ئامانج و ستراتیژى کۆمەڵە لە بزووتنەوەى کوردستاندا



پەسەندکراوى کۆنگرەى نۆهەمى کۆمەڵە
   پووشپەڕ – گەلاوێژى  1380



فەسڵى یەکەم- کێشەى کورد لە ئێران و بزووتنەوەى شۆڕشگێڕانەى کوردستان

یەک: ئێران وڵاتیکى فرەنەتەوەیە کە تێیدا ستەمگەریى  نەتەوەیى لە خزمەت پاراستن و پتەوکردنى دیکتاتۆرى و زۆردارى، سەرکوتکردنى داواکان و بزووتنەوە رەواکان پێکهێنانى دووبەرەکى و دوژمنایەتى لە نێوان کرێکاران و زەحمەتکێشان دا و پەرەپێدانى دەمارگیرى و رقەبەرى بەربەست کردنى رێگەى گەشە و سەرهەڵدانى ئازادانەى سیاسی و ڕۆشنبیری کۆمەڵگاى ئێران و پاراستن و پتەوکردنى دەسەڵاتى کۆنەپەرستى و ئەمپریالیزم دا بووە و هەیە.   

دوو: نەتەوەى کورد، نەتەوەیەکى زۆر لێکراوە کە لە ئەنجامى دابەشکردنەوەى سەرلەنوێى جیهان لە نێوان  دەوڵەتانى ئەمپریالیستی دا دواى شەڕى یەکەمى جیهانى لە نێوان وڵاتانى ناوچەکەدا دابەشکراوە و مافى پێکهێنانى  دەوڵـەتى نیشتمانیى لێ زەوت کراوە. بوونى ستەمى نەتەوەیى لە پاڵ دڕندانەترین شێوەى سەرکوتکردن دا، هەمیشە هۆیەک بووە بۆ دواکەوتوویى ئابوورى و ڕۆشنبیریى ئەم نەتەوەیە.
گەلى کورد گەلێک جار لە دژى ئەم ستەمگەرییە نەتەوەییە و بۆ بەدەستهێنانى مافى دیاریکردنى چارەنووس هاتووەتە مەیدانى خەبات و بەرەنگاربوونەوە. ئەم خەبات و بەرەنگاربوونەوانە کە راستەوخۆ لە دژى حکوومەتە دیکتاتۆرییەکانى ناوەند بوون، لە رابردوودا سەرۆک عەشیرەتەکان، شێخەکان، دەرەبەگەکان و دواتر هێزە بۆرژواییەکان رێبەرایەتییان کردوون. ئەم هێزانە لە کوردستان لەگەڵ بەرژەوەندى زەحمەتکێشان ناتەبا بوون و ستەمیان لێدەکردن، لە رێبەرایەتیکردنى خەباتى نەتەوەیش دا راڕا و ناپەیگیر بوون و جارى وابووە لەگەڵ چینە ستەمگەرەکانى نەتەوەى باڵادەست لە دژى جەماوەرى زۆرلێکراو رێککەوتوون.

