی ژن و پیاو لە كۆمەڵگا، لەسەر قەدەغە كردنی چەوسانەوەی منداڵان و دابین كردنی خوێندن و پێگەیشتن بۆ هەموو منداڵانی وڵاتەكەمان، لەسەر بیمەی بێكاری و لەسەر دامەزراندنی سیستەمی بیمەی پزیشكی و دەرمانی بۆ هەمووان، لەسەر ئازادی تاك و كۆمەڵ بۆ هەڵبژاردنی رێبازی سیاسی خۆی و قەدەغە كردنی هەر چەشنە دەست بۆ چەك بردنێك لەناوخۆی كوردستان لەنێوان هێزە سیاسییەكاندا، بەڵێ‌، بەڕاستی جێی پرسیارە لەسەر ئەو خاڵانە و شتی لەو بابەتە بۆ ناتوانین هاوكاری بكەین؟ لە حاڵێكدا كە سنووربەندی فكری و سیاسی نێوانمان و بەرنامە و رێبازی سەربەخۆی هەر كامێكیشمان لەجێی خۆی پارێزراو دەمێنێتەوە.


گومانم لەوەدا نییە كە هاوڕێیانی كۆمەڵەی حیزبی كۆمۆنیستی ئێرانیش لەو بڕوایەدان كە هەر رۆژ و سەعاتێك كە بە تەمەنی رژیمی كۆماری ئیسلامی زیاد بێت، رۆژ و ساتێكە لەخزمەت تاوانی كۆمەڵایەتی و سیاسی و فەرهەنگی زۆرتر و پەرەسەندنی گەندەڵی و دواكەوتوویی و كۆنەپەرستی دا و شانسی پێشكەوتنخوازی و عەداڵەتخوازی و ئازادیخوازی زۆرتر كوێر دەكاتەوە. ئایا هەبوونی دوژمنێكی هاوبەشی وەكوو رژیمی سێدارەی كۆماری ئیسلامی نابێ‌ هانمان بدا بۆ هاوكاری لەگەڵ هێزەكانی دیكە؟ حەتمەن ئەوانیش مەترسی پەرەسەندنی ئیسلامی سیاسی توندڕەو و تێرۆریست لە داهاتووی كوردستاندا هەست پێدەكەن. ئایا پێیان وایە بەتەنیا خۆیان، بە هەر جەماوەرێكەوە كە هەشیانە یان دەیانبێت، دەتوانن چاری كۆماری ئیسلامی و هەموو رەوتە كۆنەپەرستەكانی ئێستا و داهاتوو بكەن؟ كەسێك كە خۆی ئەسیری ئەو چەشنە بیركردنەوە سەیر و سەمەرەیە نەكردووە، دەبێ‌ بیرێك لە هاوكاری لەگەڵ هێزەكانی تر بكاتەوە و دەبێ‌ لە نزیكترین هێزەكانیشەوە دەست پێبكا.

هاوڕێیانی رێكخراوی كوردستانی حیزبی كۆمۆنیستی ئێران مافی خۆیانە هەزار رەخنەی ورد و درشتیشیان لە ئێمە هەبێ‌، هەر وەكوو ئێمەش قسە و رەخنەی خۆمان لەسەر جۆری چەپایەتی و سیاسەتی ئەوان هەیە. هەر كامەشمان بۆمان هەیە بە سەربەستی و راشكاوی قسە و رەخنەكانمان باس بكەین و بینووسین و جێی گلەییش نییە، بەڵام بەو حاڵەشەوە ئایا لە زۆر شتدا ئێمە لە یەكتری نزیكتر نین؟ ئایا مێژووی هاوبەشی رابوردوو و دەیان ساڵ خەباتی هاوبەش و هاتنە دەر لە كوورەی دەیان و سەدان ئەزموونی گەورە و بچووكی شۆڕشگێڕانەی رابوردوو، هیچ خاڵێكی هاوبەشی لەنێوانماندا دروست نەكردووە؟ ئایا هەر ئەو راستییەی كەهەر لایەكمان، لە دیدی خۆیەوە، خۆی بە میراتگری كۆمەڵە و خەباتەكەی دەزانێ‌، مانای ئەوە نییە كە زەمینەی هاوبەش و خاڵی هاوبەش لەنێوانماندا ماون و كەمیش نین؟


جێی خۆیەتی هەموومان هەڵە گەورە و كوشندەكەی ستالین لەسەرەتای هاتنە سەركاری هیتلەرەوە بهێنینە پێش چاوی خۆمان و دەرسی لێ‌ وەرگرین. ئەو كات زۆر كەس داوایان لە ستالین و لە كۆمینتێرن كرد با كۆمۆنیستەكانی ئاڵمان لەگەڵ سۆسیال دێمۆكراتەكان، كە بەسەر یەكەوە هێزێكی زۆر گەورەشیان پێك دەهێنا و دەیان توانی لەمپەرێكی گەورە لەبەردەم بەدەسەڵات گەیشتنی فاشیزم دروست كەن، هاوكاری بكەن و بەرەیەكی دژی فاشیستی پێك بهێنن. بەڵام وەڵامێكی كە وەریان گرت ئەوە بوو: فاشیستەكان و سۆسیال دێمۆكراتەكان هەر دوكیان نوێنەری بورژوازین بۆیە فەرقیان لەگەڵا یەكتری نییە، فاشیزم و سۆسیال دێمۆكراسی دوو رووی سكەی دەسەڵاتی چینی سەرمایەدارن و بۆ ئێمە هیچ فەرقێكیان نییە. یەكیەتی سۆڤیەت و كۆمینتێرن، كە ئەو كات بەتەواوی لە بندەستی ستالین و خەتەكەی دابوو، تەنیا دوای بەهێز بوونی فاشیزم و دوای ئەوەی كە یەكە یەكەی هەموو هێزەكان، بە كۆمۆنیست و سۆسیال دێمۆكرات و لیبراڵ و جوولەكە و ئەوانی دی كەوتنە بەر شاڵاوی داپڵۆسێنەری دەزگای سەركوتی فاشیزم، سیاسەتی خۆیان گۆڕی و ئامادەی هاوكاری سۆسیال دێمۆكراتەكان بوون، بەڵام ئیتر زۆر درەنگ ببوو و كارەساتی گەورەی فاشیزم و جەنگی دووهەمی جیهانی خوڵقابوو. هەموو جیهان و بەتایبەت یەكیەتی سۆڤیەت دواتر نرخێكی زۆر قورسیان بۆ ئەو هەڵەیە دا. شیعرە مانادارەكەی بێرتۆڵد برێشت هەر لەو پەیوەندییەدا داندراوە. ئایا هاوڕێیانی كۆمەڵەی سازمانی كوردستانی حیزبی كۆمۆنیستی ئێران دەیانەوێ‌ ئەو ئەزموونە هەڵەیە دووپات كەنەوە؟ ئایا پێیان وا نییە كە بەرەنگار بوونەوەی كاریگەر و راستەقینەی دوژمنێكی تۆتالیتەری شێوە فاشیست، وەكوو كۆماری ئیسلامی، هاوكاری هەموو هێزەكان دەخوازێ‌؟ ئایا ئێمە و ئەوان، سەرەڕای هەموو جیاوازی و ناكۆكییەكیش، لە حاست ئەو دوژمنەدا و بۆ پاراستنی كوردستانی شۆڕشگێڕ و بزووتنەوەكەی، بەرژەوەندی هاوبەشمان نییە؟ ئایا ئێمەمانان لەچاو خەڵكی دیكە لە یەك نزیكتر نین؟

بەڕاستی جێی پرسیارە ئایا جیابوونەوەی شازدە ساڵ لەوە پێشی ئێمە لە حیزبی كۆمۆنیستی ئێران، كە ئەویش بەوتەی خۆیان لەسەر بنەمای جیاوازی فكری و سیاسی بووە، دەبێ‌ تا ئیقرازی عالەم ببێتە هۆكارێك بۆ بوغزاندن و نەدواندنمان؟ بەڵێ‌ راستە، زۆر شت لێكی كردوین، بەڵام زۆر شتیش هەن كە پێكمانەوە گرێ‌ دەدەن. چەپایەتی پاوانی ئێوە نییە، تەنیا خوێندنەوەی چەپیش لەم دنیایەدا ئەوە نییە كە ئێوە نوێنەرایەتی دەكەن. ئەو حوكمە بۆ ئێمەش راستە.