 سێ: زاڵبوونى شێوەى بەرهەمهێنانى سەرمایەدارى و ئاڵوگۆڕە کۆمەڵایەتییە بەرینەکانى کە بە دوویدا هاتن، لە چەند دەیەى رابردوودا، ئەنجامى سیاسى و رۆشنبیرى گەورەى لە کۆمەڵدا لێکەوتووەتەوە، زەمینەى وشیاربوونەوە و هاتنە مەیدان و رێکخراوبوونى چینى کرێکارى هەرچى زیاتر پەرەپێداوە و دەورو گرینگى کۆمەڵایەتی ئەو چینەى گەلێک زیاتر کردووە و بەم جۆرە بناغەى ماددیى رێبەرایەتى چینى کرێکار و حیزبى سیاسیى ئەو چینەى لە بزووتنەوەى کوردستان دا پێکهێناوە.
سەرهەڵدان و گەشەکردنى کۆمەڵە خۆى حاسڵى ئەم ئاڵوگۆڕە کۆمەڵایەتییە تازەیە بووە و پەیوەندێکى تەواوى بووە لەگەڵ گۆڕانى کۆمەڵگەى کۆن و باب مەزنانە، سەرهەڵدانى بەرینى چینى کرێکار، شارنشینیى تازە، پەرەگرتنى خوێندنى گشتى، زیادبوونى دەورى ژنان و لاوان و بەرزبوونەوەى ئاستى چاوەڕوانییەکانى خەڵک لە ژیانى کۆمەڵایەتی کۆمەڵە هێزێکی تازە بوو کە لە زەمین و زەمانى ئەم ئاڵوگوڕە کۆمەڵایەتییەدا، لە لایەک لە ژێر تیشکى رادیکاڵیزە بوونى کەش و هەواى سیاسیى ئێران و گرسانى چەپێکى شۆڕشگێڕ لە ئێران لە کۆتایى شەستەکانى زایینیدا و لە لایەکی دیکە لە ژێر تیشکى هەلومەرجى تایبەتى کۆمەڵگاى کوردستان و بزووتنەوەى شۆڕشگێڕانەى گەلى کورد، پێکهات و گەشەى کرد. هاتنەمەیدان و هەڵسووڕانى بەرینى کۆمەڵە وەک هێزێکى چەپ و پێشڕەو، کە داهێنەرى فەرهەنگێکى سیاسیى جیاواز و نوێ و سیاسەت و رێبازى خەباتکارانەى تازە بوو و، ئەو بنکە جەماوەرییە بەرینە کە لە ئەنجامى ئەم هەڵسووڕانەدا بە دەستى هێنا، بەش بە حاڵى خۆى کارى کردە سەر کۆمەڵگاى کوردستان و بزووتنەوەى شۆڕشگێڕانەى گەلى کورد و کارى کردە سەر چەپى ئێرانیش.
سەرهەڵدان و هەڵسووڕانى کۆمەڵە، شوێنەوارێکى قووڵى لەسەر رەوتى وشیاربوونەوە و خەباتى کرێکاران و زەحمەتکێشانى کوردستان بەجێهێشت بە جۆرێک کە هێنانەگۆڕى مەسەلەکانى پەیوەندیدار بە کرێکاران و مافەکان و خەباتیان لە کوردستان، لەگەڵ ناو و هەڵسووڕانى کۆمەڵە تێکەڵ بووە. هەروەها کۆمەڵە لە بوارى دیکەش دا، وەک بایەخ پێدان و پشتبەستن بە هەنگاوەکانى جەماوەر و بزووتنەوە جەماوەرىیەکان، داکۆکیکردن لە جووتیارانى زەحمەتکێش، داکۆکیکردن لە دێمۆکراسى و لە ماف و ئازادییەکانى خەڵک و شارۆمەندان، راگەیاندنى راشکاوانەى مەسەلەکانى بزووتنەوەکە بە کۆمەڵانى خەڵک  و داکۆکیکردنى لێبڕاوانە لە مافەکانى خەڵکى کوردستان، داکۆکیکردن لە مافەکانى ژنان و، لە بوارى دیکەى لەم بابەتەدا ناوەرۆک و شێوازى تازە و پێشکەوتنخوازانەى بە بزووتنەوەى گەلى کورد بەخشیوە و لەم مەیدانانەدا دەورێکى حاشاهەڵنەگرى بووە و گەلێک لە دەسکەوتەکانى بزوووتنەوەى کوردستان لەم بوارانەدا بەرهەمى هەڵسووڕانى رەوتى رادیکاڵ و سۆسیالیستیى کۆمەڵەن.
بەم جۆرە کۆمەڵە وەک حیزبى پێشەنگ و رابەرى بزووتنەوەى شۆڕشگێڕانەى کوردستان، لە دژوارترین هەلومەرجدا و بەدانى هەزاران قوربانى، لە ریزەکانى پێشەوەى ئەم خەباتەدا ئامادە بووە و، لە مێژوویى خەباتى کرێکاران و زەحمەتکێشانى کوردستان و بزووتنەوەى شۆڕشگێڕانەى گەلى کورد دا جێگەیەکى بۆ خۆى مسۆگەر کردوە کە لە سڕینەوە نایە.