ئاڵۆزییەكانی ناوچەكە و نادیاربوونی داهاتوو، تایبەتمەندی سەردەمی ئێستایە. لەم بشێوەیە گەورەیەدا كە هەموو ناوچەكەی گرتۆتەوە، كوردی ئێران زەرەرمەندی یەكەمە لە مانەوەی كۆماری ئیسلامی و دام و دەزگا ستەمكار و داپڵۆسێنەرەكەی و دەتوانێ‌ سوودمەندی یەكەمیش بێت لە گۆڕانكاری سیاسی لەو وڵاتەدا. لەو گۆڕانكارییە دایە كە كوردی رۆژهەڵات دەروازەی خەبات بۆ مافە گەورەكانیان لەسەر پشت بۆ دەكرێتەوە و دەكەونە سەر شاڕێی خەباتی سیاسی و مەدەنی و كۆمەڵایەتی بۆ دەستەبەر كردنی مافەكانیان. ئایا دۆستانی رێكخراوی كوردستانی حیزبی كۆمۆنیستی ئێران پێیان وایە لە پرۆسەی خەبات بۆ ئەو گۆڕانكارییە مەزنەدا كە هەموومان كاری بۆ دەكەین، هیچ شتێك نییە لێكمان نزیك كاتەوە؟ ئایا هەبوونی دوژمنێكی هاوبەشی لە فاشیست خراپتری وەكوو كۆماری ئیسلامی، وێڕای زۆر خاڵی هاوبەش لە بەرنامەی سیاسیماندا كە لەسەرەوە بەكورتی ئاماژەم پێكردن، وێڕای مێژوویەكی هاوبەشی پڕ لە شانازی و هاوسەنگەر بوونمان بۆ ماوەیەكی دوور و درێژ، وێڕای ئەو مەترسییانەی لەسەر هەرتكمانە و ئەو مەحدودیەتانەی بەسەر هەرتك لاماندا دەسەپێندرێن، ئەوانە و زۆر شتی دیكە بە هەموویان بۆ ئەوە نابن لانی كەم ئێمە پێكەوە دانیشین و بیر لەوە بكەینەوە كە لاپەڕەیەكی نوێ‌ لەنێوان خۆماندا هەڵدەینەوە و شێوازێك بۆ هاوكاری و پێكەوە هەڵكردنمان بدۆزینەوە؟ ئاڵمان و فەرانسە كە دوو شەڕی گەورەی جیهانیان بەدژی یەك كردبوو، ئاشت بوونەوە و پێكەوە بناغەی یەكیەتی ئوروپایان دانا، ژاپۆن كە لە جەنگی دووهەمی جیهانی لەلایەن ئەمریكاوە بۆمی ئەتۆمی بەركەوتبوو ئێستا لەگەڵ ئەو وڵاتە بوونەتە نزیكترین هاوپەیمان، ئەمریكا حەوت میلیۆن تۆن بۆمبی بەسەر ڤیەتنامدا باراند، بەڵام ئێستا ڤیەتنام، كە لەلایەن حیزبی كۆمۆنیستیشەوە بەڕێوە دەچێت، لەگەڵا ئەمریكا ئاشت بوونەتەوە و نەك هەر پەیوەندی ئاساییان پێكەوە هەیە بەڵكوو لەبەر مەترسی هاوبەشیان لەحاست چین، دۆستایەتی و هاوكاریشیان گەرمە. ئایا كێشەی نێوان ئێمە لە هەموو ئەوانە قووڵتر و چارهەڵنەگرترە؟ بۆ ئێمەش لەپێناو بەرژەوەندی بزووتنەوەكەمان و بۆ وەستانەوە لەحاست دوژمنی هاوبەشمان، بیر لە تواندنەوەی سەهۆڵبەندانی نێوانمان نەكەینەوە؟ بەدڵنیاییەوە هیچ لایەكمان زەرەر ناكەین، بەپێچەوانە دەرفەتێكی نوێ‌ دەخوڵقێنین كە سەدان و بگرە هەزاران تێكۆشەری لە ئێمەمانان هەڵبڕاوی دێرینی كۆمەڵە بە گەرم و گوڕی لەژێر چەتری پلاتفۆرمێكدا كۆبنەوە و دەرفەتێكی نوێش بۆ رەوتی پێشكەوتنخوازی كوردستان دەهێنینە ئاراوە، بزووتنەوەكەمانی پێ‌ دەگەشێنینەوە و دۆستان و دڵسۆزانی پێ‌ خۆشحاڵ دەكەین.


ئەمن بەبەشی خۆم بەشانازییەوە بۆ هەڵگرتنی هەموو هەنگاوێك، بۆ سەردانی هەموو بنكەو بارەگایەك، بۆ چوونی هەموو ماڵێك یان بۆ بەپیرەوەچوونی هەموو میوانێك ئامادەم. بانگەوازی هەموو لایەكیش دەكەم كە ئەگەر لەم بارەیەوە دەنووسن و دەدوێن، تكایە كای كۆن زۆر بەبا مەكەن، بە زمانی زبر مەدوێن، بەڵكوو بەو پەڕی رێز و دڵسۆزییەوە و بۆ رێك خستنمان بنووسن و بدوێن نەك بۆ لێك كردنمان. هیواداریشم هاوڕێیانی رێكخراوی كوردستانی حیزبی كۆمۆنیستی ئێران (كۆمەڵە) وەڵامی گونجاو بەو پێشنیارە بدەنەوە و لانی كەم بۆ دەستپێكردنی دیالۆگ و گفتوگۆ لەم بارەیەوە ئامادەیی نیشان بدەن.



عەبدوڵڵا موهتەدی

2ی پووشپەڕی 1395ی هەتاوی، 22ی ژوئەنی 2016ی زایینی






ئه‌م بابه‌ته 10248 جار خوێنراوه‌ته‌وه‌‌

PM:06:31:22/06/2016