چوار: زیاتر لە بیست ساڵ دەسەڵاتدارییەتى کۆمارى ئیسلامى، گەلێک مەینەتى ئابوورى و بژێوى و سیاسى و فەرهەنگیى گەورەى بەسەر هەموو خەڵکى ئێران هێناوە و، ئێرانى کردووەتە دۆزەخێکى گەورەى ستەم و هەڵاواردن و سەرکوت. دەسەڵاتدارییەتى ئەم حکوومەتە لە کوردستان هاوتا بووە لەگەڵ هەڵاواردن و بێمافییەکى بەرینى نەتەوەیى و فەرهەنگى، بەڕێوەبردنى سیاسەتى هەڵاواردن لە بوارى گەشەپێدان و ئاوەدانیدا، دووبەرەکی نانەوەى مەزهەبى، پەرەپێدانى گیرۆدەیى بە ماددە سڕکەرەکان، سانسۆر و دانانى قەدەغە و قۆرغى جۆراوجۆر، داگیرکردنى چەکدارانە، چەکدارکردنى زۆرەملى، راگواستن، دوورخستنەوەى خێزانەکان، گرتن و شکەنجە و تیرۆر و کوشتن و لە سێدارەدان.
لە 28ى مانگى گەلاوێژى ساڵى1358ى هەتاویدا، حکوومەتى کۆمارى ئیسلامى بە بیانوویى پووچ و بە بێ گوێدانە داخوازە رەواکانى خەڵکى کوردستان و بە بەربەست کردنى هەموو رێگاچارەیەکى سیاسى، کوردستانى دایە بەر هێرشێکى هەمەلایەنەى چەکدارانە و لەشکرکێشییەکى بەرین، کە ئەم داگیرکردنە هەتا ئێستاش درێژەى هەیە. لەم ماوەیەدا حکوومەتى کۆمارى ئیسلامى دەستى لە هیچ کوشتار و وێرانکارییەک نەپاراستووە و لە ستەم و زۆردارى هەرچى لە دەستى هاتووە کردوویەتى. بەڵام مێژوویى بیست ساڵى رابردووى کوردستان لە هەمان کاتدا، مێژووى راوەستان و خۆڕاگریى خەڵک بووە و زیاتر لە بیست ساڵ سەرکوتگەرى و کوشتار نەیتوانیوە ئیرادەى کۆمەڵانى گەلى کورد تێک بشکێنێ و وایان لێ بکا کە دەست لە داوا رەواکانیان هەڵگرن.
هەر لە سەرەتاى هێرشى حکوومەتەوە بۆ کوردستان، بزووتنەوەیەکى بەرینى خۆڕاگریى سیاسى و چەکدارانە بەرپا بوو. لەو کاتەوە تا ئێستا کوردستان گەلێک شانۆى شکۆدارى خۆڕاگرى و کۆڵنەدانى خەڵکى خەباتکارى لە شێواز و مەیدانى جۆراوجۆردا بە خۆوە دیوە. بزووتنەوەى شۆڕشگێڕانە لە کوردستان لەم ماوەیەدا بە گەلێک هەوراز و نشێودا تێپەڕیووە و شانۆى خەباتى جۆراوجۆر بووە، لە خۆپیشاندان و مانگرتنەکانەوە بگرە هەتا راپەڕینى شارەکان و خۆڕاگریى شکۆدارى جەماوەرى، لە شەڕى قارەمانانەى هێزى چەکدارى شۆڕشگێڕەوە بگرە هەتا کۆچى بەکۆمەڵ بۆ ناڕەزایەتى دەربڕین و هەتا وتووێژ لەگەڵ نوێنەرانى حکوومەت و سەرەنجام هەتا شەپۆلى تازەى خۆپیشاندان و ئاخێزە جەماوەرییە بەرینەکانى ئەم ساڵانەى دوایى شارەکانى کوردستان، بەڵام هەرگیز سەرى تەسلیم بوونى دانەنواندووە و دەسەڵاتدارییەتى کۆنەپەرست نەیتوانیووە دەستەمۆى بکا و، خامۆشى نەیتوانیووە باڵى بەسەردا بکێشێ. حکوومەتى کۆمارى ئیسلامى، سەرەڕاى هەموو زەبروزەنگ و سەرکوتگەرى و داگیرکەرییەکانى، سەرکەوتنێکى سست و لەرزۆکى بەدەستهێناوە  و، نەک هەر مەسەلەى کوردستانى چارەسەر نەکردووە، بەڵکوو ئەم مەسەلەیە بەتەوژمتر و بەهێزتر لە هەمیشە لە بەرانبەر ئەو حکوومەتەدا خۆ دەنوێنێ.
کوردستان لەم ساڵانەى دواییدا وەخەبەرهاتنێکى سیاسى و رۆشنبیرى تازەى بە خۆوە دیوە. جەماوەرى بەرینى خەڵک و بە تایبەت لاوان، کە لە بێکارى و هەژارى و هەڵاواردن و ستەم وەگیان هاتوون و داهاتوویان لێ تاریک بووە، جموجۆڵێکى خەباتکارانەى تازەیان دەست داوەتێ. ترس لە رژیمى دیکتاتۆرى دینى جێگەى خۆىداوە بە بووژانەوە و سەرهەڵدان و حەقخوازى و، شەپۆلى ئەم خەباتە رۆژبەرۆژ مەوداى تازەتر دادەگرێ. هاوسەنگیى نێوان هێزى خەڵک و دەسەڵاتدارەتى لە کوردستان خەریکە بە قازانجى خەڵک دەگۆڕێ. زیاتر لە بیست ساڵ هەڵاواردن و سەرکوت نەک هەر خەڵکى کوردستانى نەبەزاندووە، بەڵکوو بووەتە هێزێکى خەباتکارانەى پەنگ خواردو کە لە هەموو رووداوێک دا خۆى نیشان دەدا و لەوانەیە لە هەلومەرجى گونجاودا وەک تەقینەوەیەکى سیاسى سەر هەڵ بدا.

فەسڵى دووهەم- ئامانجەکان و ستراتێژیى کۆمەڵە لە بزووتنەوەى شۆڕشگێڕانەى گەلى کورد دا
پێنج: مەسەلەى نەتەوایەتیى کورد، ئەگەرچى لایەنى ئابوورى و فەرهەنگى و هى دیکەى هەیە، بەڵام لە بنەڕەتدا ریشەى لە پێکنەهاتنى دەوڵەتى میللى و بەدینەهاتنى مافى چارەنووسى ئەم نەتەوەیەدایە و هەر بۆیە مەسەلەیەکى سیاسییە کە ناوەرۆکەکەى بریتییە لە بەدیهێنانى دەسەڵاتدارەتیى خەڵکى کوردستان بەسەر خاکى خۆیدا.
ئامانجى کۆمەڵە لە بزووتنەوەى شۆڕشگێڕانەى گەلى کورد دا بریتییە لە نەهێشتنى ستەمى نەتەوایەتى، راماڵینى دەزگا سەرکوتگەر و بۆرۆکراتیکەکانى حکوومەتى ناوەندى، بەدیهێنانى دەسەڵاتدارەتیى خەڵکى کوردستان بەسەر خاکى خۆیدا، پەرەپێدانى ئازادییە سیاسییەکان و عەداڵەتى کۆمەڵایەتى لە کوردستان و، پێکهێنانى حکوومەتێکى فیدراڵ کە نوێنەرى دەسەڵاتدارەتیى خەڵک و پارێزەرى بەرژەوەندەکانى کرێکاران و زەحمەتکێشانى کوردستان بێ.

شەش: ئێمە لایەنگرى یەکسانى مافى نەتەوەکان، هەڵوەشانەوەى هەموو جۆرە هەڵاواردن و ستەمێکى نەتەوەیى و، دژ بە پێکهێنان و هاندانى هەرچەشنە رقەبەرى و دوژمنایەتییەکى نەتەوەیین و خوازیارى نەهێشتن و قەدەغە کردنى هەر چەشنە دەست درێژییەک بۆ سەر مافەکانى کەمایەتییە نەتەوەییەکانین. هەر لەم پێناوەدا، ئێمە بۆ برەو پێدانى رۆحى برایەتى و هاوکاریى نێوان زەحمەتکێشانى گەلانى جۆراوجۆرى ئێران و خەبات بەرانبەر بە هەر چەشنە بەرچاوتەنگى و دژایەتییەکى نەتەوەیى و قەومى و ئایینى تێدەکۆشین. ئێمە بە پێى جیهان بینى و بەرنامەى سۆسیالیستیى خۆمان، مافى هەموو میللەتانى دانیشتووى ئێران  بۆ دیاریکردنى چارەنووسى خۆیان، یانى ئازادى ئەو نەتەوانە لە جیابوونەوە و پێکهێنانى دەوڵەتى سەربەخۆدا بە رەسمى دەناسین. لە هەمان کاتدا ئێمە خوازیارى یەکگرتنى ئازادانە و برایانەى نەتەوەکانى دانیشتووى ئێران لە پێکهاتەیەکى سیاسیى فیدراتیڤ داین و لەسەر ئەو بڕوایەین کە ئەم یەکگرتنە بە قازانجى دێمۆکراسى و بە قازانجى جەماوەرى زەحمەتکێشە.

کۆمەڵە هەوڵدەدا بۆ ئەوەى هەموو هێزە چەپ و ئازادیخوازەکان و لایەنگرانى راستەقینەى دێمۆکراسى لە ئێران، پشتیوانى لە بزووتنەوەى شۆڕشگێڕانەى گەلى کورد و لە داخوازە رەواکانى خەڵکى کوردستان بکەن. کۆمەڵە لە دیاریکردن و داڕشتنى   پەیوەندەکانى خۆیدا لەگەڵ ئەو هێزانە، ئەو پشتیوانییە لەبەرچاو دەگرێ .

حەوت: کۆمەڵە بۆ دەست کۆتاکردن و وەدەرنانى هێزە سەرکوتگەرەکانى کۆمارى ئیسلامى لە کوردستان و دامەزراندنى دەسەڵاتدارەتیى دێمۆکراتیکى راستەوخۆى جەماوەرى کرێکار و زەحمەتکێش لە کوردستان، بۆ پێکهاتن و بەهێزکردنى  شوورا کرێکارى و خەڵکییەکان، بۆ پێکهاتن و بەهێزکردنى سەندیکاکان و رێکخراوە کرێکارىیەکانى دیکە، بۆ دەستەبەر کردنى یاساى کارێکى پێشڕەو، بۆ هێنانەگۆڕ و بەرەوپێش بردنى هەر هەنگاوێگ کە خزمەت بە باش بوونى ژیانى ماددى و مەعنەویى کۆمەڵانى کرێکار و زەحمەتکێش بکا، بۆ هەڵوەشاندنەوەى هەر چەشنە جیاکارى و هەڵاواردنێک لە نێوان ژن و پیاودا و بۆ یەکسانیى مافەکانى ژن و پیاو و بۆ هێنانە مەیدانى هێزى گەورەى ژنانى زۆرلێکراو لە خەباتدا لە پێناو ئازادى و بەرابەریى مافەکاندا و بۆ پێکهاتن و بەهێزکردنى رێکخراوەکانى ژنان، بۆ هەڵوەشاندنەوەى هەرچەشنە هەڵاواردن و ستەمێکى نەتەوەیى و فەرهەنگى، بۆ جیایى دین لە دەوڵەت، بۆ بەهێز کردن و پەرەپێدانى هەنگاوە راستەوخۆکانى جەماوەر و بزووتنەوە و رێکخراوە دێمۆکراتیک و جەماوەرییەکان، بۆ چەکدار کردن و هەڵخڕاندنى جەماوەرى کرێکار و زەحمەتکێش بۆ داکۆکى لە دەسکەوتەکانیان و پاراستنى کوردستانى شۆڕشگێڕ بەرانبەر بە هەر چەشنە پیلانگێڕانێکى کۆنەپەرستى خەبات دەکا، لە پێناو بەرەوپێش بردن و بەدیهێنانیاندا بەرهەڵستى هەموو دژوارى و کۆسپ و گرفتێک دەبێتەوە و هەموو تواناى خۆى بۆ تەرخان دەکا و لە هیچ فیداکارییەک درێغى ناکا. هێز و هۆى سەرەکی بۆ بەدیهاتنى ستراتیژی کۆمەڵە لە کوردستان هێزى لە بن نەهاتووى جەماوەرى خەڵک و بزووتنەوەیان و هەنگاوەکانیانە و، کۆمەڵە تواناى خۆى دەخاتە سەر وشیار کردنەوە و هەڵخڕاندن و رێکخستنیان.
لە هەمان کاتدا هێزى پێشمەرگەى چەکدارى کۆمەڵە، بەشێک هەر لەم هێزە کۆمەڵایەتیەیە، باسکى چەکدارى کرێکاران و زەحمەتکێشانى کوردستان و یەکێک لە ئامرازەکانى بەرەوپێش بردن و بەدیهێنانى ئەو ئامانجانەیە و، پتەو کردن و پەرەپێدانى ئەو هێزە یەکێک لە ئەرکەکانى کۆمەڵەیە.
کۆمەڵە لە هەمان کاتدا لە هەموو دەرفەتێک، ئەگەرچى کەم و کورتیش بێ، کە بە هۆى گوشارى بزووتنەوەى شۆڕشگێڕانە و یان لاوازبوونى بەرەى دەسەڵاتدارەتى پێکبێ، بۆ بەرەوپێش بردنى هەر ئەم ئامانجانە و زەمینە خۆشکردن بۆ بەدیهاتنیان کەڵک وەردەگرێ. کۆمەڵە هەمیشە رێگاچارەى سیاسیى بۆ مەسەلەى کوردستان و بەدیهاتنى داخوازییەکانى گەلى کورد پێ باشتر بووە و بۆ بەرەوپێش بردنى رێگا چارەى سیاسی ئامادە بووە. بەڵام حکوومەتى کۆمارى ئیسلامى تا ئێستا هیچ زمانێکى بێجگە لە زمانى زەبروزەنگ و ملهوڕى نەزانیوە و وەڵامى داوا رەواکانى خەڵکى کوردستانى بە کوشتار، شکەنجە، سێدارە، گرتن و تیرۆر و هێرشى چەکدارانە داوەتەوە. لە هەلومەرجێکى ئاوادا، خەڵکى کوردستان و لە پێشەوەیان کۆمەڵە، لە بەرانبەر ئەم ستەم و سەرکوتگەرییەدا لێبڕاوانە راوەستاون و رادەوستن.

هەشت: کۆمەڵە بۆ هاوکارى و رێککەوتنى سیاسى و عەمەلى لەگەڵ حیزبەکان و هێزە سیاسییەکانى کوردستان بۆ بەرەو ڕووبوونەوەى هاوبەش بەرانبەر بە کۆمارى ئیسلامى و هێنانە گۆڕ و بەرەوپێش بردنى هاوبەشى داخوازییەکانى گەلى کورد ئامادەیە. بەدیهێنانى سیاسەتێکى لەم چەشنە، توانایى هەر کۆنەپەرستییەکى دەسەڵاتدار لە ئێستا و داهاتوودا بۆ دووبەرەکى نانەوە، هەڵگیرساندنى شەڕى ناوخۆ و لە ئەنجام دا پشت گوێ خستن و پێشێلکردنى داخوازەکانى نەتەوەى کورد و دەسکەوتەکانى و سەرکوتکردنى کوردستان، زۆر کەمتر دەکاتەوە و ئەو دەرفەتە بۆ گەلى کورد دەڕەخسێنى کە بە دڵنیایى و هێزێکى زیاترەوە داخوازەکانى خۆى بەسەر حکوومەت دا بسەپێنێ. کۆمەڵە هەروەها داواکارى رێککەوتنى حیزبە سیاسییەکانى کوردستانە بۆ پابەندبوونیان بە پەنا نەبردن بۆ زۆر لە پەیوەندەکانى نێوانیاندا و بۆ پاراستنى دەسکەوتەکانیان، بە قازانجى گەشەى وشیاری سیاسى کرێکاران و زەحمەتکێشانى کوردستان و بە قازانجى هەنگاونانى کوردستان بەرەو کۆمەڵگایەکى مۆدێڕن و دێمۆکراتیک دەزانین.
کۆمەڵە لە پلۆرالیزم و فرەچەشنیى سیاسى و فەرهەنگى لە کۆمەڵگاى کوردستاندا، لە بەرقەراربوون و پاراستنى رێسا دێمۆکراتیکەکان، لە هەڵبژاردەبوون و خۆ بە بەرپرس زانینى دەزگاکانى دەسەڵاتدارەتى لە کوردستان داکۆکى دەکا و هەموو تواناى خۆى بۆ پاراستن و داکۆکیکردن لەم بنەمایانە دەخاتەگەڕ. کۆمەڵە ئاڵاهەڵگرى داکۆکیکردن لە ئازادییەکان و مافە تاکەکەسى و سیاسییە بەرینەکانى شارۆمەندان، ئازادى هەمەلایەنەى دەربڕین، بڵاوکردنەوە و چاپەمەنى، کۆبوونەوە و رێکخراوبوون، ئازادیى رەخنەگرتن لە حیزبەکان و لێپرسراوانى سیاسى و ئازادى پەیوەست بوون یان پەیوەست نەبوونى شارۆمەندان بە هەر کام لە حیزبەکانەوەیە و، داکۆکیکردن لەم ماف و ئازادییانە بە ئەرکى خۆى دادەنێ.

نۆ: کۆمەڵە لە خەباتى ئازادى بەخشی گەلى کورد لە بەشەکانى دیکەى کوردستان بۆ بەدەستهێنانى مافى دیاریکردنى چارەنووس پشتیوانى دەکا و بۆ پێکهێنانى نزیکایەتیى سیاسى و فەرهەنگى لە نێوانیان دا، تێدەکۆشێ


ئه‌م بابه‌ته 3046 جار خوێنراوه‌ته‌وه‌‌

AM:10:11:13/06/2016